Livalidza 29 - KITABU KITAKATIFU

Vihaanwa vie Lisavo ku Muhiga Muhia

¹ Ku lidiku liu kutanga lwu mweli gwa saba mulavugana nukusigamira Yahova, mutakola miyinzi josi mba. Lidiku yilio mulakuba visiriva.

² Muhaane ku Yahova kihanwa chu kusambwa ekeveeye chu mwayu gwu kuyaanziza kuye: kemoli kigiriki, ligondi limigu lilala kandi vimeme vimigu saba muhiga mulala vugira imbara.

³ Muhaane kihanwa chu vusie vwu vuswage vuduukana vuzuganyiywi na maguta ga muzeituni. Zikiloguramu zivaga ziu vusie harara ni giriki ndala, zikiloguramu ziviri ziu vusie harara ni limigu,

⁴ kandi ikiloguramu ndala yu vusie ku vuli kememe,

⁵ kandi imburi indala ekole kuli kihanwa chu vwoni. Munzira yiyi, vakole mwima gwu kwitakasa kigira vandu.

⁶ Muhaane yivi komeeda ku vihaanwa via kase viukusambwa vie lidiku liu kutanga liu mweli harara ni kihanwa chu vuswage, kandi kihanwa chu kusambwa cha vuli lidiku harara ni kihanwa chu vuswage kandi kihanwa chiwaini. Vihaanwa vie chukulia yivi vive nu mwayu mulahi guyaanzizaa Yahova.

Vihaanwa vie Lidiku liu Vohonyi

⁷ Ku lidiku lie likomi mu mweli gwa saba, muve ni livugana liu kusigamira Yahova, mutalia chukulia choosi mba; kandi mutakola miyinzi mba.

⁸ Muhaane kihanwa chu kusambwa ku Yahova, ekeveeye mwayu gwu kuyaanziza kuye: kemoli kigiriki, limigu lilala, kandi amamigu saba gu muhiga mulala kandi gataveeye ni mbala,

⁹ muhaane kihanwa kidukanaa chu vusie vwu vuzwage vusuganyiywi mu na maguta ga muzeituni zikiloguramu zivaga ziu vusie harara nigiriki ndala, zikiloguramu ziviri ziu vusie ni limigu lilala,

¹⁰ kandi kiloguramu indala yu vusie harara ni kememe,

¹¹ kandi muhaane imburi ekole ndala kuli kihanwa chu vwoni, komeeda ku kihanwa chi imburi mukore mwima gwu kwitakasa kigira vandu, kandi kihanwa chu kusambwa cha vuli lidiku harara ni kihanwa chu vuswage kandi kihanwa chiwaini.

Vihaanwa vie Lisavo lie Vidioli

¹² Ku lidiku lia komi na tano liu mweli gwa saba, muve ni livugana liu kusigamira Yahova. Muve ni lisangala lie lisavo yili mu lihaana luyali ku Yahova ku madiku saba, kandi mutakola miyinzi mba.

¹³ Ku lidiku liukutanga yili muhaane kihanwa chi viukulia ku Yahova, ekeveeye numwayu gwu kuyaanziza kuye: Vimoli vigiriki komi na tata amamigu gaviri kandi vimeme vimigu komi na ine viu muhiga mulala, viosi vugira imbara

¹⁴ muhaane kihanwa chu vusie vwu vuswage kidukanaa chazuganywa na maguta ga muzeituni zikiloguramu zivaga ziu vusie harara na vuli igiriki, zikiloguramu ziviri, harara ni limigu.

¹⁵ Kandi vusie vwu vuswage kiloguramu ndala ku vuli kememe chi ligondi ni vihaanwa vie iwaini viduukana.

¹⁶ Kandi muhaane imburi ekole indala kuli kihanwa chu vwoni. Muhaane yivi komeeda ku vihaanwa viu kusambwa harara nivihaanwa viu vuswage kandi vihaanwa vie iwaini via vuli lidiku.

¹⁷ Ku lidiku lia kaviri muhaane vimoli vigiriki komi na mbiri amamigu gaviri kandi vimeme vimigu komi na ine vuli muhiga mulala, vitaveeye nimbara.

¹⁸ Lwa muhaana vihaanwa vie zigiriki, mamigu kandi vimeme via mamigu, muhaane harara nivihaanwa viu vuswage, vihaanwa vie iwaini kolondekana ni livaliza lienyekanaa,

¹⁹ kandi lwa muhaana imburi ekole indala kuli kihanwa chu vwoni, muhaane harara ni vihaanwa via kazozo viu kusambwa kandi vihaanwa viavo vie iwaini.

²⁰ Ku lidiku lia kavaga muhaane vimoli vigiriki komi na moja, amamigu gaviri, kandi amamigu komi na ine gu muhiga mulala, goosi gataveeye nimbala.

²¹ Muhaane kandi vihaanwa viu vuswage, vihaanwa vie iwaini harara ni zigiriki kandi vimeme via magondi kolondekana ni livaliza lienyekanaa.

²² Kandi lwa muhaana imburi ekole ndala kuli kihanwa chu vwoni, muhaane harara ni kihanwa chu kusambwa, kihanwa chuvuswage kandi kihanwa chiwaini.

²³ Ku lidiku lia kane, muhaane vimoli vigiriki likomi, amamigu gaviri kandi vimeme via magondi komi na ine vitaveeye nimbala.

²⁴ Muhaane vihaanwa viu vuswage kandi vihaanwa vie iwaini kulwe zigiriki, mamigu kandi vimeme via magondi kolondekana ni livaliza liamalago.

²⁵ Kandi lwa muhaana imburi ekole muhaane harara ni kihanwa chu vwoni, harara ni kihanwa chu kusambwa chakazozo ni kihanwa chu vuswage, harara ni kihanwa chiwaini.

²⁶ Ku lidiku lia katano muhaane vimoli vigiriki tisa, amamigu gaviri, kandi vimeme via magondi komina ine viu muhiga mulala, viosi vitaveeye nimbara.

²⁷ Muhaane vihaanwa viu vuswage kandi vihaanwa vie iwaini harara ni zigiriki, mamigu kandi vimeme via magondi, kolondekana ni livaliza lia malago,

²⁸ kandi muhaane imburi ekole harara ni kihanwa chu vwoni kandi kihanwa chu kusambwa ni kihanwa chiwaini cha kazozo.

²⁹ Ku lidiku lia sita muhaane vimoli vigiriki munane, amamigu gaviri kandi vimeme via magondi komi na ine viu muhiga mulala, viosi vitaveeye nimbala.

³⁰ Muhaane zigiriki, mamigu kandi vimeme via magondi harara ni vihaanwa viewaini nu vuswage kolondekana ni livaliza lia malago

³¹ kandi lwa muhaana imburi ekole muhaane harara ni kihanwa chu vwoni, kandi kihanwa chu kusambwa cha kazozo ni kihanwa chiwaini.

³² Ku lidiku lia saba muhaane vimoli vigiriki saba, amamigu gaviri kandi vimeme via magondi komi na ine viu muhiga mulala, viosi vitaveeye nimbala.

³³ Muhaane kihanwa chu vuswage ni kihanwa chiwaini harara ni zigiriki, mamigu kandi vimeme via magondi kolondekana ni livaliza liamalago.

³⁴ Kandi lwa muhaana imburi ekole, muhaane harara ni kihanwa chu vwoni, kihanwa chu kusambwa chakazozo, kihanwa chu vuswage ni kihanwa chiwaini.

³⁵ Ku lidiku lia munane muve ni livugana liu kusigamira Yahova kandi mutakola miyinzi mba.

³⁶ Muhaane ku Yahova kihanwa chi viukulia ekeveeye mwayu gwu kuyaanziza kuye. Kandi vahane igiriki ndala, limigu lilala kandi vimeme via magondi saba viu muhiga mulala, vitaveeye nimbala.

³⁷ Kandi muhaane kihanwa chu vuswage ni vihaanwa vie iwaini harara ni igiriki ndala, mamigu kandi vimeme via magondi kolondekana ni livaliza lielilaga.

³⁸ Kandi lwa muhaana imburi ekole indala muhaane harara ni kihanwa chu vwoni, kihanwa chu kusambwa chakazozo, kihanwa chu vuswage kandi kihanwa chiwaini.

³⁹ Yaga nigo malago galondekanaa ni vihaanwa viu kusambwa, vihaanwa viu vuswage, vihaanwa vie iwaini kandi vihaanwa vie mirembe viduukana vihaanwe ku Yahova ku ing'inga yatovolwa ya masavo ginyu. Vihaanwa yivi viveeye komeeda ku vihaanwa via muhaana kigira kutwekiza lilagana lienyu liu kwisuuha.

⁴⁰ Kunangwa Musa yavolera vandu va Isiraeli vindu viosi via Yahova ya mulaga.