Livalidza 16 - KITABU KITAKATIFU

Liebaala lia Kora, Dazani na Abiramu

¹ Kora mwana wa Izihari kutura mu kiliango cha Kohazi wihiiri ya vandu va Levi, na vandu valala kutura muhiiri ya Rubeni kuli Dazani na Abiramu vana va Eliabu, na Oni muyaayi wa Pelezi, vibaara ni vahingila Musa.

² Harara navo vaaliho na vandu vandi va Isiraeli 250, vaali aviimiliri avatovolwa na vandu avamanyikana ligali, vazia nivasingira imbiri wa Musa.

³ Vavugana harara kuhing'ana na Musa na Haruni, nivavavoolera, “Munyi muvitiliri! Avandu vosi vaveeye avatakatifu, vuli mulala kuvo kandi Yahova aveeye harara navo. Kigira ki munyi mwekora kuva avanene vu muganda gwa Yahova?”

⁴ Lwa Musa yahulira yaga, yagwa hasi mamumama nasaara,

⁵ kandi yavolera Kora harara nu muganda gwigwe gwosi ndi, “Lidiku lia mugamba, Yahova alamanyia mundu oveeye weve; kandi oveeye mutakatifu, wayatovola, na alamukola yisundi ahimbi naye ku vwali.

⁶ Mukore yaga; muvuguli kiju chu muguva,

⁷ na mugamba muviiki kucho manda gu muliru kandi muviikiku kimuli kifunyaa umwayu imbiri wa Yahova. Mundu wa Yahova atovoraa, alava niye oveeye mutakatifu. Munyi avandu va Levi mukoli kuvita kegero.”

⁸ Musa yaazizagilira komoloma ku Kora, “Muhuliri munyi avandu va Levi!

⁹ Muganaganaa ni kindu kekekeeke ku munyi Nyasaye wa Isiraeli Umali kumutovola kutura mu vandu vosi va Isiraeli, nu kumuleeta himbi kuye mwene kunangwa muduuki kokora miyinzi mu Lihema lilie, kandi kusingila imbiri wa vandu nu kuvatumikira?

¹⁰ Umali kumuleeta harara na vandu va Levi vandi vosi himbi naye, navuzwa kalunu mugerizaa kandi konyoora uvusaalisi!

¹¹ Lwa wililiraa ku Haruni harara nu muganda gwugwo, gaveeye giligali ndi mwibaara ku yahova.”

¹² Maku Musa yatumana Dazani na Abiramu avayaayi va Eliabu, navuzwa vavoola, “Kunyi si kulaaza mba!

¹³ Yivi wakutuliza mukivala cha malova magunamu mu Egebeti kukwitira hano mwigendanyama! Kalunu yivi wenya kukwamiha!

¹⁴ Ivi siokoleeti mu kivala kigunamu noho kuhaana milimi kandi vizabibu kukunyi kuli miandu jitu mba. Kalunu ivi ogerizaa kukugaada sikulaza mba!”

¹⁵ Musa yaali nu vutima na yavolera Yahova, “Utavugilira vihaanwa via vandu yava valeta mba. Inzi ngikiri kwonelaku mundu woosi kuvo mba; kali ngikiri kuvugura ku kali ndala ku zibunda ziavo mba.”

¹⁶ Musa yavolera Kora “Mugamba ivi harara nu muganda gwugwo gwa vandu 250 gamuduukira muzie mu Lihema lia Yahova. Haruni alavayo kandi.

¹⁷ Vuli mulala ku munyi alavugula luju lwilwe lwu muliru, aviikiku kimuli maku avileete kuvwaali imbiri wa Yahova.”

¹⁸ Kunangwa vuli mundu yavugula luju lwilwe, naviikaku manda gu muliru, kandi naviikaku kimuli. Vazia nivasingila havwingiliru vwi Lihema harara na Musa kandi Haruni.

¹⁹ Maku Kora yavuganyia vandu vosi harara, kandi vasingira imbiri wa Musa na Haruni ha vwingiliru vwi Lihema. Nonoho uvukumi vwa Yahova vwaloleka ku vandu vosi.

²⁰ Yahova yavolera Musa na Haruni,

²¹ “Mwiyahuli kutura ku vandu yava, ninzi ndavadiviza vwangu ligali.”

²² Navuzwa Musa na Haruni vinama vweni vwavo nivudiira kumalova nivavoora, “O, Nyasaye, Ivi oveeye vutangiliru vwi livamwoyo lia vandu vosi. Lwu mundu mulala akolaa uvwoni, ulava nu vutima na vandu vosi?”

²³ Yahova yavolera Musa,

²⁴ “Ovoolere avandu visundi ihale na mahema ga Kora, Dazani na Abiramu.”

²⁵ Maku Musa harara na vimiliri va Isiraeli vazia ku Dazani na Abiramu.

²⁶ Musa yavolera vandu, “Musingiri ihale kutura ku mahema ga vandu vachamu yava, kandi mutadiiri ku kindu chavo mba. Nigataveeye ndio, mulitwa harara navo kigira vwoni vwavo vwosi.”

²⁷ Kunangwa visunda ihale kutura ku mahema ga Kora, Dazani, na Abiramu. Dazani na Abiramu vaali nivatuli ichova nivasingiyi ha vwingiliru ha mahema gaavo, harara na vakali na vana vaavo.

²⁸ Musa yavolera vandu, “Kugira yaga mulamanya ndi Yahova yamala kunduma kukola vindu yivi kandi sigaveeye kugira litovola liange kuvikola mba.

²⁹ Niiva vandu yava valakuza likuza lia kazozo vugira kuhevwa mageri kutura ku Nyasaye, ndavoora ndi Yahova siyanduma mba.

³⁰ Navuzwa niiva Yahova alakola kindu chokugenyia, ma lirova likunulwi no kuvamira harara ni viavaveeye navio, ma vingili mulirova nivaveeye mwoyo kuzia mukivala cha vakuzu, mulamanya ndi vandu yava vamali kusura Yahova.”

³¹ Nonoho lwayamala kumoloma lirova lia Dazani na Abiramu vasingira ku liavukana

³² nilivamila na vizinyumba ziavo harara na valondi vosi va Kora ni miandu jaavo josi.

³³ Kunangwa vazia mu malova mu kivala cha vakuzu nivaveeye mwoyo. Vamilwa harara ni miandu jaavo. Lirova liavakunika kandi nivagota.

³⁴ Avandu vosi va Isiraeli vaali ni vaveeye ho viiruka lwa vahulira lilira liavo. Vahanzuka nivavoora, “Yiruki! Lirova linyala kukumila kandi!”

³⁵ Maku Yahova yatuma muliru ma nigusamba vandu 250 avaari nivahaani kimuli ku vwali.

Zinju ziu Muliru

³⁶ Maku Yahova yavolera Musa,

³⁷ “Volera Elieza, mwana wu musaalisi Haruni atulizi zinju ziu mugasa kutura mu muliru gwakaa; ma asalanyie manda ihale kigira yizi ni zinju zindakatifu.

³⁸ Ziagwa zindakatifu lwa zialetwa ku vwali vwa Yahova. Kunangwa vugula zinju yizi kutura ku vandu viitwa kigira vwoni vwavo aveene, uziduyi zive zisahani zing'erere ma uzilombe zive ziu kufuma ku vwali. Yili lilava lieganihiza ku vandu va Isiraeli.”

³⁹ Kunangwa musaalisi Elieza yavugula zinju naaziduya niziva zisahani zinyerere kulomba kifuumilu chu vwali.

⁴⁰ Yaga gaali lieganihiza ku vandu va Isiraeli ndi mundu woosi utaveeye wi chisukululwi cha Haruni atiisunda himbi kuvwaali nu kusambira Yahova kimuli mba. Niiva alakola ndio aladivizwa kuli Kora na vandu veve. Yaga goosi gekoleka kuli Yahova yaali nalagi Elieza kuvitira ku Musa.

Haruni Yahonyia Vandu

⁴¹ Lidiku lialondaku, avandu vosi vigaana kigira Musa na Haruni nivavoora, “Mumali kwita valala ku vandu va Yahova.”

⁴² Lwa vaali ni vakivungikizana kugaya Musa na Haruni, viikivuka nivahenza wi Lihema lia Yahova liali na valora lilesi lifuumi lihema kandi valora vukumi vwaloleka kumanyia ndi Yahova yaali naveeye ho.

⁴³ Musa na Haruni vazia nivasingira imbiri wi Lihema,

⁴⁴ na Yahova yavolera Musa,

⁴⁵ “Singira ihale kutura ku vandu yava, na ndavadiviza lwene yilu!” Vombi vinama hasi, nu vweni vwavo vwaduuka kumalova,

⁴⁶ Musa yavolera Haruni, “Vugula zinju zizio ma uviiki ku manda mahiu kutura ku vwali kandi uviiki kimuli ku manda maku uzie vwangu nago mu vandu va Isiraeli ma uvakolere mwima gwu kwitakasa. Zia vwangu! Vutima vwa Yahova vumali koleta lidivizwa nu vulwaye vudamanu vumali kutanga.”

⁴⁷ Haruni yahulira, navugura zinju ziu muliru na zia hagati ha vandu vaali ni vaveeye. Lwa yalora ndi lukuzu lwali nilutangi yavika kimuli ku manda naakora mwima gwu kutakasa vandu.

⁴⁸ Lukuzu lwalekela, na Haruni yaatigalanasingi hagati ha vandu vaveeye mwoyo na vakuzu.

⁴⁹ Avandu vaakuza vaali 14,700, ni kutameedi ku vandu vaakuza kigira liebaala lia Kora.

⁵⁰ Lwu lukuzu lwali nilwakalekela, Haruni yirana ku Musa uwaali nasingiyi ha vwingiliru vwi Lihema.