Luka 14 - KITABU KITAKATIFU

¹ Lidiku lilala lie Lisabato, Yeso yazia kulia chukulia munyumba yumulala ku vanene va Avafarisayo. Avandu vaali ho vahenzeriza Yeso kolola alakola ki.

² Imbiri wa Yeso yaali ho mundu mulala uwaali nuvulwaye vwa mavimba mu viungu vivie.

³ Yeso yateeva avigizi vi Lilaga na Avafarisayo, “Ni vulahi kohonyia mundu ku lidiku lie Lisabato, anoho Awa?”

⁴ Navuzwa vakiring'ana. Yeso yadira mulwaye oyo, namuhonyia, namuvolera azie.

⁵ Inyima yavavolera, “Nivwaha ku munyi muyaayi weve anoho eng'ombe yeeye, nigwa mu kisima ku lidiku lie Lisabato alavula kumutuliza mu ahene nahene yaho?”

⁶ Navuzwa sivali vanyara kumutivulira liteeva yilio mba.

Uvwegehizi nu vuhaani

⁷ Yeso yalora kuli avalala ku avageni vagenihizwa vetovolera zindeve ziu luyali kutanga. Kunangwa yavolera lugano yilu:

⁸ “Mundu nakogenihizi mukeselero utikara mu vwiyangu voveeye nizindeve ziuluyali mba. Kigira galanyooleka ndi valagenihiza wundi munene kuvita ivi ligali;

⁹ naye wagenihiza munyi vombi alaza akovolere, ‘Haana vwiyangu ku uyu.’ Hene yaho ulava soni imbiri wa avandi kuvugura endeve yukumaliriza.

¹⁰ Navuzwa lwa genihizwa mu vogeni, viikara mu vwiyangu vwukumaliriza, kunangwa okogenihizi lwa yaza alakovolera, ‘Mulina wange, Hamba hano imbiri yinu, mu vwiyangu vulahi ligali.’ Kunangwa ulava nilizominywa imbiri wa vosi aviikaye harara niivi.

¹¹ Kigira ku vosi, uwenenehizaa, alagehizwa, na uwegehizaa alanenehizwa.”

¹² Maku Yeso yavolera uyu ogenihizaa, “Lwa olomba lilia, lia ha m'mbasu anoho ha mugolova, utalaanga avalina vovo anoho avamwavo vovo, aviiko vovo, anoho avatende vovo avaveeye avatugi mba, gase navo valakogenihiza na ivi onyoore litungwa liilio.

¹³ Navuzwa niwenya kolomba lilia ulange avadaka, avalema avadekerana na avavoku,

¹⁴ naivi ulagasizwa, kigira yavo sivaveeye nichavatunga mba. Kigira Nyasaye alakutunga ing'inga ya avandu valungi valisimuguka.”

Lugano lwi lilia linene

¹⁵ Lwa mulala ku avaari nivikaye harara na Yeso yahulira yaga, yavoola, “Aveeye nuvugasu mundu ulilia chukulia mu Vwami vwa Nyasaye!”

¹⁶ Yeso yamutivulira, “Yaali ho mundu mulala uwalomba lilia linene. Yalanga avandu vanyingi.

¹⁷ Lwi ing'inga yi lilia yaduuka, yatuma mutumikiri weve azie kovoolera avageni ‘Hambi kigira vindu viosi vietegeki.’

¹⁸ Navuzwa vosi sa mulala, yaatanga koteeva vusamiihi. Wukutanga yavolera mutumikiri uyu: ‘Ndakugula mulimi, na kigira yaga gaduukanaa nzie kogolola. Ngogonya ombere zimbavasi.’

¹⁹ Wundi naye navoora, ‘Ndakugula zigiriki likomi ziu kulima; lero mbeeye kunzira kuzia kuzigeriza; ngogonya, mwaza ombere zimbavasi.’

²⁰ Na wundi navoora, ‘Ndeti mukali na ku kivuni yiki, sinyala kuuza mba.’

²¹ “Mutumikiri oyo yirana kovoolera Mwami weve yaga goosi. Mwene inyumba yasinyika, navolera mutumikiri weve, ‘Zia vwangu ku zimbarabara kandi mutuzira twi lidaala, uvalete hano avadaka, avadekerana, avavoku na avalema.’

²² Mutumikiri oyo yavoola, ‘Mwami, aga ulagi gakoleywi, navuzwa vwiyangu vundi vukiri ho.’

²³ Mwami yavolera mutumikiri, ‘Zia kuzinzira ziu mumilimi kandi muzinzevo unige avandu vaze kwingira munyumba yange iduuki kwizura.

²⁴ Kigira, muvooleraa siaveeyeho kali mulala ku avagenihizwa ulizazama ku viukulia viange mba.’ ”

Uvuguli vwu kuva mutumwa

²⁵ Viduma vinene via avandu viali nivilondaa Yeso. Kunangwa, yagirung'ana navavoolera,

²⁶ “Mundu ku woosi naava niyazaa ku inzi, sianyala kuva mulondi wange na atanyaanza kuvita kuli ayaanza baba na mama weve, mukali weve, avana, amwavo na vavoozo veve mba.

²⁷ Ku vosi, mundu utavugula musalaba gwigwe agugingi nokononda sianyala kuva mulondi wange mba.

²⁸ “Nivwaha ku munyi, niiva yenya kwumbaka munara siatanga yikare avalize vuguli vwagwo aduuki kumanya aveeye nekegero cha mabese gaduukanaa kugumala?

²⁹ Nigataveeye ndio, lwa ava niyakamara kwumbaka musingi ma avuli kumala munara, avandu vosi valora munara yigu valamuseka,

³⁰ ‘Mundu uyu yaatanga kwumbaka, navuzwa siyamaliriza mba.’

³¹ “Mwami ki oveeye na avasikari zielefu likomi niyenyaa kuzia kulwaana nu Mwami wundi oveeye navasikari zielefu sirini utikara hasi kutanga nukuganagana niiva anyala.

³² Niiva alolaa kulwaana mwami wi zielefu sirini anyala mba, alatuma vatumwa koteeva mirembe ing'inga yu Mwami oyo akikiri ihale.

³³ Kunangwa, mundu woosi uvula koleka vindu viaveeye navio viosi, sianyala kuva mulondi wange mba.

Munyu gutaveeye nekenosi

³⁴ “Munyu goveeye mulahi; navuzwa nigogotiza ekenosi chagwo, gunyala kokolwa ndi gove nekenosi kandi?

³⁵ Sigoveeye mulahi ku mulimi anoho ku siina mba. Vagusundulaa ihale. Kunangwa, nimuveeye na matu gukuhulira, muhuliri!”