Livalidza 11 - KITABU KITAKATIFU

Avandu va Isiraeli Vililira

¹ Avandu va Isiraeli vatanga kwililira ku Yahova kigira uvudinyu vwavo. Lwa Yahova yahulira lielilira liavo, yaali nu vutima, maku Yahova yatuma muliru hagati ha vandu. Muliru gwasamba kandi nigudiviza luvega lulala kundulu hokososa haavo.

² Lwa vandu vanira ku Musa konyoora ovokonyi, Musa yasaala ku Yahova, nu muliru gwasima.

³ Kunangwa havundu yaaha halangwa Tabera, kigira muliru gwa Yahova gwakaa hagati ha vandu.

Musa Atovoraa Aviimiliri 70

⁴ Vaaliho avageni vandi kologendo harara na vandu va Isiraeli. Vaali ni liegomba linene kulia inyama; kali avandu va Isiraeli vene vatanga kwililira nivavoora: “O, kwakaveeye ninyama kwalia!

⁵ Kwizulizaa zisuzi zia kwalizaa mu Egebeti vugira mitungu; kandi amahondo, amungu, vitunguulu harara ni zinguza zing'ano ziosi.

⁶ Navuzwa kalunu zinguru zietu zifweye. Sikoveeye ni kindu cha kunyala kulia mba, nitali kuliiza vuzwa mana vuli lidiku!”

⁷ Mana yaga gaaleng'anaa nuvuguza vwo volo, na galoleka kuli ihura.

⁸ Avandu va Isiraeli vazizaa himbi nivavungiza mana yaga. Vagasiera ku zing'ina, kandi nivagaduyira mu vinu; ma nivagadeekera mu zinyingu; ma nivalomba uvuchima kugo. Ovonolu vwago vwali kuli lizazama lie kindu kikarangiziywi na maguta ga muzeituni.

⁹ Lwi lime liagwizaa vudiku havundu hokosasa, mana kandi gagwizaa harara ni lime.

¹⁰ Musa yahulira vandu vosi nivililira nivivungikizi mu viduma ha vwingiliru vwa mahema gaavo. Musa yavihilirwa kigira Yahova yaali nu vutima navo.

¹¹ Musa yateeva Yahova, “Kigira ki ongoleeye vudamanu kuli ndi? Kigira ki si uyanziziywi ninzi? Kandi kigira ki umali kuviika vuliduhu vwa vandu yava vosi ku inzi?

¹² Inzi sindavalomba noho sindavivula mba! Kigira ki omboleraa mbagingi mu makono gange kuli avana vadoto; nukuvahila mu kivala cha wisuhira avaguuga vaavo?

¹³ Inzi nyara konyoora hayi inyama iduuka avandu yava vosi? Vanira ku inzi nivateeva mbahe inyama.

¹⁴ Inzi si nyara kulinda vandu yava vosi mba, kigira vaveeye musigo muliduhu ku inzi!

¹⁵ Niiva ulangolera kuli ndio, ndakayanzi unziti kalunu ndi, kunangwa uvuli kongolera uvudamanu kandi mba.”

¹⁶ Yahova yavolera Musa, “Uvuganyie harara avasaza vu luyali 70, avamanyikana kuli aviimiliri va vandu. Uvalete ku inzi imbiri wi lihema liange liu kuvuganiramu, kandi uvavoolere vasingiri harara na ivi.

¹⁷ Inzi ndaza kumoloma nivi hene yaho, kandi ndavugura ku Roho oveeye ku ivi nu kuvaha. Maku valakokonya kulinda vandu yava, kunangwa uvuli kuginga vuliduhu yivu weng'ine.

¹⁸ Kalunu ovoolere avandu, ‘Mwitakase aveene kigira lidiku lia mugamba; mulanyola inyama ya mulia. Yahova umali kuhulira lianira lienyu ndi niiva mwakaveeye ninyama mwalia, kandi mwakahuliye vulahi nimwakaveeye mu Egebeti. Kalunu Yahova alahaana inyama ku munyi na mulalia.

¹⁹ Simulagilia ku lidiku lilala, noho madiku gaviri, noho madiku gatano, noho madiku 20,

²⁰ navuzwa mulagilia ku mweli gwosi, kuduuka, lwimusinya. Yaga galekoleka kigira mumali kusura Yahova oveeye harara ni munyi, kandi mumali kwililira ndi vwakaveeye vulahi mulavula kutura Egebeti.’ ”

²¹ Musa yavolera Yahova, “Avandu vaveeye kologendo mu vwimiliri vwange ni 600,000, na ivi ovola ulavaha inyama valie ku mweli gwosi?

²² Unyala kuvasinzila zing'ombe na magondi kunangwa uvigutizi? Noho unyala kuvavungizira zisuzi ziosi ziu munyanza valie viguti?”

²³ Yahova yativulira Musa, “Zinguru ziange zinyala kogehizwa? Kalunu ulalora aga inzi mali kovora galekoleka anoho galavula kwekoleka!”

²⁴ Kunangwa Musa yatura ichova ma navolera avandu makuva ga Yahova yaali navooye. Yavuganyia avasaza 70 ku vimiliri vaavo, ma navaviika ku kumbiriza Lihema lia Yahova.

²⁵ Maku Yahova yaza ku Musa mu lifana lia Malesi, kandi yamoloma naye. Yavugula zinguru zia Roho zindala ku zia yaali nahaani ku Musa, nahaana ku vimiliri 70. Lwa vanyoola zinguru yizi, vatanga liporofeta, navuzwa si vamanya nivazizagilira mba.

²⁶ Avasaza vaviri ku vimiliri 70 Elidadi na Medadi, vaatigara havundu hokososa, na si vazia mulihema mba. Nivaveeye havundu hu kwivungikiza, vanyoola zinguru zia Roho, na vatanga kuporofeta.

²⁷ Musoleri mulala muyaayi yanyagura nazia kovoolera Musa ndi Elidadi na Medadi vaporofeta.

²⁸ Maku Joshua muyaayi wa Nuni, uwaali mukonyeleri wa Musa kutura mu vosooleri vwivwe, yavolera Musa, “Mwami wange, vagaye!”

²⁹ Musa yativura, “Oveeye nilikendeka kigira inzi? Ndakayanzi niiva Yahova yakaviiki Roho weve ku vandu veve vosi nukuvakola vosi avaporofeti!”

³⁰ Maku Musa harara na vimiliri 70 va Isiraeli viirana havundu hokososa.

Yahova Yatumaa Zisindu

³¹ Nonoho Yahova yaleeta imbuza harara ni zisindu kutura munyanza. Ziali zinyala kuburuka vuzwa imiita indala kuzia igulu. Ziayera havundu hokososa mu zimbega ziosi, himbi logendo lwi lidiku lilala.

³² Kunangwa lidiku liene yilio liosi, uvudiku vwosi kandi lidiku lialondaku, avandu vazia kuvungiza zisindu. Si yaliho nu mundu wavungiza hasi hi zikiloguramu 1,000 mba. Vaazivagala ku zimbega ziosi zia havundu hokososa ziduuki kwuma.

³³ Lwa vaali nivakikiri ninyama inyingi yu kulia, Yahova yaali nu vutima navandu. Yatuma vulwaye vudamanu kuvo.

³⁴ Kulwayago, havundu yaaha halangwa lieta “Kibirozi Hataava”, kigira vaayaviraho miviri ja vandu avaari ni likayirwa lie zinyama.

³⁵ Avandu vagenda kutura Kibirozi Hataava ni vazia Hazerozi nivalombaho havundu hokososa.