Livalidza 32 - KITABU KITAKATIFU

Zihiiri Ziadikila Ivugwi wa Jorodani

¹ Zihiiri zia Rubeni ni zihiiri zia Gadi ziali ni mitugu minyingi ligali. Lwavaalora kuli kivala cha Jaza na Gileadi chayaanziza mitugu jaavo,

² vazia ku Musa, musaalisi Elieza na vimiliri vandi vu muganda gwa Isiraeli nivavoora,

³ “Zisoma zia Atarozi, Diboni, Jaza, Nimura, Heshiboni, Eleale, Shebamu, Nebo na Beoni,

⁴ ni vivala via Yahova yaguuta kigira vandu va Isiraeli; viveeye vivala vilahi ku mitugu jietu, kigira kunyi koveeye ni mitugu minyingi ligali.

⁵ Vavoola, mwaza nuyanza okohe kivala yiki keve umwandu gwitu, kandi utakoleka kwambuki mugera gwa Jorodani kuzie kumenya yo mba.”

⁶ Musa yavativulira navoora, “Munyi mwenya kumenya hano lwa vache vinyu vandu va Isiraeli vazia kulwaana?

⁷ Mwenya kwita mioyo ja vandu va Isiraeli vavuli kwambuka mugera gwa Jorodani kuzia mukivala cha Yahova avaheye?

⁸ Nindio avaguuga vinyu vaakora lwandavatuma kutura ha Kadeshi Barinea kuzia kuluuta kivala yicho.

⁹ Vazia kuduuka mu livona lia Eshikoli nivalora kivala, navuzwa lwavirana, vita mioyo ja vandu va Isiraeli kuvula kwingira mu kivala cha Yahova yaali navaheeye.

¹⁰ Lidiku yilio, Yahova yaali nu vutima ma nahaana lilaga:

¹¹ ‘Nzisuha ndi kigira sivambulila mba, si halava ho na vasaza vi mihiga sirini anaho kuzizagilira avaatura Egebeti kwingira mukivala cha ndalaga Aburahamu, Isaka, na Yakobo mba.’

¹² Yaga gaali ku vandu vosi, nitali Kalebu muyaayi wa Jefune mundu wa Kenizi, na Joshua muyaayi wa Nuni; avaloonda malago ga Yahova no mwoyo gwosi.

¹³ Yahova yaali nu vutima na vandu, naavalomba kugendagenda mwigendanyama kulwimihiga arubaini kuduuka lwi likula liene yilio liavula kuyanziza Yahova liakuza.

¹⁴ Kandi kalunu mumali kuvugura vwiyangu vwa vababa vinyu, likula lihia lia vandu voni aveetegeki kwilanyia vutima vululu vwa Yahova ku vandu va Isiraeli kandi.

¹⁵ Niiva mwinye avana va Rubeni na vana va Gadi, musuraa kumulonda kalunu, alaleka vandu yava vosi mwigendinyama kandi na muladulwa kigira lidivizwa liavo.”

¹⁶ Maku vazia ku Musa nivavoora, “Kutanga, leka kwumbakiri magondi giitu lugaga lwa magina hano no kolomba imbinga ku madaala giitu kigira vakali viitu na vana viitu.

¹⁷ Maku kunyi kulava vetegeke na vache viitu, avandu va Isiraeli kuzia navo muvulwani ni kwimilira vulwani kuduuka lwakuvidikiliza mu kivala kiliva chavo. Mu ing'inga yiyi, vandu vi zinyumba zietu vilatanga komenya hano mu madaala gaveeye nimbinga, yu kwikinga kutura ku vandu vi kivala yiki.

¹⁸ Kunyi sikulirana yengo mba, kuduuka lwa vandu va Isiraeli vandi vavugura kivala cha valagilwa.

¹⁹ Sikulavugula miandu giveeye hagati haavo kolovega lundi lwu mugera gwa Jorodani mba, kigira kunyi kumali konyoora kedonye chiitu hano kolovega lwi Ivugwi wu mugera gwa Jorodani.”

²⁰ Musa yativura navoora, “Niiva mulakola yaga, imbiri wa yahova, mwetegeke ma muzie muvulwani.

²¹ Vasaza vinyu vu vulwani vaduukana vambuki mugera gwa Jorodani, kandi mulilaga lia Yahova, venyeka vingiliri avasigu viitu kuduuka lwa Yahova avaguuta

²² no kuvugura miandu ji kivala. Inyima wa yaga, munyala kwirana, kigira namuve nimumali kutwekiza ga mwalagana na Yahova harara na vache vinyu, avandu va Isiraeli. Maku Yahova alavugilira kivala Ivugwi wu mugera gwa Jorodani kilava chiinyu.

²³ Navuzwa ni mutakola kuli mwalaga, mwiganihizaa ndi, mulava ni mukoraa vwoni ku Yahova. Mutakola vudamanu kigira yaga mba; mutahevwa mageri kigira vwoni vwinyu mba.

²⁴ Kunangwa yumbaki madaala ginyu ni zingaga ziamagondi ginyu, navuzwa mukore cha mumali kulaga!”

²⁵ Avandu vihiiri zia Gadi na Rubeni vavoola, “Mwami, kunyi vatumikiri vovo kulakola kuli ukulagi.

²⁶ Vakali vitu, vana viitu, zing'ombe zietu na magondi giitu vilatigala hano mu madaala ga Gileadi.

²⁷ Navuzwa kunyi vosi kwetegeki kuzia muvulwani kolondekana na malago ga Yahova. Kulambuka mugera gwa Jorodani nokulwaana kuli umali kuvoola.”

²⁸ Kunangwa Musa yahaana malago yaga ku musaalisi Elieza, Joshua, na vimiliri vandi va Isiraeli.

²⁹ “Niiva zihiiri zia Gadi na va Rubeni zilambuka mugera gwa Jorodani ni zietegeki kulwaana kuli Yahova alagi, kandi niiva mulanyola vokonyi vwavo ma muguuti kivala yicho, muvahe kivala cha Gileadi kuli mwandu gwaavo.

³⁰ Navuzwa niiva si valambuka mugera gwa Jorodani nu kuzia kulwaana harara na munyi, vanyoore kedonye chu mwandu gwaavo mukivala cha Kanaani kuli munyi.”

³¹ Avasaza va Gadi na Rubeni vativura nivavoora, “Mwami, kulakola kuli Yahova amali kulaga.

³² Mu vwimiliri vwa Yahova, kulambuka nukuzia mu kivala cha Kanaani kandi kuzie mu vulwani, kunangwa kutigale ni miandu jitu mu kolovega lwi Ivugwi wa Jorodani lunu.”

³³ Maku Musa yahaana ku zihiiri zia Gadi na Rubeni ni inusu yi zihiiri zia Manase muyaayi wa Josefu kivala choosi chu vwamihi vwa Sihoni, umwami wa vandu va Amori kandi kivala chu vwamihi vwa Ogi, mwami wa Bashani harara na madaala gavakumberiza.

³⁴ Ihiiri ya Gadi yumbaka vuhia zimbinga zia madaala ga Diboni, Atarozi, Aro,

³⁵ Atirozi Shofani, Jaza, Jogibeha,

³⁶ Bezi Nimura na Bezi Harani kuli madaala manene gi zimbinga kandi zingaga zia magondi.

³⁷ Rubeni yumbaka vuhia Heshiboni, Eliele Kiriazaimu,

³⁸ Nebo, Baali Meoni; amita yaga gagilunganywa na Sibima ma nivahaana amita mahia ku madaala gavumbaka vuhia.

³⁹ Avandu vi kiliango cha Makiri muyaayi wa Manase vingilira kivala cha Gileadi nivamenyamu, kandi vakunga vandu va Amori avaari ni vamenyi mucho.

⁴⁰ Kunangwa Musa yahaana ku zihiiri zia Makiri muyaayi wa manase kivala cha Gileadi ni vamenye mu.

⁴¹ Jairi, wihiiri ya Manase yingilira navugura madaala malala nagalanga “Madaala ga Jairi.”

⁴² Noba yingilira Kenazi navugura madaala gacho, nagalanga Noba kuli lieta lilie.