Livalidza 12 - KITABU KITAKATIFU

Miriamu Yahevwa Mageri

¹ Miriamu na Haruni vatanga komonya Musa kigira yaali naleti mukali Mukushi.

² Vateva, “Ligali Yahova umali komoloma kuvitira ku Musa yeng'ine? Siamali komoloma kuvitira ku kunyi kandi?” Yahova yahulira limoloma liavo.

³ Musa yaali mundu muhooma ligali kuvita vandu vandi vosi mu lirova.

⁴ Nonoho Yahova yavolera Musa, Haruni na Miriamu, “Nyenya munyi vavaga muturi mu Lihema liange liu kuvuganiramu.” Navo vatura ichova.

⁵ Maku Yahova yaloleka kuvo mu lifwana liu munara gwi lilesi, ma nasingira ha vwingiliru vwi Lihema. Yalanga, “Haruni! Miriamu!” Vombi vazia imbiri wa Yahova.

⁶ Maku Yahova yavoola, “Muhuliri kalunu makuva gange! Lwu muporofeti aveeye hagati hinyu, inzi Yahova ndolekaa kuye mu malola, kandi moloma kuye mu maloto.

⁷ Gaveeye lugano lwa inzi molomaa nu mutumikiri wange Musa. Inzi mali kumutovola ave mwimiliri wa vandu vange Visiraeli vosi.

⁸ Kunangwa inzi molomaa naye moni na moni, kandi vulahi ligali, na sigaveeye mu zing'ano mba; kali amali kolola liiva liange! Gaveeye ki munyi komonya mutumikiri wange Musa?”

⁹ Yahova yaali nu vutima na Miriamu harara na Haruni; kunangwa yatura kuvo.

¹⁰ Lwi lilesi liatura ku Lihema, nonoho muviri gwa Miriamu gwaali nu vulwaye vwo vogere, kandi gwagilung'ana ni gugwa mulavu kuli likonza. Lwa Haruni yahenza nalora Miriamu aveeye novogere,

¹¹ yavolera Musa, “Mwami wange, nuyanza utahaana mageri kukunyi kigira kokoli uvusiru kandi uvwoni mba.

¹² Utaleka Miriamu ave kuli mwana wivuliiywi nakuzi, wulovega lulala lwu muviri gwigwe lumali kulivwa mba.”

¹³ Kunangwa Musa yanira ku Yahova, “O, Nyasaye, yaanza ohonyie Miriamu!”

¹⁴ Yahova yativulira Musa, “Baba weve alava niyamutuzira mate mu moni mwimwe, yaali yakaveeye mu zisoni ku madiku 7. Kunangwa Miriamu yahilwa ichova wa havundu hu kwivungikiza ku madiku 7. Inyima wa madiku yaga, anyala kwirana.”

¹⁵ Kunangwa Miriamu yaali ichova wa havundu hokososa ku madiku 7. Lwene yilu, avandu va Isiraeli si vazizagilira nologendo lwavo mba, kuduuka lwa Miriamu yiranywa.

¹⁶ Maku avandu vataanga logendo kutura Hazerozi ma nivalomba havundu hokososa mu changalangwi cha Parani.