Livalidza 6 - KITABU KITAKATIFU

Amalago ku Naziriti

¹ Yahova yavolera Musa,

² Kuhaana malago yaga ku vandu va Isiraeli. Musaza woosi noho mukali woosi wisuhaa kuva mulala ku vandu va Naziriti, kandi yihaane mwene ku Yahova,

³ gamudukira yiyahule kutura ku iwaini kandi amalwa gu kuhambikiza. Sialanwa malwa malulu galombeywi kutura ku iwaini mba, anoho amalwa gu kuhambikiza mba, anaho mazi ga mazabibu anoho kulia mazabibu gene amavisi anoho amuumu mba.

⁴ Madiku goosi gaveeye mulala ku vandu va Naziriti, si alaliaku kindu choosi kutura ku Mazabibu mba, anoho kutura ku zinzori anoho ku magodo ga mazabibu mba.

⁵ Madiku goosi gaava nakikiri mu liesuuha lia vandu va Naziriti, sialavega liisu lilie noho zinderu zizie mba. Gamudukira ave mutakatifu kuduuka lwi ing'inga yeeye yu kuva mutakatifu ku Yahova iduuka. Alaleka liisu lilie kandi zinderu zizie ziyumbi.

⁶ Madiku goosi lwaveeye mutakatifu ku Yahova, si alisunda himbi ku muviri mukuzu mba.

⁷ Kali niiva baba weve alakuza noho mama weve anoho mbozo aweeve noho amwavo weve, sialeyonogonyia mwene ku liesunda himbi mba, kigira ikimanyiru chu kuva mutakatifu ku Nyasaye keveeye ku mutwi gwigwe.

⁸ Madiku goosi lwaveeye mulala ku vandu va Naziriti, aveeye mutakatifu ku Yahova.

⁹ Niiva mundu alakuza himbi naye natamanyi, ma yonogonyie liisu lilie litakatifu, maku alalinda madiku 7 gafwi kunangwa avege liisu lilie kandi zinderu zizie nu kwitakasa.

¹⁰ Ku lidiku lia munane, mundu oyo alaleeta makuulu 2 noho vidudi 2 ku musaalisi ha vwingiliru vwi Lihema liu kuvuganiramu.

¹¹ Musaalisi alahaana likuulu lilala kuva kuli kihanwa chu vwoni, ni lindi alahaana kuva kuli kihanwa chu kusambwa. Alamukolera muluka gwu kuhambana na Yahova kigira yakola uvwoni mu liesunda himbi nu muviri mukuzu. Ku lidiku lilala liere, mundu oyo alitakasa kandi.

¹² Kuduuka yihaane ku Yahova kigira ing'inga yeeye yukwihaana, kandi kuduuka ahaane kememe kimigu chu muhiga mulala keve kuli kihanwa chu vwoni. Madiku geege gakale sigalavalizwa mba, kigira yeyonogonyia lwa yaali ni yihaana ku Nyasaye.

¹³ Lwu Munaziriti uyu amala ing'inga yeeye yi lieyahula, alakola umuluka. Alazia mu vwingiliru vwi Lihema

¹⁴ ma ahaane ku Yahova zinyama zing'ano 3 zitaveeye nimbara: Kememe chi ligondi kimigu chu muhiga mulala keve kuli kihanwa chu kusambwa, kememe chi ligondi kisuveni chu muhiga mulala keve kuli kihanwa chu vwoni kandi limigu liduukanu live kuli kihanwa chi mirembe.

¹⁵ Kandi alahaana kihinda chu vukima vutali na mamera; uvukima vwu vusie uvunyuki vwazuganywa amaguta, visikuti viavakwa maguta, kandi kihanwa chu vuswage ni iwaini.

¹⁶ Musaalisi alahaana vindu yivi viosi ku Yahova vive kuli vihaanwa viu vwoni kandi vihaanwa viu kusambwa.

¹⁷ Alahaana kandi limigu ku Yahova live kuli kihanwa chi mirembe, kandi alahaana harara ni kihinda chu mugadi gutaveeye mu na mamera. Alahaana kandi kihanwa chu vuswage ni waini.

¹⁸ Munaziriti uyu alavegera liisu lilie ha vwingiliru vwi lihema, ma aliviiki ku muliru gwi kihanwa chi mirembe kisambwaa.

¹⁹ Maku, kinama chimbiri chi ligondi nichakahia, musaalisi alakivugula ma akiviiki harara nu mugadi gutaveeyemu na mamera, ni kisikuti kilala kutura mu kihinda ma akiviiki mu makono gu Munaziriti oyo.

²⁰ Maku musaalisi alavihaana ku Yahova kuli vihaanwa viagimwa. Yivi viveeye vihaanwa vitakatifu viu musaalisi, komeeda ku kinama chimbiri ni kinama chinyima chi ligondi. Inyima wa yaga, Munaziriti anyala kunwa iwaini.

²¹ Yaga na malago gu mulala ku vandu va Naziriti, navuzwa niiva alalaga kuhaana cha yisuha kuhaana, gamuduukira aduukizi lilagana liavalomba.

Ligasiza liu Musaalisi

²² Yahova yavolera Musa

²³ avolere Haruni harara na vayaayi veve vavoole makuva yaga mu ligasiza avandu va Isiraeli:

²⁴ Yahova ayaanze amugasizi kandi amulindi.

²⁵ Yahova ayaanze ang'ereng'anyie uvulavu vwivwe ku munyi, kandi amuvererere.

²⁶ Yahova ayaanze amanyie liyaanzilira lilie ku munyi, kandi ahaane mirembe ku munyi.

²⁷ Maku Yahova yavoola, “Niiva Haruni na vayaayi veve valandeva kugasiza vandu va Isiraeli, Inzi ndavagasiza.”