Livalidza 20 - KITABU KITAKATIFU

Mazi Kutura ku Lwanda

¹ Ku mweli gwo kutanga vandu va Isiraeli vaduuka mwigendanyama lia Zini ma nivasosera ha Kadeshi. Hene yaho Miriamu yakuza nivamuyavira ho.

² Amazi sigali hokososera mba, kunangwa vandu vazia kukumberiza Musa na Haruni

³ ni vigaana nivavoora, “Ngano vwali vulahi kulakuzila imbiri wi Lihema lia Yahova harara na vandu va Isiraeli vache viitu.

⁴ Kigira ki umali kukuleta mwigendanyama yimu? Kuduuki kukuzira hano harara ni mitugu jitu?

⁵ Kigira ki wakutuliza Egebeti kukuleta mukivala cho vudinyu hi kindu kitamela? Hataveeye no vuswage, ni mizabibu na makuyu, kali hataveeye na mazi gu kunwa!”

⁶ Musa na Haruni visunda kutura ku vandu nivasingila muvwingiliru vwi Lihema. Vinaminya vweni vwavo kuduuka kumalova na vukumi vwa Yahova vwaloleka kuvo.

⁷ Yahova yavolera Musa,

⁸ “Vugula imbimbu eveeye imbiri we Lisandugu lia Malago maku yivi na Haruni muvungizi vandu. Ahene yaho imbiri wavo vosi, omolomere lwanda lula na mazi galasinuka kutura mulwo. Munzira yiyi ulaleeta mazi kutura mu lwanda ga vandu vanwa harara ne mitugu jaavo.”

⁹ Musa yazia navugura imbimbu kuli Yahova yamulaga.

¹⁰ Musa na Haruni vavungiza vandu imbiri wu lwanda, na Musa yavavolera, “Huliri munyi vahing'ani! Kunyala kutuliza mazi kutura mu lwanda yilu kigira munyi?”

¹¹ Kunangwa Musa yaginga imbimbu nakuya ku lwanda haali kaviri, nu mugela munene gwa mazi gwasinuka, kunangwa vandu vosi ni mitugu vanwa mazi.

¹² Navuzwa Yahova yagondokera Musa na Haruni, navoora, “Kigira muvuli kuva ne lisuuvira kuvugilira zinguru ziange zindakatifu imbiri wa vandu va Isiraeli, simulavimilira kuzia mu kivala cha ndavalaga mba.”

¹³ Yaga gekolekela ha Meriba ha vandu va Isiraeli vigaana kigira Yahova kandi hayavamanyila ndi aveeye mutakatifu.

Mwami wa Edomu Siyavugilira Vandu va Isiraeli Kuvita Mba

¹⁴ Musa yatuma vatumwa kutura Kadeshi kuzia ku mwami wa Edomu, ni vavoola, “Yaga na mang'ana kutura ku vamiitu vinyu, avandu vihiiri ya Isiraeli. Mumanyi vudinyu vwa kwasalira,

¹⁵ kuli vaguuga vitu vazia Egebeti, wa kwamenya mihiga minyingi. Vandu va Egebeti vadaamiza avaguuga viitu harara na kunye,

¹⁶ navuzwa kwalilira Yahova ahaane vokonyi kukunyi. Yahulira lilira lietu na yatuma engelosi wa kwimilira kutura Egebeti. Kalunu koveeye ha Kadeshi lidaala liveeye kulwako ni kivala chicho.

¹⁷ Nuyanza vugilira kuvitiri mu kivala chicho. Kunyi harara ni mitugu jitu si kulaleka inzira anoho kuzia mu milimi jinyu ja makuyu mba, kandi sikulanwa mazi kutura mu vidaho vienyu mba. Kulagenda kunzira kuduuka lwa kutura mu kivala chicho.”

¹⁸ Navuzwa vandu va Edomu vativura nivavoora, “Kusuuyi kuleka munyi kuvitira mu kivala chiitu! Niiva mulageliza kulaaza kulwaana ni munyi.”

¹⁹ Avandu va Isiraeli vavoola, “Kulagenda kumbalabala vuzwa, na niiva mitugu jietu noho kunyi vene kunwa ku mazi ginyu kulatunga, chakwenyaa ni kuvitira mukivala chicho.”

²⁰ Avandu va Edomu vilanila nivavoora, “Kwa kusura!” Na vazia ichova ni liihi linene kulwaana vandu va Isiraeli.

²¹ Kigira vandu va Edomu sivavugilira vandu va Isiraeli kuvitira mu kivala chavo mba, vandu va Isiraeli vagirung'ana nivavitira munzira yindi.

Likuza lia Haruni

²² Avandu vosi va Isiraeli vaatura Kadeshi nivaduuka ha kiguru cha Hori,

²³ keveeye kulwako lwa Edomu. Hene yaho Yahova yavolera Musa na Haruni,

²⁴ “Haruni sialazia kwingira mu kivala cha ndalaga vandu va Isiraeli mba; azizaa kukuza kigira munyi vombi mwibaara ku malago gange ha Meriba.

²⁵ Vugula Haruni nu mwana weve muyaayi Elieza muzie mu kiguru cha Hori,

²⁶ muduuki yo, utulize zinguvu zio vusaalisi zia Haruni na uviiki mwana weve Elieza. Haruni azizaa kukuzira hene yaho.”

²⁷ Musa yakola ga Yahova yamulaga. Vazia mu kiguru cha Hori imbiri wa vandu vosi;

²⁸ Musa yaatuliza ku Haruni zinguvu zio vusaalisi naviika muyaayi weve Elieza. Haruni yakuzira mu kiguru, navuzwa Musa na Elieza vasulunguta kutura mu kiguru nivilana.

²⁹ Avandu vosi vamanya ndi Haruni ukuzi na vamusiomera madiku 30.