Livalidza 36 - KITABU KITAKATIFU

Mwandu gwa Vakana va Zelofehadi

¹ Aviimiliri vi zinyumba mu ihiiri ya Gileadi, muyaayi wa Makiri kandi mwisukulu wa Manase muyaayi wa Josefu, vazia ku Musa na vimiliri vandi.

² Vavoola, “Yahova yakulaga ugavuliri kivala yiki vandu va Isiraeli kuvitira mulikuba zikuura; yakulaga kandi mwandu gwu mwiko wiitu Zelofehadi ku vakana veve.

³ Navuzwa wizulizi ndi, niiva valazia lukali mu ihiiri yindi, mwandu gwaavo gulava ku ihiiri yene yeyo nu mugavo gwitu gulageha.

⁴ Mu muhiga gwu kwilanyia, miandu giliva nijiguliziywi gililanyilwa vene gwo vukutanga, mwandu gwa vakana va Zelofehadi gulakadaswe ku ihiiri yavaliva nivaletwa mu, na mwandu yigu gulakagote kutura ku ihiiri yitu mihiga ni mihiga.”

⁵ Kunangwa Musa yahaana ku vandu va Isiraeli malago yaga kutura ku Yahova. Yavoola, “Kindu chihiiri ya Manase evooraa keveeye kilungi,

⁶ kunangwa Yahova avoora ndi avakaana va Zelofehadi vaveeye vavoholole kuletwa nu mundu woosi, navuzwa ave mundu kutura mu ihiiri yaavo vene.

⁷ Mwandu gwa vuli mundu wa Isiraeli gulatigala ku vandu vi ihiiri yeeye.

⁸ Vuli mukali uvugura mwandu mu ihiiri ya vandu va Isiraeli, gamudukira aletwe nu musaza wihiiri yene yeyo. Munzira yiyi, avandu vosi va Isiraeli valava nu mwandu gwa vaguuga vaavo

⁹ kandi mwandu yigu sigulatula ku ihiiri yiyi kuzia ku ihiiri yindi mba. Vuli ihiiri ilazizagilira kuva nu mwandu gwayo.”

¹⁰ Kunangwa vakana va Zelofehadi vakora kuli Yahova yalaga Musa.

¹¹ Vakana va Zelofehadi Mahala, Tiriza, Hogula, Milika na Noa valetwa na vasiala vaavo.

¹² Valetwa mu kiliango chihiiri ya Manase muyaayi wa Josefu, nu mwandu gwaavo gwatigala mu ihiiri ya baba wavo.

¹³ Yaga na malago ga Yahova yahaana ku vandu va Isiraeli kuvitira ku Musa mu kereremo cha Moabu, engeleka wu mugera gwa Jorodani kutura Jeriko.