Luka 15 - KITABU KITAKATIFU

Lugano lwi ligondi liagota

¹ Lidiku lilala lwa avasololi vuvusuuru avanyingi na avoni vazia kuhuliriza Yeso,

² Avafarisayo na avigizi vi Lilaga vatanga komoloma kwililira nivasinyiki nivavoora, “Mundu uyu! Yingirizaa avoni kandi alizaa navo.”

³ Kunangwa Yeso yavavolera lugano yilu.

⁴ “Nigava mulala ku munyi oveeye na magondi imia ndala niyakagotiza lilala, siamanya aleka magondi tisaini na tisa mwigendanyama, azie kwenya ligondi ligotikuduuka lwa alinyoora?

⁵ Lwa alinyoora aliginga kumavega nuvuyanzi.

⁶ Lwa aduukaa hango, alaangaa avalina na avatende veve ma avavolera, ‘Sangali harara ninzi, kigira nyooye ligondi liange iliali niligoti.’

⁷ Kunangwa muvooleraa, munzira ndala nzere vulakave uvuyanzi vunyingi mwigulu mwoni mulala uwiganiyi kuvita avandu tisaini na tisa avaloleka avalungi, avatenyaa lieganira.

Lugano lwi isiringi yagota

⁸ “Niiva mukali aveeye nizisilingi likomi, niiva alagotiza ndala, alakola ki? Ahambizaa itaya, niyeeye munyumba kandi yenyererize havundu hoosi vudinyu kuduuka lwa agenyoolaa?

⁹ Lwa agenyoolaa, alaangaa avalina na avatende veve nokovoora, ‘Sangali harara ninzi, kigira nyooye isiringi yange yandagotiza.’

¹⁰ Kunangwa muvooleraa, nindio zingelosi va Nyasaye valisangala kigira kwiganira kwu mundu mwoni mulala.”

Lugano lwu muyaayi wagota

¹¹ Yeso yaazizagilira kovora, “Yaali ho mundu mulala uwaali na avana vayaayi vaviri.

¹² Uwaali mukekeeke kuvo yavolera baba weve, ‘Baba, mbe miandu jange.’ Baba wavo yavagavulira miandu jije.

¹³ Inyima wa madiku makekeeke, muyaayi mukekeeke yaguliza miandu jije, nazia logendo ni mabese ganyoleka, nazia mu kivala cha ihale, uwayatumikira mabese geege vudamanu.

¹⁴ Lwa yamala kutumikira vuli kindu, inzara yaza mu kivala yicho, naye siyaali nichayalia mba.

¹⁵ Kunangwa yazia koteeva minyinzi ku mundu mulala wikivala yicho. Munene weve yamuhira mu mulimi gwigwe kulihiza zinguruvi.

¹⁶ Yegomba kulia magodo gi zinguruvi zializaa, navuzwa siyaali ho numundu woosi uwamuha kindu cha alia mba.

¹⁷ Lwa yaatanga konyoora vogeri nu ukwimanya mwene, yavoola, ‘Ni vanga ku avatumikiri vababa wange aveeye navo, avaveeye nichukulia kingi na inzi hano ninguza ninzara?

¹⁸ Ndazia ku baba wange muvoolere, Baba ndayonera Nyasaye kandi ku ivi.

¹⁹ Sindukani kali kulangwa mwana woovo mba. Ngola mbe kuli mulala ku vayinziri vovo.’

²⁰ Kunangwa yasingira natanga logendo lwu kwirana ku baba weve. “Navuzwa lwa yaali nakikiri ihale, baba weve yamulola, kandi yamuvererera. Yanyagula, naamukumbelera kandi namuvusavusa.

²¹ Mwana weve yamuvolera, ‘Baba ndayonera Nyasaye kand ivi. Sindukani kulangwa mwana woovo kali hakuzu mba.’

²² Navuzwa baba weve yavolera avatumikiri veve: ‘Koli vwangu! Leeti inguvu indahi mumuviiki kandi muviiki ebede ku kedete chiche ni ivilatu mu virenge vivie.

²³ Muku Mwitiri kemoli kenetu, kandi kolombe lilia nukusangara!

²⁴ Muyaayi wange uyu yaali yakuza, navuzwa kalunu aveeye mwoyo; yaali niyagota, navuzwa kalunu anyoleki!’ Maku vatanga kolomba lilia!

²⁵ “Ing'inga yene yeyo, muyaayi mukulundu yaali naveeye mu mulimi. Lwa yaali ni yirana naveeye ahimbi kuduuka hango, yahulira zinyimbu kandi avandu nivavina.

²⁶ Yalanga mulala ku avatumikiri, namuteeva, ‘Ni ki chekoleka?’

²⁷ Mutumikiri oyo yamuvolera, ‘Amwavo woovo umali kwirana yengo, na baba woovo amwitiyi ekemoli kenetu kigira anyoleki naveeye mwoyo kandi mulahi.’

²⁸ “Muyaayi munene uyu yavihilirwa ligali nasuura kwingira munyumba. Navuzwa baba weve yatura ichova namugoonya yingiri.

²⁹ Navuzwa yamutivulira, ‘Henza, mihiga yiji josi ndakuyinzilira kuli mutugwa, na ngikiri kuvunaga ku malago googo kali lilala mba. Na ivi ukiri kumba ku kali kememe chi imburi ndala nainzi nombe lilia harara navalina vange mba!

³⁰ Navuzwa mwana woovo uyu uwaalia miandu jijo na malaya, lwa yirani, umwitiyi ekemoli kenetu!’

³¹ Baba weve yamutivulira, ‘Mwana wange, ivi ovezaa ninzi hano harara madiku goosi, ichambeeye nacho nichicho.

³² Gaduukani kolombe lilia kandi kusangale, kigira amwavo woovo uyu yaali niyakuza, navuzwa kalunu aveeye mwoyo; yaali niyagota, navuzwa kalunu anyoleki.’ ”