Litanga 8 - KITABU KITAKATIFU

Likama lie Migelera ja Mazi

¹ Nyasaye yizuliza Nuhu na vandu vinyumba yeeye, harara ni zinyama ziosi ziu muvulimu, mitugu, vimolaa viosi, kandi amanyonyi goosi gu mu ligulu gaali harara na Nuhu mu liato. Yakola imbuza kuhuuza ku lirova, na mazi gageeha.

² Nyasaye yigalira visenukiru via mazi isi wi lirova kandi madirisha gu mu ligulu. Imbura yalekera kukuba,

³ amazi gazizagilira kogeeha ku lirova. Inyima wa madiku 150, amazi gaali nigageehi.

⁴ Ku lidiku lia 17 liu mweli gwa 7, liato liasingira ku kiguru cha Ararati.

⁵ Amazi gazizagilira kogeeha, na ku lidiku liu kutanga liu mweli gwi 10, zindongozi zie vigulu zialoleka.

⁶ Inyima wa madiku 40, Nuhu yigula lidirisha lii liato,

⁷ kandi natuma lijikolo. Lijikolo yili silirana mba, navuzwa liaburuka yiyi niyi kuduuka mazi nigakama ku lirova.

⁸ Maku Nuhu yatuma likuulu kolola niiva mazi gageehi kulirova,

⁹ navuzwa likuulu si liali na havundu haliali linyala kusingila mba, kigira mazi gaali nigakiri ku lirova. Kunangwa likuulu lirana ku liato. Nuhu yanyira mukono gwigwe ma navugura likuulu naalivika mu liato.

¹⁰ Nuhu yalinda ku madiku gandi saba, ma natuma likuulu kandi.

¹¹ Likuulu lirana hamugorova niligingi liitu livisi lia muzeituni munwa mwalio. Kunangwa Nuhu yamanya ndi amazi gaali nigakami ku lirova.

¹² Maku Nuhu yalinda kandi madiku gandi saba, ma natuma likuulu lwa kaviri, navuzwa silirana mba.

¹³ Lwa Nuhu yaali ni mihiga 601, ku lidiku liukutanga ku mweli gwukutanga, amazi gaali gatangi kukama ku lirova. Nuhu yakunura liato nahenza ichova, na yalora mazi nigakami ku lirova.

¹⁴ Kuduuka ku lidiku lia 27 ku mweli gwa kaviri, lirova liumaa ligali.

¹⁵ Maku Nyasaye yavolera Nuhu,

¹⁶ “Tula mu liato harara nu mukali woovo, na vana vovo kandi na vakali va vana vovo.

¹⁷ Uvuguli vindu viosi viveeye ni livamwoyo viveeye harara na ivi zinyama ziosi, vimolaa, kandi amanyonyi goosi kunangwa viduuki kwivulana nokomedeeka ku lirova.”

¹⁸ Kunangwa Nuhu yatura mu liato harara nu mukali weve, avana veve kandi na vakali va vana veve.

¹⁹ Yavugula kandi zinyama ziosi ziu muvulimu kandi nivimolaa ku lirova, kandi amanyonyi goosi kolondekana ku lugano lwa vuli kilombe viatula mu liato.

Nuhu Yahaana Kisiuviriru ku Nyasaye

²⁰ Nuhu yumbakira Yahova uvwali. Yavugula inyama indala inifu ku vuli zinyama ziosi, kandi linyonyi lilala lilahi ku vuli amanyonyi goosi, ma nasambira ku vwali kuli kihanwa ku Yahova.

²¹ Umwayu gwi kisiuviriru gwayaanziza Yahova, na yavoola, “Inzi si ndalaama lirova kigira likora liu umundu mba. Inzi manya ndi umundu aveeye ni zing'anagani zindamanu kutura ing'inga ya yaali mwana. Inzi si ndadiviza vindu viosi viveeye ni livamwoyo kuli mali kokora mba.

²² Ku ing'inga lwi lirova likikiliho, ilavaho ni ing'inga yu kutaga, kandi ing'inga yo kogesa. Ilavaho kandi ing'inga yu vukindu kandi ing'inga yu luya, ing'inga yu vukindu, ing'inga yu umbasu, kandi umbasu nu vudiku. Zing'inga yizi ziosi si zilahera mba.”