Luka 13 - KITABU KITAKATIFU

¹ Ing'inga yeyo, avandu valala vaza nivavolera Yeso amakuva ga avandu va Galilaya ava Pilato yita lwa vaali nivahaanaa visiuviliru viavo ku Nyasaye na masahi gaavo gazugana na masahi gi visiuviliru viavo.

² Yeso yavativulira, “Muganaganaa Avagalilaya yava vaali avoni kuvita Avagalilaya vandi, kigira viitwa munzira ya ndio?

³ Muvooleraa sigaveeye ndio mba; navuzwa munyi nimutiganira mulakuza mwosi kuli ndio kandi.

⁴ Anoho avandu vaali likomi na munane avu munara gwagwira mu Siloamu nivakuza; muganaganaa vaali avoni kuvita avandi vosi avamenyaa mu Jerusalemi?

⁵ Muvooleraa, sigali ndio mba; navuzwa munyi nimutiganira, mulakuza kuli ndio kandi!”

Lugano lwu musaala ugwavula kwama makuyu

⁶ Maku, Yeso yavavolera lugano yilu: “Mundu mulala yaali numusaala gwu muzabibu mu mulimi gwigwe mundu oyo yazia niyenyaa kwagula amakuyu ku musaala yigwo, navuzwa siyanyoola likuyu kugwo mba.

⁷ Kunangwa, yavolera mulindi wu mulimi gwigwe, ‘Henza! Ku mihiga jivaga ndayizangi hano mbula nzaguli amakuyu gu musaala yigu, na sindanyoola ku kindu mba. Goteme! Kigira ki kuzizagiliri kutumikira vonoru vwu mulimi vuzwa?’

⁸ Navuzwa mulindi oyo yamutivulira, ‘Mwami, leka gove kandi muhiga gunu. Ndagusemberera vulahi nukuviika ku isiina.

⁹ Niiva gulama amakuyu muhiga guzaa, vulahi; navuzwa nigutama, unyala kugotema.’ ”

Yeso ahonyia mukali mulema ku lidiku lie Lisabato

¹⁰ Yeso yaali niyigiza mu lisinagogi lilala lidiku lie Lisabato.

¹¹ Yaali ho mukali mulala uwaali ni lidemoni lia mudekeranyia ku mihiga likomi na munane. Yaali niyinama na siyaali anyala kusingira vulungi mba;

¹² Lwa Yeso yamulola, yamulanga, namuvolera, “Mukali, ohonyiywi kutura mu vulwaye vuvwo.”

¹³ Yavika makono geege kuye, nonoho muviri gwigwe gwadiguluka kandi yizominya Nyasaye.

¹⁴ Navuzwa munene wilisinagogi yavihilirwa ligali kigira Yeso yamuhonyia ku lidiku lie Lisabato. Kunangwa yavolera avandu vaali nivavugani ho, “Muveeye na madiku sita gokokolera mu miyinzi. Munyala kuuza mu madiku gene yago muhonywi vulwaye vwinyu, navuzwa mutaazi ku lidiku lie Lisabato mba.”

¹⁵ Mwami yamutivulira, “Avagaadi munyi aveeye ho nu mundu ku vosi hagati hinyu uvula kovoholora eng'ombe anoho isukiri yeeye kutura mu kego agihiri kunwa amazi ku lidiku lie Lisabato?

¹⁶ Sivoveeye vulahi mukali uyu, kisukururwi cha Aburahamu, wa Setani yaali niyavoha ku mihiga likomi na munane, avohololwe kutura mu livofa liu vulwaye vwivwe ku lidiku lie Lisabato?”

¹⁷ Lwa yamala kovora yaga, vosi avahing'anaa naye vaali soni, kandi avandu vosi vaali nuvusangali kigira vindu viosi viekoleka.

Lugano lwu luguza lwi lisaazi

¹⁸ Yeso yateeva, “Uvwami vwa Nyasaye voveeye kuli ndi? Kandi ndavufananyia naki?

¹⁹ Voveeye kuli luguza lwi lisaazi lwu mundu mulala yavugula nataga mu mulimi gwigwe. Lwaviruka kuduuka nilugwa musaala. Manyonyi gigulu gumbakaa zinyumba ziago kuziisia ziagwo.”

Lugano lwa mamera

²⁰ Yateeva kandi, “Ndafananyia Uvwami vwa Nyasaye naki?

²¹ Voveeye kuli amamera gu mukali mulala yavugula nazuganyia harara nuvusie zikilo sirini na tano, kuduuka lwa vwosi vwavimba.”

Kiliango keng'erere

²² Yeso yaazizagilira nologendo lwilwe kuzia Jerusalemi. Yavitira mumadala numutudaala, niyigiza avandu.

²³ Mundu mulala yamuteeva, “Mwami vaveeye avandu vakekeeke vuzwa avalihonywa ku lidiku lielikalaga?” Yeso yavavolera,

²⁴ “Mukore zinguru kwingira mukiliango keng'erere; kigira avandu vanyingi valageriza kwingira mu Vwami vwa Nyasaye navuzwa sivalinyala mba.

²⁵ Mwene inyumba alasingira kandi ahane kiliango; maku lwa munyi musingiraa ichova nukwigulihiza kukiliango nimuvoora, ‘Mwami, kwiguliri!’ Alamutivulira, ‘Inzi simanyi wa muturaa mba.’

²⁶ Maku mulataga kumuvolera, ‘Kunyi nivo avalizaa kandi ni kunwa harara niivi; ivi wigiza mu madaala giitu.’

²⁷ Navuzwa Mwami alakavoole, kandi ‘Muvooleraa agiligali, simanyi munyi muturaa hayi mba. Tuli imbiri wange, munyi vosi avaakoraa uvudamanu!’

²⁸ Kunangwa kulava ho nukulira kandi nukudiedieyiza amiinu, lwa mulilora Aburahamu, Isaka na Yakobo, na avaporofeti vosi nivaveeye mu Vwami vwa Nyasaye, navuzwa munyi aveene nimuteveywi ichova.

²⁹ Avandu valaza kutura ivugwi na madioli, kutura ivaale ni isavaalu kandi valikala mu lilia mu Vwami vwa Nyasaye.

³⁰ Maku, yavo avaveeye vukumaliriza kalunu, valava vukutanga; na yavo avaveeye vukutanga kalunu valava vukumaliriza.”

Vuyanzi vwa Yeso ku Jerusalemi

³¹ Ing'inga zana yeyo, Avafarisayo harara vazia ku Yeso nivamuvoolera, “Tula hano uzie havundu handi, kigira Herodi Antipa yenya kukwita.”

³² Yeso yavativulira, “Zi muvoolere Kivwi yicho ndi, ‘Kalunu na mugamba, ndakunga amademoni nokohonyia vulwaye, ni lidiku lia kavaga ndamala miyinzi jange.’

³³ Kali ndio, kalunu, mugamba na mugamba guzaa, gaduukanaa nzizagiliri nologendo lwange, kigira sivuveeye vulahi muporofeti yitirwi ichova wa Jerusalemi mba.

³⁴ “O, vayaye munyi avandu va Jerusalemi! Ivi Jerusalemi, wita avaporofeti, nulasa amagina avatumwa va Nyasaye atumaa ku ivi! Ndayeenyaa kuvungiza harara avana vovo kuli engoko ivungizaa viminyu viayo muzimbaha ziayo haali kanga, navuzwa munyi simwa mbugilira!

³⁵ Kunangwa, litembeli lienyu lilakave mang'anye! Agiligali muvooleraa, simulandola kandi kuduuka ing'inga yamulivoola, ‘Agasizwi oyo uzaa kulieta liu Mwami.’ ”