Livalidza 10 - KITABU KITAKATIFU

Visiliva vie Ifeza

¹ Yahova yavolera Musa,

² “Olombe visiliva 2 viu vutuli vwifeza, uvitumikiri kulanga vandu vivungikizi harara, kandi lwa vatanga logendo lwavo.

³ Lwa ukubaa visiliva viombi viviri, avandu vosi valivungikiza imbiri woovo, havwingiliru vwi Lihema.

⁴ Navuzwa lwa ukubaa kisiriva kilala, maku aviimiliri vi zihiiri zia Isiraeli valivungikiza aveene imbiri woovo.

⁵ Lwi likuba lie kisiriva lihulirika, zihiiri zievungikizi kolovega lwi Ivugwi zilatula nu kuzia.

⁶ Lwi likuba lie kisiriva lihulirika lwa kaviri, zihiiri zievungikizi kolovega lwi Isavaalu zilatula nu kuzia. Kisiriva kilakubwa kumanyia litula lie zihiiri.

⁷ Navuzwa kisiriva kilakubwa vudinyu kwaganyia vandu harara.

⁸ Vayaayi va Haruni musaalisi valakakubi visiliva. “Lilaga yili lilava ku ivi harara ni visukulwi vivio mihiga ni mihiga.

⁹ Lwamuzia kulwaana avasigu vamudambiza mu kivala chiinyu, maku mulakuba visiliva; ninzi Yahova Nyasaye winyu ndamukonya kandi ndamuhonyia kutura ku vasigu vinyu.

¹⁰ Kandi ku lidiku liu vusangali vwinyu, ing'inga yi lilia mu litanga lie mieli mihia, mulakuba visiliva lwa muhaana vihaanwa viu kusambwa kandi vihaanwa vie mirembe. Yivi vilava kuli lizuliza imbiri wa Nyasaye. Inzi mbeeye Yahova Nyasaye winyu.”

Avandu va Isiraeli Vaturaa ha Sinai

¹¹ Ku lidiku lia 20 mu mweli gwa kaviri muhiga gwa kaviri, vandu nivakamara kutura Egebeti amalesi gaturaa ku Lihema lia Yahova,

¹² na vandu va Isiraeli vatanga logendo kutura mwigendanyama lia Sinai. Amalesi yaga gaazia nigasingila mwigendanyama lia Parani.

¹³ Yiyi yaali ing'inga yu kutanga ya Yahova yavolera Musa alage avandu va Isiraeli kutanga logendo.

¹⁴ Muganda gwi lievungikiza lie ihiiri ya vandu va Yuda nivaviiki ebendera yaavo imbiri. Nashoni muyaayi wa Aminadabu yaali mwimiliri wi liihi liavo.

¹⁵ Netaneli muyaayi wa Zuari yaali mwimiliri wi liihi lie ihiiri ya vandu va Isakari.

¹⁶ Eliabu muyaayi wa Heloni yaali mwimiliri wi liihi lie ihiiri ya vandu va Zabuloni.

¹⁷ Maku, lwi Lihema liavikwa hasi, avayaayi va Gerishoni na vayaayi va Merari valiginga ni vatanga logendo.

¹⁸ Muganda gwi lievungikiza lie ihiiri ya Rubeni. Vaviika ebendera yaavo imbiri. Elizuri muyaayi wa Shedeu yaali mwimiliri wavo.

¹⁹ Shelumieli muyaayi wa Zurishadai yaali mwimiliri wi liihi lie ihiiri ya vandu va Simioni.

²⁰ Eliasafu muyaayi wa Deyeli yaali mwimiliri wi liihi lie ihiiri ya vandu va Gadi.

²¹ Maku avandu vi ihiiri ya Kohazi vaatura nivatanga logendo nivagingi viju vitakatifu; lihema liali ni liumbakwa imbiri wa vaali nivakikiri kuduuka hokososa handi.

²² Muganda gwi lievungikiza lie ihiiri ya Efuraimu vatura nivalonda muganda gwi ihiiri ya Rubeni mu viduma. Vaviika ebendera yaavo imbiri. Elishama muyaayi wa Amihudi yaali mwimiliri wavo.

²³ Gamalieli muyaayi wa Pedahizuri yaali mwimiliri wi liihi liehiiri ya Manase.

²⁴ Abidani muyaayi wa Gidioni yaali mwimiliri wi liihi lie ihiiri ya Benjamini.

²⁵ Mulimaliriza ku miganda je lievungikiza lie zihiiri ziosi, gwaali muganda gwi ihiiri ya Dani. Vaviika ebendera yaavo imbiri. Ahiezeri muyaayi wa Amishadai yaali mwimiliri wavo.

²⁶ Pagieli muyaayi wa Okirani yaali mwimiliri wi liihi lie ihiiri ya Asheri.

²⁷ Ahira muyaayi wa Enani yaali mwimiliri wi liihi lie ihiiri ya Nafutali.

²⁸ Yili liali lilohiza liologendo lwa vandu va Isiraeli, kolondekana ni miganda ji zihiiri zia mahi gaavo kuli vaatura nivatanga logendo

²⁹ Kunangwa Musa yavolera mukwasi weve Hobabu muyaayi wa Jezero kutura Midia, “Kunyi koveeye ahimbi kutanga ologendo kuzia mu kivala cha yahova yavoola, alakihaana ku kunyi. Hamba kuzie harara nive kulakokolera vulahi. Yahova umali kulaga vindu vilahi ku vandu va isiraeli.”

³⁰ Navuzwa Hobabu yativura navoora, “Inzi sindazia ni munyi mba. Ndirana mu kivala change kandi ku vandu vange.”

³¹ Musa yamuvolera, “Mwaza nuyanza utakoleka mba. Ivi umanya kuli kuziiza kwivungikiza mu changalangwi, na ulava kuli emoni yitu.

³² Niiva ulazia harara ni kunyi, choosi cha Nyasaye akukolera kilahi, alakokolera ivi kandi.”

Avandu Vatanga ologendo

³³ Kunangwa vandu va Isiraeli vatanga ologendo lwavo kutura ha kiguru kitakatifu cha Sinai vagenda ku madiku gavaga. Vasaalisi avagingaa Lisandugu lie Lilagana lia Yahova vazia imbiri wavo kwenyeleriza havundu ha vandu va Isiraeli vasosera.

³⁴ Amalesi ga Yahova gavakiinga ing'inga yu mbasu lwa vaatura havundu hokososa.

³⁵ Vuli ing'inga lwa vandu va Isiraeli vaatura kuzia ni lisandugu lie lilagana, Musa yavoola, “Yahova, singira usalanye vasigu vovo, kandi okole yavo avakudunyiraa viiruki!”

³⁶ Lwa vaduuka havundu hokososa, Musa yavoola, “O, Yahova, wirane ku zielefu zinyingi zia vandu va Isiraeli!”