Livalidza 21 - KITABU KITAKATIFU

Avandu va Isiraeli Vaguuta Avandu va Kanaani

¹ Lwu mwami wa Kanaani wi kivala cha Aradi Isavaalu wa Kanaani ya hulira ndi avandu va Isiraeli vazaa kuvitira mu inzira ya Azarimu, ya vingilira na vugula valala kuvo

² Maku avandu va Isiraeli valomba lilagana ku Yahova: “Niiva ulaleka kuguuti avandu yava, kulakavahaane kuivi harara na madaala gaavo, kandi kulakavadivizi.”

³ Yahova yavahulira kandi navakonya kuguuta avandu va Kanaani. Maku avandu va Isiraeli vavita vosi kandi nivavugura madaala gaavo goosi, nivalanga havundu yaho Horima.

Enzoka ya Lombwa ku Mugasa

⁴ Avandu va Isiraeli vaatura mu kiguru cha Hori kuvitira kunzira yazizaa mukisulu cha Akaba, kunangwa vaduuki kovodong'ana mu kivala cha Edomu. Navuzwa vandu vaakuza mioyo kigira ologendo.

⁵ Vahing'ana na Nyasaye harara na Musa nivatanga kwigana, “Kigira ki mwakutuliza mu Egebeti kukuziri mwigendanyama, mutaveeye ni chukulia na mazi? Sikuyaanzi viukulia vidamanu yivi mba!”

⁶ Maku Yahova yatuma zinzoka ziuvusungu mu vandu, na zialuma vandu va Isiraeli vanyingi ni vakuza.

⁷ Avandu vazia ku Musa ni vamuvolera, “Kwakora vwoni lwa kwigana ku Yahova harara nivi, kalunu kusaala ku Yahova atuliziho zinzoka yizi.” Maku Musa yasaalira vandu.

⁸ Maku Yahova yavolera Musa alombe enzoka yu mugasa magiviiki ku musaala na umundu woosi ulumwaa nenzoka yumugasa uhenza konzoka yiyi alahona.

⁹ Maku Musa yalomba enzoka yu mugasa na viika kumusaala. Mundu woosi waali nalumiywi niyaheenzaa konzoka yu mugasa yiyi, yahona.

Ologendo Kutura Hori Kuzia Mulivoona lia Moabu

¹⁰ Avandu va Isiraeli vatanga ologendo ni vazia hokososera ha Obozi.

¹¹ Lwa vaali ni vakatura hene yaho, vazia hokososa ha Abarimu, mwigendanyama Ivugwi wi kivala cha vandu va Moabu.

¹² Maku vaatura hene yaaha ni vazia hokososa mu kereremo cha Zeredi.

¹³ Kutura Zeredi vazia ho kososa kolovega lwi Ivaale wu mugera gwa Arinoni, mwigendanyama. Vazia kuduuka mu kivala cha vandu va Amoriti. Arinoni yaali ku lwako hagati hi kivala cha vandu va Moabu na vandu va Amoriti.

¹⁴ Yicho nicho chagira kitabu chuvulwaani vwa Yahova kevoolaa, “Lidaala lia Wahebu liveeye mu Sufa kandi mavoona gazizaa kuduuka ku mugera gwa Arinoni

¹⁵ kandi kuduuka mu livona lizizaa kuduuka mu lidaala lia Ari kandi kuduuka ku lwako lwa Moabu.”

¹⁶ Kutura hene yaho, vazia havundu halangwa vidaho. Ahene yaho, Yahova yavolera Musa, “Uvungizi avandu harara, ninzi ndavaha mazi.”

¹⁷ Ing'inga yene yeyo, avandu va Isiraeli viimba lwimbu yilu: “Vidaho muleete amazi ginyu; Nakunyi kulasangala ni kwimba.

¹⁸ Kidaho cha vakana va vami vayava harara na vimiliri va vandu, kidaho cha vayava ni mbimbu yu vwami harara ni zimbimbu ziavo.” Vagenda kutura mwigendanyama ni vazia kuduuka Matana,

¹⁹ na kutura ahene yaho, vazia kuduuka Nahalieli, na kutura Nahalieli vazia Bamozi.

²⁰ Kutura Bamozi vazia mu livona lie kivala chavandu va Moabu, ahimbi kondongozi yi kiguru cha Pisiga, ekeveeye kolovega lwu mwigendanyama.

Liguutwa liu Mwami Sihoni nu Mwami Ogi

²¹ Maku avandu va Isiraeli vaatuma vatumwa ku mwami Sihoni wa vandu va Amoriti kovora ndi;

²² “Muleke kuvitiri mukivala chiinyu; zing'ombe zietu harara ni kunyi si kulaleka imbalabara no kogovera mu milimi noho milimi ji vizabibu vienyu mba, kandi sikulanwa mazi kutura mu vidaho vienyu mba. Kulalonda vuzwa imbalabara kuduuka lwa kutura mu kivala chiinyu.”

²³ Navuzwa Sihoni siyavugilira vandu va Isiraeli kuvitira mukivala chichie mba. Yavungiza vandu vi liihi lilie ni vazia Jahazi mwigendanyama ni vingilira vandu va Isiraeli.

²⁴ Navuzwa vandu va Isiraeli vita vasigu vaavo vanyingi mu vulwani ni vavugura kivala chavo kutura kumugera gwa Arinoni Ivaale wa Jaboku, kuduuka ku vandu va Amoni, kigira ulwako lwa vandu va Amoni lwali ni lwakingwa nizinguru.

²⁵ Maku avandu va Isiraeli vavugura madaala manene ga vandu va Amoni harara na madaala goosi gakumberiza Heshiboni na vandu vamenya mu.

²⁶ Heshiboni liali lidaala linene liu mwami Sihoni wa vandu va Amori, uwaali na lwaani nu mwami wukutanga wa vandu va Moabu, na yaali navuguyi kivala chichie choosi kutura ku mugera gwa Arinoni.

²⁷ Yicho nicho kigira vami ni vimba, “Hambi Heshiboni, mu lidaala liu mwami Sihoni! Kwenya kolole ni liumbakiywi uvuhia nukulilanyia kuli lialange.

²⁸ Kutura mu lidaala lia Heshiboni, liihi lia Sihoni liaza imbiri kuli umuliru. Liadiviza lidaala lia Ari mu Moabu, kandi liononyia vigulu vie Igulu wa Arinoni.

²⁹ Vudinyu ki yivu ku munyi avandu va Moabu! Munyi avasigamiraa va Chemoshi mumali kudivizwa! Munyasaye winyu yaleka avasaza ni viruka, Kandi avakali vagimilwa nu mwami wa vandu va Amoriti.

³⁰ Navuzwa kalunu visukululwi viavo vimali kudivizwa, vosi kutura Heshiboni kuduuka Diboni, kutura Nashimu kuduuka Nofa ahimbi Medeba.”

³¹ Kunangwa avandu va Isiraeli vamenya mukivala cha vandu va Amoriti.

³² Kandi Musa yatuma avasaza kuzia kuhenzeriza inzira indahi yu kwingilira lidaala lia Jazeri. Avandu va Isiraeli vaavugura lidaala harara na madaala ga likumberiza, kandi va kunga avandu va Amoriti avamenya mulio.

³³ Maku avandu va Isiraeli vagirung'ana ni vazia kunzira izizaa Bashani, kandi mwami Ogo wa Bashani yatura ni liihi lilie nazia kuvingilira ha Edirei.

³⁴ Yahova yavolera Musa, “Utamutia mba. Ndakokola umuguuti harara na vandu veve vosi kandi kivala chiche choosi. Umukolere agawakolela ku Sihoni umwami wa vandu va Amoriti wamihaa, Heshiboni.”

³⁵ Maku avandu va Isiraeli vita mwami Ogo, harara navayayi veve, kandi na vandu veve vosi ma ni vavugura kivala chiche.