Livalidza 9 - KITABU KITAKATIFU

Lipasaka Lia Kaviri

¹ Yahova yamoloma ku Musa mu changalangwi cha Sinai, mu mweli gwu kutanga, muhiga gwa kaviri. Avandu va Isiraeli vaali ni vakatula mu kivala cha Egebeti. Yavoola,

² “Oleke avandu va Isiraeli vave ni Lisangala liu kwizuliza Lipasaka ku ing'inga imali kulagwa.

³ Yiyi ilava ing'inga yi lidiku lia 14 liu mweli gunu, mu zing'inga zia mugolova, kolondekana na malago galio goosi.”

⁴ Kunangwa Musa yavolera avandu va Isiraeli valombe lilia liu kwizuliza Lipasaka.

⁵ Ku lidiku lia 14 liu mweli gwukutanga mu zing'inga zia mugolova, avandu va Isiraeli valomba lilia liu kwizuliza Lipasaka mu changalangwi cha Sinai. Vaakora vuli kindu choosi kuli Yahova yaali nalagi Musa.

⁶ Vaaliho avasaza valala avaari niveyononyi kigira vaali nivadiiri ku miviri mikuzu. Kulwayago, si vaali vanyara kusangalira lizuliza lie Lipasaka ku ing'inga yalagwa mba. Kunangwa vazia ku Musa na Haruni

⁷ ni vavoola, “Kunyi kwayeyononyia kigira kumali kudiira ku miviri mikuzu. Kigira ki kugayiywi kuvuli kuhaana vihaanwa via Yahova harara na vandu va Isiraeli ku ing'inga imali kulagwa?”

⁸ Musa yavativulira, “Mulindi kuduuka nyoore lilaga kutura ku Yahova.”

⁹ Maku Yahova yavolera Musa,

¹⁰ avolere vandu va Isiraeli ndi, “Niiva mulala ku munyi noho visukululwi vienyu viayeyononyia kigira lidira ku muviri mukuzu, noho vaveeye ihale kologendo, vanyara kusangalira Lipasaka liange.

¹¹ Vanyara kusangara mu lidiku lia 14 ha mugolova gwu mweli wa kaviri. Gavadukiraa valie mugadi gutaveeye na mamera harara ni zinguza zinduru.

¹² Vatalekaku chukulia kali kilala mba, valalia kuduuka mugambazuri, noho vatavunagaku vigumba viosi mba. Gavadukiraa vasangaliri Lipasaka kolondekana na malago.

¹³ Navuzwa mundu woosi oveeye mulahi kandi utaveeye ihale mu logendo, kandi uvula kusangalira Lipasaka, sialava mulala ku vandu vange mba, kigira si yahaana vihaanwa ku inzi ku ing'inga yalagwa mba. Mundu uyu alagiinga uvwoni vwivwe umwene.

¹⁴ “Niiva mugeni woosi omenyi harara ni munyi aleenya kusangalira Lipasaka, gamudukira akole ndio kolondekana na malago gi Lipasaka. Galavaho malago malala ku vombi avageni kandi avandu vene kivala.”

Amalesi gu Muliru

¹⁵ Lidiku lwi Lihema liumbakwa, amalesi gaalikunika. Amalesi galoleka kuli muliru kutura mugolova kuduuka mugambazuri.

¹⁶ Kunangwa malesi gazizagilira kukunika lihema mbasu, na lialoleka kuli muliru mu vudiku.

¹⁷ Lwa malesi gaturaa ku Lihema, avandu va Isiraeli vaturaa havundu havaali ni vivungikizi. Havundu ha malesi gaaza hasi avandu va Isiraeli viivungikiza ahene yaho.

¹⁸ Avandu va Isiraeli vaatura havundu ha vaali ni vivungikizi ku lilaga lia Yahova, kandi vazizaa kwivungikiza havundu handi ku lilaga lilie. Valange havundu yaaha ing'inga yoosi lwa malesi gakunikaa lihema.

¹⁹ Kali niiva malesi gakunikaa Lihema ku ing'inga indambi, avandu va Isiraeli vatizaa amalago ga Yahova ma vavura kwisunda havundu handi.

²⁰ Ing'inga yindi, amalesi ga kunika Lihema ku madiku makekeeke vuzwa. Navuzwa ku lilaga lia Yahova, vaali vanyara kwisunda noho sivatura havundu yaaha mba. Maku kolondekana ni lilago lia Yahova, vatura ho.

²¹ Ing'inga yindi, amalesi gakunikaa Lihema kutura mugolova kuduuka mugambazuri. Lwa malesi gaturaa ku lihema, vaali vanyara kutanga logendo nu kwisunda havundu handi.

²² Niiva malesi gakunikaa Lihema ku ing'inga ya madiku gaviri noho mweli mulala anoho muhiga mulala, anoho madiku manyingi avandu va Isiraeli vamenya havundu yaho, si visunda havundu handi mba. Navuzwa lwa malesi gaturaa ku Lihema, visunda havundu handi.

²³ Kulilaga lia Yahova, avandu va Isiraeli vivungikiza havundu, kandi visunda havundu handi. Vaatia malago ga Yahova yahaana ku Musa.