Luka 17 - KITABU KITAKATIFU

Kwikigitariza avandi

¹ Yeso yavolera aviigi veve, “Ivindu viu kwikigitariza kandi kolomba avandu kugwa mu vwoni si vinyala kuvula kuuza, navuzwa uvudamanu voveeye ku mundu uviletaa.

² Vwakaveeye vulahi lugina lonene lusungwi mu ligoti lilie ma asiuvwi mu inyanza kuvita kolomba mulala ku avakeekeke yava agwi mu vwoni.

³ Kunangwa, mwilindi aveene ku choosi icha mukora! “Niiva amwavo woovo, akolaa uvwoni umugaye, kandi niiva aliganira, umusamiihi.

⁴ Niiva alakwonera haali saba ku lidiku lilala, ma yirani vuli ing'inga ku ivi navoora, ‘Nziganiyi,’ kuduuka umusamiihi.”

Zinguru zie lisuuvira

⁵ Avatumwa vavoolera Mwami, “Lomba lisuuvira lietu live linene ligali kuvita!”

⁶ Mwami yavativulira, “Niiva lisuuvira lienyu liakaveeye likekeeke kali kuli luguza lwi lisaazi, ngano mwakavoleye mukuyu yigu, ‘Yihika ni miri josi na wisimiki munyanza,’ nu musaala yigwo gwakamuhuliyi.

Miyinzi ju mutumikiri

⁷ “Niiva, mulala ku munyi aveeye nu mutumikiri weve ulimaa mulimi, anoho yaya amagondi, nivwaha ku munyi, lwu mutumikiri oyo ava ni yakinuka, alamuvolera, ‘Hamba vwangu wikale ulie chukulia?’

⁸ Awa, mu vogono yivwo ulamuvoolera, ‘Nombela chukulia change ndie, kandi wiviki vulahi undumikiri lwa inzi mba nindizaa chukulia ni ninwezaa lwinyima umanya ulie kandi unwi!’

⁹ Na hene alasandiza mutumikiri oyo kigira akoli aga alagiywi?

¹⁰ Kandi munyi ndio, lwa muva ni mwakakola ivindu viosi via mwalagwa kokora muvoore, ‘Kunyi koveeye avatugwa avataveeye nuvukara, kokoli vuzwa agakuduukiraa kokole.’ ”

Yeso yahonyia avandu likomi vovogere

¹¹ Lwa Yeso yaali naveeye mulogendo kuzia Jerusalemi yavitira hagati ha ulwaako lwa Samaria na Galilaya.

¹² Lwa yaali niyingira mu lidaala lilala, avandu likomi vovogere vavugana naye, na vasingira ihale kuye,

¹³ ni vahanzuka numwoyo munene nivavoora “Yeso! Mwami! Okovererere.”

¹⁴ Lwa Yeso yavalola, yavavolera, “Zi mwimanye kuvasaalisi vamuhenze.” Kunangwa, lwa vaali nivazizaa, vatakaswa.

¹⁵ Kunangwa lwa mulala yalora ndi yahonyiywi, yirana yizominyaa Nyasaye numwoyo munene.

¹⁶ Yaza, naagwa mam'mama ha virenge via Yeso namusaandiza. Mundu uyu yaali Umusamaria.

¹⁷ Hene yaho, Yeso yavoola, “Vaali avandu likomi avahonywa, avandi tisa vaveeye hayi?

¹⁸ Kigira ki mugeni uyu yeng'ine niye wirani kuhaana lisandiza ku Nyasaye?”

¹⁹ Yamanya navolera mundu oyo, “Singira uzie; Lisuuvira liilio likohonyi.”

Liza liu vwami vwa Nyasaye

²⁰ Avafarisayo vateva Yeso, “Uvwami vwa Nyasaye vuliiza ng'inga ki?” Yeso yavativulira, “Uvwami vwa Nyasaye sivuzaa nivilolekizu vinyala kololwa mba.

²¹ Siaveeyeho nu mundu ulivoola, ‘Henza, voveeye hano!’ Anoho ‘Avulaa.’ Kigira, uvwami vwa Nyasaye voveeye hagati hinyu.”

²² Maku yavolera aviigi veve, “Amadiku gaaza lwa muliegomba kolola lidiku lilala ku madiku gu Mwana wa Adamu, navuzwa simulililola mba.

²³ Avandu valamuvoolera, ‘Heenzi! Aveeye hala!’ Anoho, ‘Heenzi, Aveeye hano!’ Munyi mutazia yo anoho mutavalonda mba.

²⁴ Kigira kuli loheni lohemahemaa lovega lulala muvwerefu malwaaka lovega Lundi, nindio Mwana wa Adamu aliva lidiku lilie liu kuuza.

²⁵ Navuzwa imbiri wa yaga, gaduukanaa anyoore vusaliri vunyingi na ukwambanwa ni likula yili.

²⁶ “Kuli gaali mu madiku ga Nuhu, nindio galiva mu madiku gu Mwana wa Adamu.

²⁷ Avandu valia nivanwa nivaleeta avakali na avakali nivasererwa kuduuka lidiku lia Nuhu yingira mu liato. Amazi manene gaaza nigadiviza avandu vosi.

²⁸ Galakave kuli gaali mu ing'inga ya Loti. Avandu vosi vazizagilira kulia, nukunwa, kugura nukuguliza, kutaga kandi kwumbaka.

²⁹ Navuzwa lidiku lia Loti yatura Sodoma imbura yu muliru kandi yikibiriti yakuuba kutura mwigulu na yadiviza avandu vosi.

³⁰ Nindio galiva kandi lidiku liu Mwana wa Adamu aliloleka mu vukumi.

³¹ “Lidiku yilio, mundu woosi uliva ku kesegese chi inyumba atiika hasi kuzia munyumba kuvugura vindu vivie mba. Kandi ndio, uyu uliva mu mulimi mwimwe atiirana inyima munyumba yeeye mba.

³² Mwizurizi aganyoola mukali wa Loti!

³³ Ku vosi ogeriza kohonyia livamwoyo lilie, alaligotiza; ku vosi ogotiza livamwoyo lilie alalihonyia.

³⁴ Inzi muvooleraa, ku vudiku yivwo, avandu vaviri valakave kukidali nivagoni harara, mulala alakavugulwi na wundi alakalekwe inyima.

³⁵ Avakali vaviri valakave nivasiezaa uvusie harara, mulala alakavugulwi nu wundi alakalekwe inyima. [

³⁶ Avandu vaviri valakave mu mulimi, mulala alakavugulwi nu wundi alakalekwe inyima.]”

³⁷ Hene yaho, aviigi vamuteeva, “Ni hayi, Mwami?” Yeso yavativulira, “Ahu muviri guukuzi goveeye, ahene yaho zisoti zivuganiraa ho.”