Livalidza 35 - KITABU KITAKATIFU

Madaala Gahaanwa ku vandu va Levi

¹ Yahova yavolera Musa naveeye mu vilelemo via Moabu, himbi nu mugera gwa Jorodani ha Jeriko,

² “Volera vandu va Isiraeli ndi, kutura ku miandu javanyooye gavadukiraa vahane ku ihiiri ya Levi malala ku madaala manene vamenye mu, kandi vwayiru himbi na madaala yaga.

³ Madaala yaga galava ga vandu va Levi, kandi valamenya mugo. Vwayiru vulava ku zing'ombe ziavo nu ku mitugu gindi.

⁴ Vwayiru yivu vulisunda kutura ku lidigi lie lidaala zimita 450 zimbega ziosi,

⁵ kandi kove nu vuvambalaru vuhela zimita 900 zimbega ziosi zine, na lidaala lilava hagati.

⁶ Muhaane ku vandu va Levi madaala sita agu mundu anyala kwilukira mu nukwikinga niiva anyoleka na matava gu kwita mundu. Komeeda ku yaga, muvahe madaala gandi manene arubaini nambiri.

⁷ Harara nuvwayiru, madaala goosi galava arubaini na nane.

⁸ Madaala gamuhaana ku vandu va Levi kutura mu kivala cha vandu va Isiraeli vaavugura, gahaanwi kolondekana nu vunyingi vwi miandu ja vuli ihiiri. Muvuguli madaala manyingi kutura ku ihiiri eveeye na madaala manyingi, navuzwa muvuguli madaala makekeeke kutura ku ihiiri eveeye nago makekeeke.”

Amadara gu Kwilukira mu

⁹ Yahova yavolera Musa

¹⁰ avooreraa vandu va Isiraeli ndi: “Lwa mwambuka mugera gwa Jorodani ma mwingiri mu kivala cha Kanaani,

¹¹ mutovole madaala gu mundu anyala kwilukira mu niiva anyoora matava gukwita mundu.

¹² Hene yaho alava mulikingwa kutura ku vutima vwa viko vwu mundu witwa, avenyaa kuvanza kisaalia. Uyu uyalwa kigira matava gu kwita sialitwa mba kuduuka lwayalwa numuganda.

¹³ Mutovole madaala manene sita,

¹⁴ gavaga kugo gave ivugwi wumugera gwa Jorodani na gavaga gandi gave mukivala cha Kanaani.

¹⁵ Yaga galava madaala gu kwilukira mu ku vandu va Isiraeli nu ku vandu vange vamenyimu kunyinga ingekeeke naho vidikilamu. Uyu unyoola matava gu kwita mundu anyala kwilukira mu lilala kugo.

¹⁶ “Niiva mundu alatumikira chugi kuli kivia, kwita mundu alava mwiti na aliitwa.

¹⁷ Kandi niiva amuduya ni ligina liveeye mumukono gwigwe na ligina yili ligili mundu akuzi, mundu uyu alava mwiti. Mwiti uyu aliitwa.

¹⁸ Noho niiva amuduya natumikira musaala kuli chugi mumukono gwigwe amuduyi mundu akuzi alava mwiti, na mwiti oyo aliitwa.

¹⁹ Mwiko wahimbi wa oyo witwa aveeye nu vunyali vwu kwita mundu witi. Lwamunyola, yenyeka amwiti.

²⁰ “Niiva mundu adunyiraa wundi ma amuluguti hasi anoho amulasili kindu

²¹ anoho amuduyi ningundi yeeye alava mwiti na gaduukanaa yitwi. Mwiko wa himbi wa oyo witwa aveeye nu vunyali vwukwita mundu witi oyo. Lwa amunyoola, yenyeka amwiti.

²² “Navuzwa nigava mundu aliita wundi wavuli kudunyira kali kuliluguta hasi anaho kumulasila kindu,

²³ anoho niiva vugira kohenza mundu, alase ligina ma liiti mundu, wavuli kwenya kusaliliza, kandi utaveeye musigu weve.

²⁴ Muliiva kuli yili muganda gulakalaga kuvererera oyo waleeta likuza, na guvuli kovererera mwiko wa oyo wakuza wenyaa kuvanza kisaalia mba.

²⁵ Muganda gwenyeka gohonyie oyo wita mundu mu matava kutura ku mwiko wa oyo witwa, venyeka vamwiranyie mu lidaala linene wa yaali ni yirukiyi gamudukira amenye mu lidaala yili kuduuka lwu mundu uva naveeye musaalisi munene akuza.

²⁶ Niiva oyo wita mundu atulaa mu lidaala liokwilukila mu,

²⁷ kandi niiva mwiko wa oyo wakuza amunyoola ma amwiti, kikolwa yiki chu kuvanza kisaalia sikilava vulumindi mba.

²⁸ Oyo wita vugira kwenya gamuduukira amenye mu lidaala linene liukwilukila mu kuduuka lwu musaalisi munene akuza, navuzwa musaalisi niyakakuza mwiti oyo anyala kwirana yengo.

²⁹ Malago yaga gaveeye kumunyi kandi kuvisukululwi vienyu hoosi hamuva nimumenya.

³⁰ “Mundu uyalwa kigira vulumindi anyala kuva mwiti, uyu anyala kwitwa niiva kulava na valoli vaviri anoho vanyingi. Vololi vwu mundu mulala sivunyala kudinyiriza liyaaliza liu mulumindi mba.

³¹ Gaduukanaa mulumindi yiitwi. Sianyala kohononoka ku maduywa yaga kulwukutunga mabese mba.

³² Niiva mundu yirukira mu lidaala linene, mutamuleki atungi mabese gu kumukola yirane yengo musaalisi munene nagikiri kukuza mba.

³³ Niiva mukoraa yaga mulonogonyia kivala cha mumenyi mu. Vulumindi vwonogonyia kivala, nihataveeyeho nelikuza liu mulumindi sihaveeye ho ninzira yindi yokokola mwima gwu kutakasa kivala hu mundu amali kwitirwa mba.

³⁴ Mutonogonyi kivala hamumenya mba kigira inzi ni Yahova na menyi hagati ha vandu va Isiraeli.”