Livalidza 24 - KITABU KITAKATIFU

¹ Kuduuka lwene yilwo Baalamu yamanya ndi Yahova yenya aduuki kugasiza vandu va Isiraeli, kunangwa si yazia kwenyeleriza vudamanu kuli yaali naakori maziambiri mba. Yagilung'ana nahenza lovega lwi changalangwi,

² ma nalora vandu va Isiraeli ni vasoosa mu viduma kolondekana ni zihiiri ziavo. Mwoyo gwa Nyasaye gwaza kuye,

³ ma naativula voporofeti yivu. “Amakuva ga Baalamu muyaayi wa Boeri, amakuva gu mundu unyala kolola vulahi,

⁴ uyu unyala kuhulira ga Nyasaye avoora, ni zimoni ziumika ndolaa mumalola, amalola kutura ku Nyasaye Wuvunyali.

⁵ Amahema ga vandu va Isiraeli gaveeye malahi,

⁶ kuli zimbaso zindambi zia makindu, naho milimi ku luginga lwu mugera, kuli misaala ja Yahova yasimika, anaho midaragwa ahimbi na mazi.

⁷ Valava ni imbura inyingi kandi valataga vumwu vwavo mu milimi giveeye na mazi manyingi. Mwami wavo alava no vukumi kuvita vwa Agagi uvwamihi vwivwe vulavambalalizwa kuduuka ihale na himbi.

⁸ Nyasaye yavatuliza Egebeti, Avalwaaniraa kuli igiriki imbalava vamilaa avasigu vaavo, vamenenaa vigumba viavo, kandi vavunanyia vuta vwavo.

⁹ Ihiiri eveeye kuli isimba yi zinguru; lwegonaa siaveeye ho no mulala unyala kuluvilira kugivukiza mba. Uyu ugasizaa vandu va Isiraeli alagasizwa, na uyu ulaama vandu va Isiraeli alalaamwa.”

¹⁰ Balaki yaduyanyia zingundi zizie muvutima navolera Baalamu, “Ndaakulanga kulaama vasigu vange, navuzwa uvagaasizi haali kavaga.

¹¹ Kalunu tula uzie yengo! Ndaali nindagi ndakutunga, navuzwa Yahova umali kwigalira konyoora mutungu yigu.”

¹² Baalamu yativura navoora, “Ndaavoolera vatumwa vawatuma ku inzi ndi,

¹³ kali niiva ulamba ifeza kandi izahabu eveeye munyumba yooyo yu vwami, sindaali nyara kuhing'ana na malago ga Yahova no kokora kindu inzi mwene mba. Ndavoora cha Yahova amboleraa mbore.”

Voporofeti vwa Baalamu vwo Kumaliriza

¹⁴ Baalamu yavolera Balaki, “Kalunu nzirana ku vandu vange, navuzwa ningikiri kuzia, ngovolera ga vandu va Isiraeli valikolera vandu vovo mu zing'inga ziza.”

¹⁵ Maku yativura uvuporofeti yivu: “Makuva ga Baalamu muyaayi wa Boeri, makuva gu mundu ololaa vulahi,

¹⁶ uyu uhulira ga Nyasaye avoora; na onyoora vogeri vuturaa ku uyu oveeye igulu ligali. Ndolaa malola, ni zimoni ziumika, amalola kutura ku Yahova Wuvunyali.

¹⁷ Mbenzaa mu zing'inga ziza, na ndolaa ihiiri ya Isiraeli. Umwami kuli ing'ereng'ani yu vulavu, alatonga kutura mu ihiiri yeyo. Alatula mu vandu va Isiraeli, kuli ing'ereng'ani. Alakuya aviimiliri va Moabu kandi alaguuta vandu vosi va Sezu.

¹⁸ Alaguuta vasigu veve mu kivala cha Edomu, kandi avuguli kivala chavo kuva mwandu gwigwe, lwa Isiraeli izizagilira kuguuta.

¹⁹ Avandu va Isiraeli valavasienela hasi, kandi valadiviza avahononoka.”

²⁰ Maku mumalolo, Baalamu yalora Avandu va Maliki, na vola ovoporofeti yivu: “Ava Maliki yaali ihiiri yi zinguru ligali kuvita zihiiri zindi, navuzwa mu limalirika iladivizwa mihiga ni mihiga.”

²¹ Mumalolo geege yalora kandi vandu va Keniti ma navoora ovoporofeti yivu: “Havundu ha mumenyi haveeye ni likingwa, halindwa kuli inyumba ye linyonyi haveeye igulu kulwanda.

²² Navuzwa munyi avandu va Keniti muladivizwa, lwa vandu va Siria vamuvugura kuli avahambe.”

²³ Baalamu yavoola ovoporofeti yivu, “Yava ni vandu ki vivungikiza Ivaale?

²⁴ Aviguliri valaza kutura Saipurasi valaguuta vandu va Siria na vandu va Eberi, Navuzwa yavo valakadivizwi mihiga ni mihiga.”

²⁵ Maku Baalamu yetegeka ma niyiirana yengo, na Balaki yazia kunzira yeeye umwene.