Livalidza 15 - KITABU KITAKATIFU

Malago Kigira Lihaana Kisiuviriru

¹ Yahova yavolera Musa,

² haane amalago yaga ku vandu va Isiraeli lwa vaduuka mu kivala cha yalaga alavaha vamenye mucho:

³ Vahane ku Yahova igiriki, ligondi limigu, ligondi noho imburi vinyala kuhaanwa kuli vihaanwa viu kusambwa, noho vihaanwa viu kuduukiza liesuuha anoho kihanwa chu vuyanzi anoho kihanwa chi lisavo lia kazozo. Lifunya liu mwayu mulahi gwi vihaanwa yivi lilayaanziza yahova.

⁴ Maku mundu woosi uhaana kihanwa chi ligondi noho imburi ku Yahova, alahaana harara nu uvusie vwu vuswage kiloguramu ndala uvuzuganyiywi mu na maguta lita ndala:

⁵ harara na vuli ligondi limigu lie kihanwa chu kusambwa alahaana kandi iwaini ilita indala eve kuli kihanwa chu kunwa.

⁶ Lwa muhaana ligondi limigu, mulahaana harara nu vusie vwu vuswage zikiloguramu 2 vuzuganyiywi mu na maguta ilita indala ni inusu,

⁷ harara ni lita ndala ninusu yiwaini. Lifunya liu mwayu mulahi gwi vihaanwa yivi liyaanziza Yahova.

⁸ Lwa muhaana igiriki eve kuli kihanwa chu kusambwa ku Yahova, noho kuli kihanwa chu kuduukiza liesuuha, anoho kihanwa chi mirembe,

⁹ mulahaana harara nu vusie vwu vuswage zikiloguramu 3, uvuzuganyiywi mu na maguta zilita 2,

¹⁰ harara niwaini zilita 2. Lifunya liu mwayu mulahi gwi vihaanwa yivi liyaanziza Yahova.

¹¹ Yivi nivio via muhaana harara na vuli igiriki, ligondi limigu, ligondi noho imburi ekole.

¹² Livaliza lie vindu yivi, lilameedeka kolondekana ni livaliza lie vihaanwa via muhaana.

¹³ Vuli mundu woosi wivulwa ku vandu va Isiraeli, alakola gene yaga lwa aleetaa kihanwa chi viukulia ekeveeye ni lifunya liu mwayu mulahi liyaanziza Yahova.

¹⁴ Niiva mugeni woosi omenyi hagati hinyu mu makura ginyu goosi, na aveeye ni lienya kuhaana kihanwa chu kusambwa, ekeveeye chi lifunya liu mwayu mulahi liyaanziza Yahova, alakola ndio kolondekana na malago yaga.

¹⁵ Avandu vosi harara na vageni vamenyi hagati hinyu, valava na malago malala mere. Munyi vosi harara na vageni vamenyi hagati hinyu mulava kindu kilala imbiri wa Yahova.

¹⁶ Malago malala mere galava ku munyi kandi ku vageni vamenyi hagati hinyu.

¹⁷ Yahova yavolera Musa,

¹⁸ ahaane amalago yaga ku vandu va Isiraeli lwa vaduuka mu kivala cha Yahova yalaga alavaha vamenye mu:

¹⁹ Lwa mulia ku viukulia vie kivala yiki, muvuguli kidieli kilala muhaane ku Yahova, keve kuli kihanwa kuye.

²⁰ Lwa mulomba migadi, mugadi gwu kutanga gwa mulomba kutura ku viukulia vienyu ivihia, muhaane ku Yahova gove kuli kihanwa kuye. Mulahaana kuli uvuswage vwa muhulaa koloze.

²¹ Ku viukulia vienyu viosi viu kutanga, mulahaana kidieli kilala ku Yahova keve kuli kihanwa kuye. Mulakola ndio kali kuduuka ku visukululwi vienyu viosi.

²² Navuzwa niiva mulala ku munyi alakola vwoni vugira kumanya, kandi avuli kolonda malago ga Yahova amali kuhaana ku Musa;

²³ kandi niiva vandu valavula kokora goosi ga Yahova amali kulaga kuvitira ku Musa madiku gaaza,

²⁴ kandi niiva yaga galakolwa vugira vandu kumanya, maku valahaana igiriki esoleri eve kuli kihanwa chu kusambwa, keveeye ni lifwunya liu mwayu mulahi guyaanzizaa Yahova. Mulahaana harara ni kihanwa chu vuswage kandi kihanwa chiwaini. Komeedaku, mulahaana kandi imburi ekole eve kuli kihanwa chu vwoni.

²⁵ Musaalisi alakola muluka gwu kukunika vwoni vwa vandu va Isiraeli. Valasamifwa, kigira gaali mahiolo ga vaakora vugira kumanya, kandi vamali koleta vihaanwa viavo viu vwoni, kandi vihaanwa viu kusambwa imbiri wa Yahova.

²⁶ Avandu vosi va Isiraeli harara na vageni vamenyi hagati haavo, valasamifwa kigira vuli mundu yakola mahilo yaga vugira kumanya.

²⁷ Niiva mundu alakola uvwoni vugira kumanya, alahaana imburi isuveni yu muhiga mulala eve kuli kihanwa chu vwoni.

²⁸ Musaalisi alakola muluka gwu kutakasa uvwoni vwu mundu uyu ku vwali, naye alasaamifwa.

²⁹ Malago yaga galatumika ku vuli mundu okola uvwoni vugira kumanya; ave mundu wa Isiraeli noho mundu mugeni amenyi hagati haavo.

³⁰ Navuzwa mundu woosi naava nasaavira kokora uvwoni, ave mundu wa Isiraeli noho mundu mugeni omenyi hagati haavo, alaloleka kuva onyegi Yahova, kandi aliitwa,

³¹ kigira umali kolegeriza likuva lia Yahova, kandi umali kuvunaga malago geege. Mundu uyu aliitwa kigira uvwoni vwivwe umwene.

Mundu Uvunaga Lilago lie Lisabato

³² Lwa vandu va Isiraeli vaali nivakikiri muchangalangwe, mundu mulala yanyooleka navungizaa zingu ku lidiku lie Lisabato.

³³ Vamuvugura nivamuhila ku Musa, Haruni harara na vandu vosi va Isiraeli.

³⁴ Vamuvika mu vuhambe kigira vaali nivakikiri kumanya chavakola kuye.

³⁵ Maku Yahova yavolera Musa, “Mundu uyu gamudukira yitwi. Avandu vosi valamulasa magina ichova wa hokososa.”

³⁶ Kunangwa vamuhira ichova wa hokososa ma nivamulasa na magina kuduuka nakuza, kuli Yahova yaali nalagi Musa.

Amalago Kigira Uvuyusi

³⁷ Yahova yavolera Musa,

³⁸ avolere avandu va Isiraeli ndi, “Mulombe uvuyusi ku magemo gi zinguvu zienyu, ma muviiki mugoye gwi bulu ku vuli luyusi. Mulakola ndio kali nu kuvisukululwi vienyu viosi.

³⁹ Uvuyusi yivu vulava kuli chukwizuliziraku, vuli ing'inga yoosi lwa muheezaa kuvwo, mulizuliza kandi nukutia malago gange. Maku munyi si mulagirung'ana kutura ku inzi nokolonda zinzira zienyu kandi zing'anagani zienyu aveene mba.

⁴⁰ Kunangwa uvuyusi yivu vulamwizuliza kugumira malago gange, kandi mulava vatakatifu ku inzi.

⁴¹ Inzi mbeeye Yahova Nyasaye winyu, wamutuliza mu kivala cha Egebeti kuva Nyasaye winyu. Inzi mbeeye yahova Nyasaye winyu.”