Livalidza 23 - KITABU KITAKATIFU

¹ Baalamu yavolera Balaki, “Nyumbakira uvwali saba, kandi ondeetere zigiriki saba na mamigu saba.”

² Balaki yakola kuli yavolerwa; oyo harara na Baalamu vahaana kihanwa chigiriki ni limigu ku vuli vwali.

³ Maku Baalamu yavolera Balaki, “Singira hano himbi ni kihanwa chicho chu kusambwa, ninzi ndazia kulola niiva Yahova alavugana ninzi. Ndakovolera choosi chaava naambuulila.” Kunangwa yazia yeng'ine kondongozi yi kiguru,

⁴ na Nyasaye yavugana naye. Baalamu yamuvolera, “Mali kwumbaka uvwali saba ma mbaani kihanwa chi giriki ni limigu ku vuli vwali.”

⁵ Yahova yavolera Baalamu cho kovora ma naamutuma kwirana ku Balaki kumuha makuva geege.

⁶ Kunangwa Baalamu yirana nanyoora Balaki na akisingiyi himbi ni kihanwa chiche chu kusambwa harara na vimiliri vosi va Moabu.

⁷ Baalamu yavoola voporofeti yivu; “Balaki mwami wa Moabu yandeti, kutura Siria, mukivala chi vigulu vie Ivugwi. Yavoola, ‘Hamba omolomere, ulaame avandu va Isiraeli.’

⁸ Nyara ndi kulaama cha Nyasaye akikiri kulaama, naho nyalandi kudiviza, lwa Yahova akikiri kuvoola ndio?

⁹ Nyara kuvalola kutura kondongozi yi kiguru; nyara kuvahenzeriza kutura ku vigulu. Vaveeye ihiiri emenyi yeng'ine vamanyi ndi na vandu vagasizwa kuvita zihiiri zindi.

¹⁰ Visukululwi via Isiraeli viveeye kuli luguchi viveeye vinyingi ligali kuvalizwa; leka mbelizi madiku gange kuli mulala ku vandu va Nyasaye. Leka nguzi nu murembe kuli mundu mulungi.”

¹¹ Maku Balaki yavolera Baalamu, “Ongoleeye ki? Ngoleti hano kunamila vasigu vange, navuzwa cha okoli ni kuvagasiza.”

¹² Baalamu yamutivulira navoora, “Nyara kovora vutswa aga Nyasaye amboleraa kovora.”

Ovoporofeti vwa Kaviri vwa Baalamu

¹³ Maku Balaki yavolera Baalamu, “Hamba ninzi kuzie havundu handi hunyala kololera valala ku vandu va Isiraeli. Uvanaamili kutura hene yaho.”

¹⁴ Balaki yaahira Baalamu mu kiguti cha Zofimu kondongozi yi kiguru cha Pisiga. Hene yaho yumbaka kandi vwali saba ma nahaana kihanwa chi giriki ni limigu ku vuli vwali.

¹⁵ Baalamu yavolera Balaki, “Singira hano himbi ni vihaanwa vivyo vyo kusamba, ninzi ndavugana na Nyasaye havundu hala.”

¹⁶ Yahova yavugana na Baalamu namuvolera chokovoora, ma niyiirana naamutuma ku Balaki kuhaana makuva ga Yahova.

¹⁷ Kunangwa yirana nanyoora Balaki akisingiyi himbi ni kihanwa chiche chu kusambwa na vimiliri va Moabu. Balaki yateeva kumanya cha Yahova yaali navooye,

¹⁸ na Baalamu yativura uvoporofeti yivu: “Hamba, Balaki muyaayi wa Zipori, ma uhulirizi ganziiza kovora.

¹⁹ Nyasaye siaveeye kuli avandu, unyala koveha mba; siaveeye ho nu mundu unyala kugirung'anyia zing'anagani zizie mba. Choosi chalagaa, akolaa; amolomaa, ma gekoleka.

²⁰ Inzi ndavoolerwa ngasizi, na Nyasaye nagasizi sinyala kwilanyia munwa mba.

²¹ Ndolaa madiku gaaza imbiri ga Isiraeli, sialavaleetela vudamanu naho vudinyu mba; Yahova Nyasaye wavo aveeye navo; valandiza ndi Yahova nu mwami wavo.

²² Nyasaye yavatuliza Egebeti; Avalwaaniraa kuli igiriki imbalava

²³ sihaveeye ne vyokwikingira, kandi vusigitiri mba; vinyala kutumikilwa kulwaana ihiiri ya Isiraeli. Kalunu vandu valavoora kigira Isiraeli, ‘Henza ku ga Nyasaye amali kokora!’

²⁴ Ihiiri ya Isiraeli eveeye kuli isimba yi zinguru: Siesosaa kuduuka lwa itandula nu kudiviza mba, kuduuka lwa inwa masahi ga imali kwita.”

²⁵ Maku Balaki yavolera Baalamu, “Usuyi kulaama vandu va Isiraeli, navuzwa nuyanza utavagasiza mba!”

²⁶ Baalamu yativura navoora, “Sindakuvoolera ndi ndakora choosi cha Yahova yambolera?”

Uvoporofeti vwa Kavaga vwa Baalamu

²⁷ Balaki yavolera Baalamu, “Hamba ninzi na ndakuhila havundu handi kutura yaaha, mbula galayaanziza Nyasaye uvanaamili.”

²⁸ Kunangwa Balaki yaahira Baalamu kondongozi yi kiguru cha Peori kihenzana ni changalangwi.

²⁹ Baalamu yavolera Balaki, “Nzumbakila vwali saba hano ma ondetere zigiriki saba na mamigu saba.”

³⁰ Balaki yakola kuli vamuvolera, na ahaanaa vihaanwa vie giriki ni limigu ku vuli vwali.