Livalidza 1 - KITABU KITAKATIFU

Livaliza liu kutanga lia vandu va Isiraeli

¹ Ku lidiku liu kutanga liu mweli gwa kaviri, mu muhiga gwa kaviri, lwa vandu va Isiraeli vaali nivakatula Egebeti, Yahova yamoloma na Musa imbiri wi lihema lilie Liukuvuganira mu muchangalangwe cha Sinai. Yavoola,

² “Ivi harara na Haruni mulavaliza vandu va Isiraeli, kolondekana ni zihiiri kandi ni zinyumba ziavo. Ong'ode amita ga vasaza vosi

³ kutangira ku mihiga 20, avaveeye avadukiru kutumika mu vulwani.

⁴ Oteeve mwimiliri mulala munene kutura ku vuli ihiiri akokonye.”

⁵ Yaga na mita ga vimiliri vatovolwa kutura mu zihiiri kokora miyinzi yiji. Kutura mu ihiiri ya Rubeni yaali Elizuri muyaayi wa Shedeuri.

⁶ Kutura mu ihiiri ya Simioni yaali Shelumieli muyaayi wa Zurishadai.

⁷ Kutura mu ihiiri ya Yuda yaali Nashoni muyaayi wa Aminadabu.

⁸ Kutura mu ihiiri ya Isakari yaali Nazaneli muyaayi wa Zuari.

⁹ Kutura mu ihiiri ya Zabuloni yaali Eliabu muyaayi wa Heloni,

¹⁰ Kutura mu vana va Josefu, yatovola Efuraimu na Elishama muyaayi wa Amihudi; kutura mu ihiiri ya Manase yaali Gamalieli muyaayi wa Pedahizuri.

¹¹ Kutura mu ihiiri ya Benjamini yaali Abidani muyaayi wa Gidioni,

¹² kutura mu ihiiri ya Dani yaali Ahiezeri muyaayi wa Amishadai,

¹³ kutura mu ihiiri ya Asheri yaali Pagieli muyaayi wa Okirani,

¹⁴ kutura mu ihiiri ya Gadi yaali Eliasafu muyaayi wa Duyeli,

¹⁵ kutura mu ihiiri ya Nafutali yaali Ahira muyaayi wa Enani.

¹⁶ Yava nivo avatovolwa kutura mu muganda gwa aviimiliri vi zihiiri zia vaguuga vaavo vimiliri vi zihiiri zia Isiraeli.

¹⁷ Musa harara na Haruni vaavugura vandu yava, vamita gaavo gaali ni gang'odeywi.

¹⁸ Lidiku liu kutanga liu mweli gwa kaviri, vavuganyia vandu vene yava vosi harara, kandi nivag'oda, vandu vosi kolondekana ni zihiiri ziavo na vababa vaavo kandi ni zinyumba ziavo. Kutura ku mihiga 20 kuzizagilira vang'odwa kandi nivavalizwa.

¹⁹ Kuli Yahova yaali nalagi Musa. Kunangwa Musa yavaliza vandu vene yava vosi mwigendanyama lia Sinai.

²⁰ Kutura mu ihiiri ya Rubeni, waali wu kutanga ku vana va Yakobo, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo mulala sa mulala kolondekana ku ihiiri yaavo kandi zinyumba ziavo.

²¹ Amita ga vasaza kutura mu ihiiri ya Rubeni vaali avandu 46,500.

²² Kutura mu ihiiri ya Simioni, avasaza vosi avaari ni mihiga 20 kuzizagilira, avaari vanyara kuzia mu vulwani vaavalizwa kandi nivang'odwa mita gaavo mulala sa mulala kolondekana ni zihiiri ziavo kandi zinyumba ziavo.

²³ Avandu vosi kutura mu ihiiri ya Simioni vaali 59,300.

²⁴ Kutura mu ihiiri ya Gadi, avasaza vosi avaari ni mihiga 20 kuzizagilira, avaari vanyara kuzia mu vulwani, vang'odwa mita gaavo kolondekana ku zihiiri ziavo kandi zinyumba ziavo.

²⁵ Avandu vosi kutura mu ihiiri ya Gadi vaali 45,650.

²⁶ Kutura mu ihiiri ya Yuda, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo.

²⁷ Avandu vosi kutura mu ihiiri ya Yuda vaali 74,600.

²⁸ Kutura mu ihiiri ya Isakari, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo, kolondekana ni zihiiri ziavo kandi zinyumba ziavo

²⁹ Avandu vosi kutura mu ihiiri ya Isakari vaali 54,400.

³⁰ Kutura muhiiri ya Zabuloni, avasaza vosi avaari ni mihiga 20 kuzizagilira avaari vanyara kuzia mu vulwani, vang'odwa mita gaavo kolondekana ni zihiiri ziavo kandi zinyumba ziavo.

³¹ Avandu vosi kutura mu ihiiri ya Zabuloni vaali 57,400

³² Kutura ku vana va Josefu vi ihiiri ya Efuraimu, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo.

³³ Avandu vosi kutura mu ihiiri ya Efuraimu vaali 40,500.

³⁴ Kutura mu ihiiri ya manase, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo.

³⁵ Avandu vosi kutura mu ihiiri ya Manase vaali 32,200.

³⁶ Kutura mu ihiiri ya Benjamini, avasaza vosi avaari ni mihiga 20 kuzizagilira avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo.

³⁷ Avandu vosi kutura mu ihiiri ya Benjamini vaali 35,400.

³⁸ Kutura mu ihiiri ya Dani, avasaza vosi avaari ni mihiga 20 kuzizagilira, avaari vanyara kuzia mu vulwani, vang'odwa mita gaavo kolondekana ni zihiiri ziavo kandi zinyumba ziavo.

³⁹ Avandu vosi kutura mu ihiiri ya Dani vaali 62,700.

⁴⁰ Kutura mu ihiiri ya Asheri, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo.

⁴¹ Avandu vosi kutura mu ihiiri ya Asheri vaali 41,500.

⁴² Kutura ku ihiiri ya Nafutali, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo.

⁴³ Avandu vosi kutura mu ihiiri ya Nafutali vaali 53,400.

⁴⁴ Yava na vandu va Musa na Haruni vaavaliza nivanywa na vimiliri kutura mu vandu va Isiraeli avasaza likomi na vaviri, vuli mulala yasingiliraa inyumba ya baba weve.

⁴⁵ Avandu vosi va Isiraeli avaari ni mihiga 20 kuzizagilira, avaari vanyara kuzia mu vulwani vwa Isiraeli, vaavalizwa kolondekana ni zinyumba ziavo.

⁴⁶ Avandu vosi avavalizwa mu Isiraeli vaali 603,550.

⁴⁷ Navuzwa vandu vi ihiiri ya Levi si vavalizwa harara ni zihiiri zindi mba,

⁴⁸ kigira Yahova wavo yaali navoleeye Musa,

⁴⁹ “Lwa uvaliza avasaza avanyala kuzia mu vulwani, utavaliziramu ihiiri ya Levi mba.

⁵⁰ Havogono hene yaho, otovole ihiiri ya vandu va Levi vasingiliri Lihema liange harara ni viju vialio. Valaginga lihema yili harara ni viju vialio, vatumiki mulio, kandi vumbake havundu hokososera kundulu kwa lio.

⁵¹ Lwa mwisunda havundu handi avandu vi hiiri ya Levi valasambula lihema ma valigingi kuhila havundu hoosi hamuzia hahia, valiumbake kandi. Mundu woosi uzia himbi ni lihema yili aliitwa.

⁵² Avandu va Isiraeli valumbaka mahema gaavo mu miganda jaavo. Vuli mundu alava hokososera hehe mwene, hasi he bendera yeye.

⁵³ Avandu vi ihiiri ya Levi valumbaka havundu hokososera haavo kukumberiza lihema nukulilinda, kunangwa uvutima vwange vuvuli kuduuka ku livugana lia vandu va Isiraeli.”

⁵⁴ Kunangwa, avandu va Isiraeli vaakora vindu viosi kuli Yahova yaali nalagi Musa.