Livalidza 17 - KITABU KITAKATIFU

Imbimbu ya Haruni

¹ Yahova ya volera Musa,

² “Uvoolere avandu va Isiraeli vakohe zimbimbu 12, imbimbu indala kutura ku vuli mwimiliri wihiiri. Ong'ode lieta lia vuli mundu ku imbimbu yeeye

³ maku ong'ode lieta lia Haruni ku imbimbu isingiraa muvogono vwihiiri ya Levi. Ilavaho imbimbu ndala kuvuli mwimiliri wihiiri.

⁴ Muzihiiri mu Lihema liukuvuganiramu liange, mamuziviki imbiri wi lisandugu lia malago, ha nanzagane nimunyi.

⁵ Maku imbimbu yu mundu wa inzi mali kotovola ilamela. Munzira yiyi nda heliza lililira lia kazozo lia vandu va Isiraeli kigira Ive.”

⁶ Kunangwa Musa yamoloma ku vandu va Isiraeli, kandi vuli umwimiliri yamuha imbimbu kutura kuvuli ihiiri, ziosi ziali zimbimbu 12, kandi imbimbu ya Haruni yavikwa harara nazio.

⁷ Maku Musa yavika zimbimbu ziosi mu Lihema imbiri wi Lisandugu lia Malago ga Yahova.

⁸ Maku lidiku lia londaku lwa Musa yazia mu lihema, yalora imbimbu ya Haruni eveeye muvogono vwi ihiiri ya vandu va Levi yaali ne meri. Imbimbu yiyi yaali niyaavaye, nitulizi kimuli kandi niyaami amakuyu mengu!

⁹ Musa yavugula zimbimbu ziosi namanyia vandu va Isiraeli. Valora chaali kimali kwekoleka, na vuli mwimiliri yavugula imbimbu yeeye.

¹⁰ Yahova yavolera Musa, “Wilanyie imbimbu ya Haruni imbiri wi Lisandugu lia Malago. Lilava kuli lieganihiza ku avibaali va Isiraeli ndi valakuza niiva sivalaleka lielilira liavo.”

¹¹ Musa yakola kuli Yahova yamulaga.

¹² Avandu va isiraeli vavoolera Musa, “Kunangwa yiki nicho keheri chiitu!

¹³ Niiva sa mulala wisunda himbi ku lihema alakuza, maku vosi kuveeye kuli avakuzu.”