Luka 18 - KITABU KITAKATIFU

¹ Maku, Yeso yavolera vigi veve lugano kuvamanyia ndi, gavadukiraa vasaale kazozo vugira kuluha.

² Yavoola, “Mu lidaala lilala, yaali ho mukalagi uwavula kutia Nyasaye kandi uwavula kuhaana luyali ku avandu.

³ Mu lidaala liene yilio, haali ho kandi nu mukunzakali mulala, uwahongera kuzia ku mukalagi oyo haali kanyingi namugoonya aduuki kumukolera kuli yenya, navoora, ‘Ongonye nyoore likalaga lirungi kigira musigu wange.’

⁴ Ku ing'inga indambi, mukalagi oyo yasura makuva gumukunzakali oyo, navuzwa lwinyima, yavoola mumwoyo gwigwe mwene, ‘Kali nindatizaa Nyasaye, kandi nindahaanaa luyali kuvandu,

⁵ navuzwa kigira mukunzakali uyu umbuhi, ndamukolera kuli yenya gase alanduhiza nilihongera kuuza hano!’ ”

⁶ Kunangwa, mwami yaazizagilira kovora, “Huliri kuli mukalagi mudamanu uyu avoora.

⁷ Kalunu, Nyasaye sialakalagira avandu avatovole veve uvulungi, avamwanira mbasu nuvudiku? Alalindagilira ko lohono kuvativulira lianira liavo?

⁸ Inzi muvooleraa, alayaanza kuvakalagira uvulungi vwangu. Navuzwa lwa Mwana wa Adamu aliiza alakanyoole avandu ni vaveeye ni lisuuvira mu lirovai”

Lugano lwu Mufarisayo nu musololi wu vusuuru

⁹ Yeso yavoola lugano yilu kandi ku avandu valala avelolaa aveene kuva nuvulungi na nivalegeliza avandi vosi

¹⁰ “Avandu vaviri vaanigira kuzia mu Litembeli kusaala; Mulala yaali Mufarisayo, nu wundi naava musololi wu vusuuru.

¹¹ “Mufarisayo oyo yasingira, niyisaalira mwene, ‘Nyasaye, ngusandizaa kigira simbeeye kuli avandu vandi mba: avanuuri, avagaanga, avaheyi, anoho kali kuli musololi wu vusuuru uyu mba.

¹² Inzi mbonga vugira lilia haali kaviri ku lisiza, ndungaa kegero chi likomi ku vindu viosi via inzi nyooraa.’

¹³ “Navuzwa musololi wu vusuuru uyu, yasingira ihale. Siyaali anyala kali kuginga vweni vwivwe aheenze mwigulu mba, nitali yiduya ku kiritu chiche navoora, ‘O, Nyasaye, inzi mbeeye mwoni. Ombere zimbavasi!’

¹⁴ Muvooleraa, musololi wu vusuuru uyu yirana yengo weve nakoleywi mulungi na Nyasaye kuvita Mufarisayo oyo. Kigira ku vosi wenenehizaa umwene, alagehizwa; na ku vosi uwegehizaa alanenehizwa.”

Yeso agasizaa avana vakekeeke

¹⁵ Avandu valala valeta avana vaavo ku Yeso aviiki makono geege kuvo. Lwa aviigi veve vaavalola, vavagondokera nivavagaya.

¹⁶ Navuzwa Yeso yalanga avana nivaaza kuye navoora, “Leki avana vakekeeke vaze ku inzi, kandi mutavagayi kuuza ku inzi mba kigira uvwami vwa Nyasaye voveeye vwa avandu vaveeye kuli yava.

¹⁷ Muvooleraa agiligali, mundu ku vosi utavugilira uvwami vwa Nyasaye kuli avana vakekeeke, sialingira mu Vwami yivwo kali hakuzu mba.”

Mundu Mutugi

¹⁸ Mwimiliri mulala Muyuda yateeva Yeso, “Mwigizi Mulahi, gandukira ngole ki nduuki konyoora livamwoyo litahera mba?”

¹⁹ Yeso yamutivulira, “Kigira ki unanga mulahi? Sihali numulahi natali Nyasaye yenyine.

²⁰ Ivi wamanya malago: ‘Utaheya mba; utiita mba; utiva mba, kandi utagina mba, uhaane luyali ku baba woovo na mama woovo.’ ”

²¹ Naye yavoola, “Yago goosi ndagagumira kutura vwana vwange.”

²² Lwa Yeso yahulira yaga, yamuvolera, “Wenyekaa okole kindu kilala kandi. Gulizaa viosi via oveeye navio, ugavuliri avadaka, na ulava nilivikiru liilio mwigulu; maku, uzi ononde.”

²³ Navuzwa lwu mundu uyu yahulira yaga, yavelera ligali kigira yaali mutugi ligali.

²⁴ Lwa Yeso yalora yaga yavoola, “Voveeye vudinyu ku avatugi kwingira mu Vwami vwa Nyasaye!”

²⁵ Yee, voveeye vudinyu ligali kuvita mundu mutugi kwingira mu Vwami vwa Nyasaye, kuvita ing'amia kuvitira mu muluhu gwi isindani.

²⁶ Lwa avandu vahulira yaga, vamuteeva, “Ku nivwaha unyala kohonywa?”

²⁷ Yeso yamutivulira, “Agatanyalika ku avandu, ganyalika ku Nyasaye.”

²⁸ Petero yamuvolera, “Kunyi kwaleka viosi via kwaali navio, ma kwakolonda!”

²⁹ Yeso yavavolera, “Agiligali muvooleraa, sihali nu mundu uwaleka inyumba yeeye, anoho mukali, anoho amwavo weve anoho aviivuli veve, anoho avana kigira Vwami vwa Nyasaye,

³⁰ ulivula konyoora vinyingi ligali mu ing'inga ya kalunu, kandi konyoora livamwoyo litahera mba mu ing'inga yiza.”

Yeso yamoloma lwa kavaga kigira likuza lilie

³¹ Yeso yasunda halovega avaari likomi na vaviri navavoolera, “Huliri! Kuziiza Jerusalemi uwi vindu viosi viang'odwa na avaporofeti ku Mwana wa Adamu vilatwekizwa.

³² Kigira alahaanwa ku avandu vizihiiri, navo valamukolera kehenyahenye, kandi vamunyege nu kumutuzira amate; valamukuya nizingova, kandi valamwita.

³³ Navuzwa ku lidiku lia kavaga, alasimuguka.”

³⁴ Navuzwa aviigi sivahulira kali kindu kilala ku vindu yivi mba; vaali nivavisiywi kivuni cha amakuva yaga, na sivamanyiriza niki cha Yeso yavoola mba.

Yeso ahonyia muvoku musavasavi

³⁵ Lwa Yeso yaali ahimbi kuduuka Jeriko, yaali ho mundu mulala mboku uwaali ni yikaye kundulu kwinzira naasavasavaa.

³⁶ Lwa yahulira kiduma cha avandu nikivitaa, yateeva, “Nikindiki chekoleka?”

³⁷ Vaamuvolera, “Yeso wa Nazareti avitira hano.”

³⁸ Naye yahanzuka naalanga, “Yeso, Mwana wa Daudi omberere!”

³⁹ Avandu vaali imbiri vamugondokera nivamuvoolera akiring'ane; navuzwa yaazizagilira kuhanzuka, “Mwana wa Daudi, Omberere.”

⁴⁰ Yeso yasingira, navoora vamuleete kuye. Lwu mboku oyo yaza ahimbi, Yeso yamuteeva,

⁴¹ “Wenyaa ngokolere ki?” Naye yamutivulira, “Mwami, ngogonya nduuki kolola kandi.”

⁴² Yeso yamuvolera, “Nyora lilola! Lisuuvira liilio likohonyi.”

⁴³ Nonoho uwaali mboku yalora lilie, ma nalonda Yeso, niyizominya Nyasaye. Lwa avandu vosi valora yaga, vizominya Nyasaye.