Livalidza 22 - KITABU KITAKATIFU

Mwami Balaki Yatumana Balaamu Kulaama vandu va Isiraeli

¹ Avandu va Isiraeli vazia nivalomba hokososa mu vilelemo via Moabu Ivugwi wu mugera gwa Jorodani kolovega lundi lwa Jeriko.

² Lwu mwami va Moabu Balaki muyaayi wa Zipori, yahulira ga vandu va Isiraeli vaali vamali kokolera vandu va Amori, kandi kuli avandu vaali avanyingi,

³ Oyo harara na vandu veve vosi vaali nuvuti.

⁴ Avandu va Moabu vavoolera aviimiliri va vandu va Midiani. “Avandu yava valadiviza vindu viosi viveeye harara ni kunyi kuli igiriki iliiza vunyasi muvwayiru.” Kunangwa mwami Balaki,

⁵ yatuma vatumwa kuzia kulanga Balaamu muyaayi wa Beori, uwaali ha Pezori ahimbi nu mugera gwa Efurate mu kivala cha Amawi. Valeta makuva yaga kutura ku Balaki. “Nyenya umuvolere ndi, ihiiri enene yizi kutura Egebeti, avandu vayo vaziyi havundu hoosi kandi vatihiza ndi valavugula kivala chiitu.

⁶ Vaveeye avanyingi kuvita kunyi. Kulwayago nuyanza, hamba uvanaamili. Ambula kulavaguuta kandi kuvakungi kutura mu kivala chiitu. Inzi manyi ndi lwa uhaana ligasizwa avandu valagasizwa, kandi lwa uhaana kilaamo avandu valalamwa.”

⁷ Maku aviimiliri va vandu va Moabu harara na vimiliri va Midiani vazia ni mitungu ji kilaamo ku Baalamu, kandi vamuvolera makuva ga Balaki.

⁸ Baalamu yavavolera, “Mugone hano, na mugamba ndamuvolera aga Yahova yamboleeye.” Maku aviimiliri va vandu va Moabu vatigara harara na Baalamu.

⁹ Kandi Nyasaye yaza ku Baalamu na muteeva, “Avandu ki vamumenyi navo yava?”

¹⁰ Baalamu yativura, “Mwami Balaki wa Moabu avatumi kuza kombolera

¹¹ ndi avandu vaatura mu Egebeti valanda mu kivala choosi. Yenya inzi mbalame kunangwa avakungi.”

¹² Nyasaye yavolera Baalamu, “Utazia na vasaza yava mba. Kandi utalama avandu va Isiraeli mba, kigira vagasizwa.”

¹³ Mugamba gwalondaku, Baalamu yazia ku vatumwa va Balaki na vavoolera, “Mwilane yengo; Yahova yakusula inzi kuzia ni munyi.”

¹⁴ Maku viirana ku Balaki ni vamuvolera ndi, Baalamu yasura kuuza navo.

¹⁵ Maku Balaki yatuma aviimiliri vanyingi avaari vikivune kuvita avaari vukutanga.

¹⁶ Vazia ku Baalamu ni vamuvolera makuva gaturaa ku Balaki. “Nuyanza utaleka kindu kikwigaliri kuuza ku inzi mba.

¹⁷ Ndakuha kihanwa kilahi ligali, kandi ndakora kindu choosi chovoola. Nuyanza hamba unamili avandu yava.”

¹⁸ Navuzwa Baalamu yavativulira, “Kali niiva Balaki alamba ifeza ni zahabu kutura munyumba yu vwami, sinyala kuvula kutia malago ga Yahova Nyasaye kali ku kindu kekekeeke mba.

¹⁹ Navuzwa nimuyaanza mugone kuli avandi vaagoni, kunangwa nduuki kumanya niiva Yahova aveeye ni kindu kindi noho siaveeye nacho kombolera.”

²⁰ Vudiku yivwo, Nyasaye yazia ku Baalamu kandi navoora, “Niiva vasaza yava vazi kokoteeva uzie harara navo, wetegeke kuzia, navuzwa ukole vuzwa cha inzi ngovolera okole.”

²¹ Kunangwa mugamba gwalondaku Baalamu yanina kubunda yeeye nazia harara na vimiliri va Moabu.

Baalamu ni Bunda yeeye

²² Nyasaye yaali nu vutima kigira Baalamu yaali nazizaa, lwa Baalamu yaali nanini ku bunda harara na vatumikiliri veve vaviri, engelosi ya Yahova yasingira munzira avuli kuzia.

²³ Lwibunda yalora engelosi nisingiyi munzira nigumiyi kivavi, yatura kunzira ni yeveta mumilimi. Baalamu yakuba ibunda nagilanyia kunzira.

²⁴ Maku engelosi ya Yahova yasingira kunzira eng'erere hagati hi milimi giviri kandi haali ho na madigi ga magina mu zimbega ziosi.

²⁵ Lwibunda yalora engelosi, yisunda ku lidigi nihulula ku kelenge cha Baalamu. Baalamu yakuya ibunda lwa kaviri.

²⁶ Kandi Engelosi yisunda imbiri, nisingila havundu hang'erere havula kuva nuvwiyangu zimbega ziosi.

²⁷ Ing'inga yiyi, lwibunda yalora engelosi, yagona hasi. Baalamu yavihilirwa natanga kukuya ibunda nimbimbu yeeye.

²⁸ Maku Yahova yahaana kubunda zinguru ziukomoloma, nayavoolera Baalamu, “Kindiki chamali kokolera? Kigira ki umali kunguya haali kavaga?”

²⁹ Baalamu yavolera ibunda, “Ivi umali kongola musilu! Ndava ni kivavi ngano ndaali ndakwita.”

³⁰ Ibunda yaalivula, “Inzi simbeeye ibunda indala nzere yuninaaku mulimenya liilio liosi? Inzi ndakokolera ku ndi maziambiri?” Baalamu yativura, “Awa.”

³¹ Maku Yahova yaleka Baalamu alole engelosi nisingiyi ahene yaho ni kivavi. Baalamu yagwa hasi mamumama.

³² Engelosi ya Yahova yateeva, “Kigira ki nukuya ibunda yooyo haali kavaga kulindi? Ndakuza kukinga inzira yooyo kigira sigaduukana ivi kuzia kologendo yilu mba.

³³ Navuzwa ibunda yooyo yaandola, na yagilung'ana haali kavaga. Ilavula kokora ndio, ngano ndakwita ma ndaleka ibunda.”

³⁴ Baalamu yativura “Inzi mali kokora uvwoni. Sindamanya ndi ivi usingiyi kunzira kungaya mba, navuzwa kalunu niiva voveeye vudamanu inzi kuzizagilira nologendo, ndirana yengo.”

³⁵ Navuzwa engelosi yavoola, “Zizagilira na vasaza yava, navuzwa omolome vuzwa changovoolera ovoole.” Kunangwa Baalamu yazia navo.

Balaki Yagenihiza Baalamu

³⁶ Lwa Balaki yahulira ndi Baalamu yaazaa, yazia kumwaganira ha Ari, lidaala liveeye kumugera gwa Arinoni ku lwako lwa Moabu.

³⁷ Balaki yamuvolera, “Kigira ki nuvula kuuza lwandakulanga mulitanga? Waganagana ndaavura kukuha madanyi gaduukanaa?”

³⁸ Baalamu yativura, “Inzi sindaaza? Navuzwa kalunu zinguru ki ziambeeye nazio? Nyara kovora vuzwa cha Nyasaye yamboleeye mbore.”

³⁹ Maku Baalamu yazia na Balaki mu lidaala lia Huzozi,

⁴⁰ wa Balaki yitaa zing'ombe na magondi. Yavugula zindala kuzinyama ziazo nahaana ku Baalamu harara navimiliri va yaali navo.

Ovoporofeti vwu Kutanga vwa Baalamu

⁴¹ Lidiku lialondaku, Balaki yavugula Baalamu naamuhira Bamozi Baali. Ahene yaho, Baalamu yalora valala ku vandu va Isiraeli.