Livalidza 8 - KITABU KITAKATIFU

Lilohiza lie Zitaya

¹ Yahova yavolera Musa,

² “Ovoolere Haruni ndi, lwa aviikaa zitaya 7 ku kinaara, azilohizi kunangwa uvulavu vwazio vuduuki kwaka imbiri wi kinaara.”

³ Haruni yakola ndio. Yalohiza zitaya kunangwa ziduuki kwaka imbiri wi kinaara kuli Yahova yalaga Musa.

⁴ Kinaara chalombwa nu vutuli vwi zahabu kutura ku vwaaliru vwacho kuduuka igulu wacho, kolondekana ni lifwana liu lugano lwa Yahova yamanyia Musa.

Litakasa Kandi Lisaalisa Lie Ihiiri ya vandu va Levi

⁵ Yahova yavolera Musa,

⁶ “Wahuli Ihiiri ya Levi kutura hagati ha vandu va Isiraeli ma uvatakase.

⁷ Okole yaga kuvatakasa: Uvuhili amazi gu kutakasa na uvavoolere vavege miviri jaavo josi, vafuyi zinguvu ziavo ziosi ma vitakase aveene.

⁸ Maku gavadukiraa vavuguli kemoli ki igiriki harara ni kihanwa chu vusie vwu vuswage uvuzuganyiywi na maguta ga muzeituni. Na ivi uvuguli kemoli kindi kigiriki keve kihanwa chu vwoni.

⁹ Maku uvuganyie avandu vosi va isiraeli na oleete ihiiri ya Levi yoosi isingili imbiri wi Lihema liange liukwaganiramu.

¹⁰ Avandu va Isiraeli valaviika makono gaavo ku mitwi jihiiri ya vandu va Levi.

¹¹ Maku Haruni alavatakasa vave kihanwa chagimwa kutura mu vandu va Isiraeli; kunangwa vaduuki kokora miyinzi jange.

¹² Maku ihiiri ya vandu va Levi valaviika makono gaavo ku mitwi ji zigiriki ziviri; na ivi ulavugula igiriki indala uhaane eve kuli kihanwa chu vwoni; niyindi uhaane eve kuli kihanwa chu kusambwa. Nandio, ulakola muluka gwu kutakasa uvwoni vwi ihiiri ya vandu va Levi.

¹³ “Utakase ihiiri ya vandu va Levi vave kuli kihanwa chagimwa ku inzi; uviiki Haruni na vayaayi veve vimiliri vandu va Levi.

¹⁴ Mu likora ndio, uviiki halovega avandu va Levi kutura hagati ha vandu va Isiraeli, kunangwa vave avandu vange.

¹⁵ Nuwakamala kuvatakasa nukuvasaalisa uvalete kandi ku inzi kuli kihanwa chagimwa, maku valava vaduukiru kutumika mu Lihema.

¹⁶ Inzi mali kuvavugula vave mu vogono vwa vayaayi vu kutanga kwivulwa ku vandu va Isiraeli; vaveeye avandu vange.

¹⁷ Vuli muyaayi wukutanga kwivulwa mu Isiraeli aveeye wange, vombi avasaza ni mitugu. Lwa ndiita avayaayi vukutanga kwivulwa vosi mu kivala cha Egebeti, Inzi ndatakasa vandu va isiraeli vave vange.

¹⁸ Mali kuvugura ihiiri ya vandu va Levi havogono vwa yavo vosi aviivulwa kutanga mu vandu va Isiraeli.

¹⁹ Mali kuhaana ihiiri ya vandu va Levi vave kuli kihanwa ku Haruni harara na vayaayi veve hagati ha vandu va Isiraeli. Valakola miyinzi mu Lihema havogono vwa vandu va Isiraeli, valakinga vandu va Isiraeli kutura ku kivi choosi chu vulwaye vudamanu ligali, niiva valisunda himbi na havundu Hatakatifu.”

²⁰ Kunangwa Musa, Haruni harara na vandu vosi va Isiraeli, vatakasa ihiiri ya vandu va Levi kuli Yahova yalaga Musa.

²¹ Avandu vi ihiiri ya Levi vitakasa aveene kandi nivafuuya zinguvu ziavo. Haruni yavasaalisa kandi navahaana kuli kihanwa chagimwa imbiri wa yahova; kandi yakola muluka gwu kutakasa uvwoni vwavo.

²² Avandu va isiraeli vaakora vuli kindu choosi ku vandu vihiiri ya Levi kuli Yahova yalaga Musa. Kunangwa avandu va Levi vaduukira kokora miyinzi mu Lihema lia Yahova mu vwimiliri vwa Haruni na vayaayi veve.

²³ Yahova yavolera Musa,

²⁴ “Vuli mundu wi ihiiri ya Levi musaza kutura ku mihiga 25, niye uduukani kutumika mu Lihema liange,

²⁵ na kuduuka mihiga 50 alasoosa ku vutumwa vwi Lihema.

²⁶ Inyima wayaga, anyala kokonyelera avache veve vi ihiiri ya vandu va Levi kokora miyinzi mu Lihema, navuzwa sianyala kokora vutumwa yeng'ine mba. Ulakola ndio kolohiza miyinzi ku ihiiri ya vandu va Levi.”