Livalidza 5 - KITABU KITAKATIFU

Avandu Vataveeye Valungi

¹ Yahova yavolera Musa,

² “Volera avandu va Isiraeli vakungi vuli mundu woosi oveeye nu vulwaye vwo vogere vatuli hokososa. Vakungi kali vuli mundu woosi oveeye ni liguli anoho vuli mundu woosi oveeye mudamanu kigira udiiyi ku muviri mukuzu.

³ Muvakungi vosi avakali na vasaza, vavuli kwonogonyia hokososa, hamenyi inzi hagati ha vandu vange.”

⁴ Avandu va Isiraeli vaatia lilago yili nivakunga vandu yava vosi kutura hokososa. Vaakora kuli Yahova yaali nalagi Musa.

Lihaana Mitungu ku Likora Uvudamanu

⁵ Yahova yavolera Musa,

⁶ avolere avandu va Isiraeli ndi, lwu mundu woosi musaza anoho mukali avula kuva musuuvirifu ku Yahova ma akolere wundi vudamanu,

⁷ gamudukira yiyame uvwoni vwivwe vwamali kokora kandi gamuduukira atungi mitungu josi; kandi alameedaku kidieli cha katano kuhaana ku oyo wamala kokolera uvudamanu.

⁸ Navuzwa niiva mundu oyo yakuza na siaveeye nu mwiko wa himbi kuye wi mitungu yiji jinyala kuhaanwa kuye, jilahaanwa ku Yahova kulwu musaalisi. Mitungu yiji jilameedwa ku ligondi limigu liu kutumika kokora muluka gwu kutakasa uvwoni vwu mundu oyo.

⁹ Kandi vuli kihanwa choosi kitakatifu cha vandu va Isiraeli vahaana ku Yahova, kilava chu musaalisi oyo.

¹⁰ Vuli musaalisi alaviika vihaanwa vileteywi kuye. Kihanwa chu musaalisi, kilava chu musaalisi mwene

Liyaalizwa lia vakali vatasuuvilwa na vasaza vaavo

¹¹ Maku Yahova yavolera Musa,

¹² avolere avandu va isiraeli ndi, niiva mukali alavula kuva musuuvirifu na akolere musaza weve agataduukana,

¹³ na niiva musaza alava naye ma musaza weve avuli kumanya kandi mukali uyu avuli kumanyikana, kali niiva yakweyonogonyia ma muloli avuli kuvaho kigira si yanyoolwa mba.

¹⁴ Na niiva mwoyo gwi likendeka gulava ku musaza uyu, ma ave ni likendeka ku mukali weve umali kweyonogonyia, noho niiva musaza uyu alakendeka, kandi akendekere mukali weve, kali niiva siyeyonogonyi mba,

¹⁵ maku musaza oyo alavugula mukali weve amuhili ku musaalisi; alahila harara ni kihanwa chu vusie vwi ingano kiloguramu indala, silaviikwaku amaguta anoho kimuli mba, kigira keveeye kihanwa chu vuswage cho kokendeka lwu musaza yenya kuvuula makuva yaga havulavu.

¹⁶ Musaalisi alaleeta mukali uyu kusingila imbiri wu vwali vwa Yahova.

¹⁷ Musaalisi alavugula mazi matakatifu mu kiju chovodohi, ma avuguli luguchi loveeye hasi mu Lihema ma aluviiki mu mazi kugakola gave amalulu.

¹⁸ Maku alaviika mukali uyu imbiri wa Yahova, ma atimbuluri liisu liile, ma aviiki mu makono geege kihanwa chu vuswage keve kuli chi lizuliza, ekeveeye kihanwa chi likendeka. Musaalisi uyu alagumira mu makono geege ibakuli ya mazi gaveeye amalulu agaleetaa kilaamo.

¹⁹ Maku musaalisi alavolera mukali uyu yisuuhi ndi, “Niiva siakoli ovoheyi, ivi si ulasalirizwa ni kilaamo cha mazi yaga galetaa mba.

²⁰ Navuzwa niiva wakola ovoheyi ma wayeyonogonyia ivi mwene,

²¹ maku Yahova ayaanze ahaane kilaamo ku ivi hagati ha vandu vovo; kandi ayaanze akole vukali vuvwo vuniale kandi inda yooyo ilavimba.

²² Mazi yaga gayaanze gazie munda mumwo ma gakole inda yooyo ivimbi kandi vukali vuvwo vuniale.” Maku mukali uyu alavoora, “Inzi mali kuvugilira, Yahova ayaanze akole ndio.”

²³ Maku musaalisi alang'oda kilaamo yivi mu kitabu, kandi agogizi mu mazi amalulu.

²⁴ Musaalisi alakola mukali uyu kunwa amazi malulu yaga agamuletera kilaamo kandi gamuletere vuzunu vunyingi,

²⁵ musaalisi alavugula kihanwa chu vuswage chi likendeka kutura mu makono gu mukali uyu, na alakitakasa imbiri wa Yahova ma akeleete ku vwali.

²⁶ Maku musaalisi alavugula kihanwa chu vuswage yiki kuluhi keve kuli lizuliza ma akisambiri ku vwali, na niyakakola ndio, alanwehiza mukali uyu mazi zana yaga.

²⁷ Niiva yakola ovoheyi nokweyonogonyia umwene, amazi yaga galaleeta kuye vusaliri vululu. Inda yeeye ilavimba kandi vukali vwivwe vulaniala; kandi alava kilaamo hagati ha vandu veve.

²⁸ Navuzwa niiva si yayeyonogonya umwene, kandi aveeye mulahi, maku alava muvoholore, kandi aliivula avana.

²⁹ Yili ni lilaga ku makuva gi likendeka. Lwu mukali oveeye ku musaza weve alakola ovoheyi nu kweyonogonyia umwene,

³⁰ noho lwu musaza ava nu mwoyo gwi likendeka ku mukali weve; maku musaalisi alahila mukali oyo imbiri wu vwali. Musaalisi alahaana kuye lilaga yili liosi.

³¹ Musaza alava muvoholore kutura ku vudamanu vwosi, navuzwa mukali alanyoola mageri gu vwoni vwosi.