Livalidza 25 - KITABU KITAKATIFU

Avandu va Isiraeli vasigamira Baali ha Peori

¹ Lwa vandu va Isiraeli vaali nivamenyi Shitimu, avasaza vatanga likora voheyi na vakali va Moabu.

² Avakali yava vaavagenihiza mu lilia lie Lisavo lie visiuviliru via vanyasaye va Moabu. Avandu va Isiraeli valia viukulia kandi vasigamira vanyasaye vaavo.

³ Kunangwa avandu va Isiraeli vahambana mu lisigamira vanyasaye va Baali ha Peori. Maku Yahova yaali nu vutima navo,

⁴ kandi na volera Musa, “Vugula aviimiliri vosi va Isiraeli, uviiti mbasu, maku sindava nu vutima ku vandu va Isiraeli mba.”

⁵ Musa yavolera aviimiliri ndi “Vuli mulala ku munyi aliita vuli mundu mu ihiiri yeeye umali kusigamira Baali ha Peori.”

⁶ Mulala wa Isiraeli yavugula mukali wa vandu wa Midia na muhiraa mu lihema lilie imbiri wa Musa ni kiduma choosi, lwa vaali ni vasiomaraa ha vwingiliru vwi lihema lia Yahova.

⁷ Lwa Finiasi muyaayi wa Elieaza waali mwisukulu wa Haruni musaalisi yalora yaga, yasingira naleka kiduma, navugura litimu,

⁸ na londa musaza nu mukali mu lihema, ma navatumita ni litimu. Muinzira yiyi, uvulwaye vuhambizana vwadivizaa vandu va Isiraeli vwa herizwa,

⁹ navuzwa vwali nivumali kudiviza vandu 24,000.

¹⁰ Yahova yavolera Musa,

¹¹ “Kigira ga Finiasi amali kokora, sindava nu vutima na vandu va Isiraeli kandi mba. Yasura kuhambana mulisigamira vanyasaye vandi, navuzwa vaasigamira; yiki nicho kigira niimbura kuvadiviza muvutima vwange.

¹² Kunangwa umuvolere ndi nombaa naye lilagana liange liemirembe.

¹³ Oyo harara ni visukululwe vivie valava ni lilagana liu vusaalisi mihiga ni mihiga, kigira yaali nuvuha mulihaana luyali ku Nyasaye weve kandi yaleeta vusamiihi vwu vwoni ku vandu va Isiraeli.”

¹⁴ Lieta liu mundu wa Isiraeli witwa harara nu mukali wa vandu va Midia liali Zimuri muyaayi wa Salu mwimiliri wa vandu vi ihiiri ya Simioni.

¹⁵ Lieta liu mukali liali Kozibi mukaana wa Zuri waali mwimiliri wa vandu vinyumba ya vandu va Midia.

¹⁶ Yahova yalaga Musa,

¹⁷ “Wingiliri avandu va Midia kandi uvadivizi,

¹⁸ kigira uvudamanu vwa vamukolera lwa vamugada ha Peori, kandi kigira Kozibi, uwiitwa ing'inga yu vulwaye vuhambizana ha Peori.”