Livalidza 19 - KITABU KITAKATIFU

Muluka Gwu Kutakasa Vwoni

¹ Yahova yalaga Musa na Haruni,

² vahane ku vandu va Isiraeli amalago yaga. Valetele Musa na Haruni kemoli chakanyu kitaveeye nimbara, kandi kikiri kukola ku miyinzi.

³ Vahane kemoli yiki ku musaalisi Elieza. Kemoli yiki kilahilwa ichova wa hokososa ma kisinzwi imbiri wo musaalisi.

⁴ Maku Musaalisi Elieza avuguli ku masahi gacho ne kedete chiche nu kwuha haali saba imbiri wi lihema.

⁵ Kemoli kigima, harara ne kesero, inyama, masahi, nivyomunda visambwi imbiri wu musaalisi.

⁶ Maku avuguli musaala gwu mudalagwa, luvinu no mugoye mwakanyu no kuvisiuva mu mulilu.

⁷ Inyima wa yaga afuuyi zinguvu zizie, ma yisundulili amazi, maku anyala kwingira hokososa; navuzwa alava nakikiri mudamanu kuduuka hamugorova.

⁸ Umundu usambaa kemoli gamuduukira kandi afuuyi zinguvu zizie, kandi yisundulili amazi, navuzwa alava kandi mudamanu kuduuka ha mugolova.

⁹ Maku umundu uveeye mutakase alavungiza ligoke lie kemoli no kuliviika havundu hatakase ichova wa hokososa, valaviikila vandu va Isiraeli kulitumikira kolombera mazi gu kutuliza uvudamanu. Muluka yigu gokolwaa kigira kutuliza vwoni.

¹⁰ Umundu uvungiza ligoke yili gamuduukira afuuyi zinguvu zizie, navuzwa alava mudamanu kuduuka hamugorova. Lilago yili lilava ho ku ing'inga yiza ku vandu va Isiraeli vosi harara na vageni vamenyi hagati haavo.

Kudiira ku Mukuzu

¹¹ Mundu woosi udiira ku mukuzu alava mudamanu ku lwa madiku saba.

¹² Gaduukiraa mundu uyu yitakase na mazi gu kwitakasa ku lidiku lia kavaga no kulidiku lia saba maku alava mugasu. Navuzwa natitakasi ku madiku goosi, lia kavaga ne lia saba, sialava mugasu mba.

¹³ Uyu udiira ku mukuzu ma avuli kwitakasa alava mudamanu, kigira akikiri kwuhilwa mazi go kwitakasa. Uyu wononyia Lihema lia Yahova sialavalizwa kuva mulala ku vandu va Nyasaye mba.

¹⁴ Niiva mundu akuzila mu lihema, mundu uva naveeye mu ing'inga ye likuza noho mundu wingira mu alava mudamanu ku madiku saba.

¹⁵ Vuli kiju keveeye mulihema kitaveeye ne kikuniku kilava kidamanu.

¹⁶ Niiva mundu aladiira ku mundu umali kwitwa noho umali kukuza kuziiyi likuza lia kazozo, anoho mundu udiira ku vigumba vyo mundu wakuza anoho kudiira ku kilindwa, alava mudamanu ku madiku saba.

¹⁷ Kutuliza vudamanu, ligoke kutura ku kemoli chakanyu chasambwa kutuliza vwoni lilavugulwa nu kuvikwa mu inyingu na mazi malengeru kumedwa mu.

¹⁸ Lwokutanga, mundu musereeze alavugula luvinu, nukulwina mu mazi nu kwuha ku lihema ne vindu viosi viveeye mu, nu ku vandu vaali ni vaveeye mu. Lwa kaviri mundu uveeye musereeze aluhila uyu wadira ku vigumba viu mukuzu anoho muviri mukuzu, anoho kilindwa.

¹⁹ Ku lidiku lia kavaga nu kulidiku lia saba, mundu oveeye musereeze aluhila mundu oveeye mudamanu mazi. Alatakaswa kulidiku lia saba namali kufuuya zinguvu zizie no kwisundulira mazi, na alava musereeze lwi liuva liyera.

²⁰ Mundu uva naveeye mudamanu natitakasi, alava mudamanu kigira mazi gu kwitakasa ga kikiri kusundulwa kuye. Mundu uyu yonogonyia Lihema lia Yahova na sialavalizwa kuva mulala ku vandu va Nyasaye mba.

²¹ Gamuduukira mulindi malago mu zing'inga ziza. Mundu wuhaa mazi gu kwitakasa gamuduukira afuuyi zinguvu zizie, na uyu udiira ku mazi yaga alava mudamanu kuduuka ha mugolova.

²² Kindu choosi chu mudamanu adiira ku kilava kidamanu. Kandi mundu wundi udiira kucho alava mudamanu kuduuka hamugorova.