Litanga 9 - KITABU KITAKATIFU

Lilagana lia Nyasaye na Nuhu

¹ Nyasaye yagasiza Nuhu navayayi veve kandi navoora, “Mwivulane kandi mumedeke, kunangwa visukululwi vienyu vimenye mulirova liosi.

² Zinyama ziosi, manyonyi kandi zisuzi zilakamutie. Munyi mulakave nuvunyari kuzio ziosi.

³ Kalunu munyala kuzilia, kali nivitagwa. Inzi muheezaa viosi kuli iviukulia.

⁴ Kindu kilala ichamutalia mba ni inyama eveeye mu na masahi. Inzi ngaya yaga kigira masahi gafananyiangwa ni livamwoyo.

⁵ Niiva umundu woosi aliita wundi, alakahevwe mageri. Inzi ndakahaane mageri gi likuza ku inyama yoosi iyiita umundu.

⁶ Umundu yalombwa kuli lifwana lia Nyasaye, kunangwa mundu woosi wita wundu aliitwa ndio nuwache.

⁷ “Munyi kuduuka mwivulane kandi mudeeke, kunangwa visukululwi vienyu viemenye havundu hoosi mu lirova.”

⁸ Nyasaye yavolera Nuhu harara navayayi veve,

⁹ “Kalunu inzi nomba lilagana liange na munyi kandi nivisukululwi vienyu,

¹⁰ kandi nivindu viosi viveeye mwoyo - manyonyi goosi kandi zinyama ziosi - vuli kindu chatula muliato harara na munyi.

¹¹ Ku makuva yaga inzi nomba lilagana liange ni munyi: Inzi ndagaa ndi vindu viveeye mwoyo si viladivizwa ku nimigelera jamazi kandi mba. Migelera jamazi sijiladiviza ku lirova kandi mba.

¹² Kuli kelolero chi lilagana lihindira mihiga ni mihiga yili lianomba ni munyi kandi nivilombe viosi viveeye mwoyo,

¹³ inzi mbikaa kisaahi change mu malesi. Kilakave kelolero chi lilagana liange harara navandu vosi mu lirova.

¹⁴ Lwa inzi ngunika ligulu na malesi kandi kisaahi kololeka,

¹⁵ ndakizulizi lilagana liange ku munyi kandi ku zinyama ziosi ndi migelera jamazi si jilikadivizi ku kandi vindu viosi viveeye mwoyo mba.

¹⁶ Lwa kisaahi kililoleka mu malesi, inzi ndakakelole kandi ndakizulizi lilagana lihindira mihiga ni mihiga hagati ha inzi nivindu viosi viveeye mwoyo ku lirova.

¹⁷ Yicho nicho kelolero chi lilagana lianomba ku vindu viosi viveeye mwoyo.”

Nuhu na Vayaayi Veve

¹⁸ Avayaayi va Nuhu avaatura muliato vaali Shemu, Hamu na Jafeza. Hamu yaali baba wa Kanaani.

¹⁹ Avayaayi vavaga va Nuhu yava vaali avaguuga va vandu vosi ku lirova.

²⁰ Nuhu uwaali mulimi, yaali umundu wukutanga kusimika kizabibu.

²¹ Lwinyima lwa yaali niyakanwa iwaini yahambika, natuliza zinguvu zizie, kandi naagona mu lihema lilie naveeye chahonyo.

²² Lwa Hamu, baba wa Kanaani, yalora baba weve naveeye chahonyo, yatura ichova navolera avamwavo veve vaviri.

²³ Maku Shemu na Jafeza vaavugura isuuka ni vagingira kumavega gaavo. Vaziira mugongo kuduuka mu lihema ma ni vakunika baba wavo; vahenza lovega na sivalola chahonyo cha baba wavo mba.

²⁴ Lwa Nuhu yalava zimoni kutura mu lihambika, yamanya agu umwana weve mukekeeke yaali na koli,

²⁵ Yavoola, “Kilaamo keve ku Kanaani! Alakave mutugwa ku avamwavo veve.

²⁶ Haana lizominya ku Yahova, Nyasaye wa Shemu! Kanaani alakave mutugwa wa Shemu.

²⁷ Vwakaveeye vulahi Nyasaye akole Jafeza komeedeka mu vuhinda! Vwakaveeye vulahi visukululwi vivie vimenye na vandu va Shemu.” Kanaani alakave mutugwa wa Jafeza.

²⁸ Inyima wi migelera jamazi Nuhu yamenya mihiga 350

²⁹ kandi yakuza naveeye ni mihiga 950.