Livalidza 14 - KITABU KITAKATIFU

Avandu vililira kandi vibaara

¹ Maku uvudiku vwosi avandu vaalira novovereri ligali.

² Vililira ku Musa na Haruni nivavoora, “Vwali vove vulahi kunyi kukuzira mu Egebeti noho kukuzira hano mwigendinyama!

³ Kigira ki Yahova akuhilaa mu kivala yiki? Kunyi kulitilwa mu vulwani, avakali viitu na vana viitu valagumirwa. Si vwakaveeye vulahi kunyi kwirana Egebeti?”

⁴ Kunangwa vavolerana aveene na vene, “Gendi kotovole mwimiliri ma kwirane Egebeti!”

⁵ Maku Musa na Haruni vinama hasi imbiri wa vandu vosi va Isiraeli.

⁶ Joshua muyaayi wa Nuni na Kalebu muyaayi wa Jefune, avaari valala ku vatunyirizi, vatandula zinguvu ziavo mu vovereri.

⁷ Vavoolera avandu, “Kivala cha kwazia mu kutunyiriza keveeye kilahi ligali.

⁸ Niiva kulayaanziza Yahova alakuhila wene yeyo, alahaana kivala yiki ku kunyi, ekeveeye kigunamu kandi kenoru.

⁹ Mutahing'ana na Yahova mba, kandi mutatia vandu vamenyi mu kivala yiki mba. Kulavaguuta ligali. Yahova aveeye harara ni kunyi kandi amali kuguuta avanyasaye vaavo avavakingaa. Kunangwa mutatia mba.”

¹⁰ Navuzwa vandu vosi vavolerana nivalohiza kuvalasa na magina nukuvita. Nonoho avandu valora uvukumi vwa Yahova vong'ereng'anaa ku Lihema.

Musa Yasaalira Vandu

¹¹ Yahova yavolera Musa, “Avandu yava valasura kuduuka ing'inga ki? Valavula kusuvira kuduuka ing'inga ki, kali niiva mali kokora vilolekizu vinyingi hagati haavo?

¹² Ndaleta uvulwaye vudamanu kuvo na ndavadiviza ligali. Navuzwa ndakora ivi kuva baba wihiiri enene ligali kandi yi zinguru kuvavita.”

¹³ Navuzwa Musa yavolera Yahova, “Ivi waleeta vandu yava kutura Egebeti ni zinguru zizio. Lwa vandu va Egebeti vahulira ndi ivi umali kudiviza vandu vovo,

¹⁴ valavoolera vandu vamenyi mu kivala yiki. Avandu yava vamali kuhulira ndi ivi, Yahova, oveeye harara ni kunyi; kandi ololekaa moni na moni lwa malesi googo gaveeye ku kunyi, kandi wimiraa imbiri wiitu mu munara gwi lilesi mung'inga yu muvasu kandi mu munara gwu muliru mu ing'inga yu vudiku.

¹⁵ Kalunu niiva uliita avandu vovo vosi, zihiiri zimali kuhulira luyali lulwo zilavoola

¹⁶ ndi, ivi umali kwitira vandu vovo mu changalangwi kigira siwanyala ku valeta mu kivala cha walaga ulahaana kuvo mba.

¹⁷ Kunangwa kalunu, O, Yahova, ngusaala nuyanza haana zinguru zizio ku kunyi kandi okole aguwalaga kunyi lwa wavoola,

¹⁸ ‘Inzi Yahova mbeeye wa galaha ku vutima: Manyia uvuyanzi vonene kandi vusuuvirifu vutaveeye ne keheri, kandi samiiha uvwoni kandi samiiha yavo vibaara. Navuzwa ndahaana mageri ku vana kandi aviisukulu kuduuka ku likula lia kavaga ni lia kane kigira uvwoni vwa vaguuga vaavo.’

¹⁹ Kalunu Yahova, ngusaala nuyanza usamihi uvwoni vwa vandu yava, kolondekana nu vuyanzi vuvwo vutaveeye ne keheri, kuli wavasamiiha kutura ing'inga ya vaatura Egebeti.”

²⁰ Yahova yativura, “Inzi ndavasamiiha kuli umali koteeva.

²¹ Navuzwa ndagaa ndi, ligali kuli inzi mbeeye Yahova omenya, kandi ligali kuli uvukumi vwange vwizuyi mu lirova liosi,

²² siaveeyeho mundu kali mulala ku vandu yava uliduuka mu kivala yiki mba. Vamali kolola uvukumi vwange kandi vilolekizu viange via ndaakola mu Egebeti kandi mu changalangwi, navuzwa vamali kogeliza liekuzira liange haali kanyingi kandi vasuyi kumbulira.

²³ Si valaduuka mu kivala cha ndisuuhira avaguuga vaavo mba. Siaveeye ho kali mulala ku vandu vamali kusuura yava uliduuka mu kivala yiki mba.

²⁴ Navuzwa mutumikiri wange Kalebu kigira aveeye ni liiva lugano kandi aveeye musuuvirifu ku inzi, ndamuleeta mu kivala chamali kuzia mu nu kutunyiriza, kandi visukululwi vivie vilavugula kivala yiki.

²⁵ Kigira Avamaleki na Vakanani avamenyi mu mavoona gi kivala yiki, mugirung'ane mugamba na muzie mu changalangwi kuvitira kunzira izizaa ku inyanza Inzakanyu.”

Yahova Yahaana Mageri ku Vandu va Isiraeli

²⁶ Yahova yavolera Musa na Haruni,

²⁷ “Avandu vachamu yava vililira ku inzi kuduuka ing'inga ki? Inzi mali kuhulira lilira linyingi lia vandu va Isiraeli vililira ku inzi!

²⁸ Kalunu uvavoolere, ‘Nzisuha ndi, ligali kuli inzi mbeeye omenya, ndakokolera kuli umali koteeva. Inzi Yahova mali kovora.

²⁹ Munyi vosi mulakuza na miviri jinyu jilasalanywa mu changalangwi yiki. Kigira mumali komoloma makuva madamanu ku inzi, siaveeyeho kali mulala ku munyi kutura ku mihiga 20 kuzizagilira uliduuka mu kivala yiki;

³⁰ Ndaamulaga komenya mucho, navuzwa siaveeyeho kali mulala ulimenya mucho nitali Kalebu muyaayi wa Jefune na Joshua muyaayi wa Nuni.

³¹ Navuzwa vana vinyu avamwavoola valagumirwa, ndavaviika mu kivala cha mumali kusuura yiki, na kilava chavo.

³² Munyi mulakuzira hano muchangalangwe.

³³ Avana vinyu valagendagenda mwigendanyama ku mihiga 40. Valasalira kigira livula kusuvira liinyu, kuduuka lwa vosi mukuzira mwigendanyama.

³⁴ Mulanyola mageri ku mihiga 40 kigira uvwoni vwinyu. Muhiga mulala gulava kuvuli madiku 40 aga mwatunyiriza kivala. Nandio munyi mulamanya uvutima vwange ku munyi!

³⁵ Inzi mali kwisuuha ndi, ndakora yaga ku munyi avandu vaveeye avachamu, avamali kuvunga harara kovora makuva madamanu ku inzi. Munyi vosi mulakuzira hano mwigendanyama. Inzi Yahova mali kovora.’ ”

³⁶ Kunangwa avandu va Musa yaali natumi kuzia kutunyiriza kivala, valeta makuva madamanu kutura mucho ni vakora avandu vosi nivatanga limoloma vudamanu ku Yahova.

³⁷ Avandu yava, avaleeta makuva madamanu kigira kivala yiki, Yahova yaviita vosi nu vulwaye uvudamanu ligali.

³⁸ Navuzwa Joshua muyaayi wa Nuni na Kalebu muyaayi wa Jefune vaahona ku yavo avaari avandu 12 avaazia kutunyiriza kivala.

Ligeriza liu Kutanga Kwingilira Kivala cha kanani

³⁹ Lwa Musa yavolera vandu va Isiraeli vosi amakuva ga Yahova yaali navooye, vasioma vululu.

⁴⁰ Mugambazuri vazia kwingilira kivala chi kiguru, vavoola, “Kalunu kwetegeki kuzia havundu ha Yahova yakovolera. Kwiyama ndi kumali kokora uvwoni.”

⁴¹ Navuzwa Musa yavoola, “Kigira ki si muvura kutia lilaga lia Yahova? Munyi si mulaguuta mba!

⁴² Mutazia mba kigira Yahova siaveeye ni munyi mba. Avasigu vinyu valamuguuta.

⁴³ Lwa mutanga vulwani na vandu va Amaleki na Kanaani, munyi mulakuzira mu vulwani, kigira mwasuura kolonda lilaga lia Yahova. Yahova sialava harara ni munyi mba.”

⁴⁴ Navuzwa vahindagiriza kuzia kondongozi kwi kivala chi kiguru, kalindio Lisandugu lie Lilagana lia Yahova noho Musa siyatula havundu ho kososa mba.

⁴⁵ Maku avandu va Amaleki na vandu va Kanaani avamenyaa ku kiguru yiki vaza ni vavalwaana kandi nivavaguuta. Vavalondelera kali kuduuka Horima.