Litanga 7 - KITABU KITAKATIFU

Migelera ja Mazi

¹ Maku Yahova yavolera Nuhu, “Zia mu Liato harara na vandu vinyumba yooyo vosi, kigira mali kolola ndi ivi oveeye mundu mulungi imbiri wange hagati hi likula yili.

² Uvuguli zinyama zinifu ziu lugano lwosi saba zisaza kandi saba zingali, kandi zinyama ziviri isaza ni ingali zitaveeye zinifu.

³ Uvuguli kandi amanyonyi gu lugano lwosi saba masaza kandi saba makali. Okole ndio kunangwa vuli lugano lwosi lwi zinyama kandi amanyonyi gaduuki kuva mwoyo nu kwivulana kandi ku lirova.

⁴ Madiku saba kutura kalunu ndatuma imbura enene kukuba ku kivala ku madiku arubaini mbasu nu vudiku. Mulikola ndio, ndadiviza vuli kindu choosi chandaalomba ekeveeye ni livamwoyo.”

⁵ Nuhu yakola vuli kindu choosi cha Yahova yamulaga.

⁶ Nuhu yaali ni mihiga 600 lwi imbura enene yi migelera ja mazi yakuba ku lirova.

⁷ Nuhu harara nu mukali weve, harara na vana veve na vakali vaavo, viingira mu liato vaduuki kohononoka ku migelera ja mazi.

⁸ Vuli lugano lwosi lwi zinyama isaza ni ingali, kandi manyonyi goosi masaza na makali, viosi vinifu kandi vitaveeye vinifu,

⁹ Vingira mu liato harara na Nuhu, kuli Nyasaye yaali yamulaga.

¹⁰ Inyima wa madiku saba, imbura enene yi migelera ja mazi yakuba ku lirova.

¹¹ Lwa Nuhu yaali naveeye ni mihiga 600, ku lidiku lia 17 liu mweli gwa 2, visenukiru viosi via mazi manene isi wi lirova, viafuduka. Nyasaye yakunura madirisha goosi gu mu ligulu.

¹² Imbura enene yakuba ku lirova ku madiku arubaini mbasu nu vudiku.

¹³ Ku lidiku liene yilio, Nuhu harara nu mukali weve kandi avana veve vavaga: Shemu, Hamu na Jafeza harara na vakali vaavo, viingira mu liato.

¹⁴ Viingira mu liato harara nu lugano lwosi lwi zinyama ziu muvulimu, zinyama ziu kutuga, manyonyi zing'ano ziosi, kandi vuli lugano lwosi lwi virombe vimolaa ku lirova.

¹⁵ Virombe viveeye mwoyo vie zing'ano ziosi, visaza ni vikali, viingira mu liato harara na Nuhu,

¹⁶ kuli Nyasaye yaali yamulaga. Maku Yahova yahaana muliango gweliato lwa vaali ni vakingiramu.

¹⁷ Migelera ja mazi jaazizagilira ku madiku 40; migelera ja mazi jameedeka. Liato lielema ku mazi, ma nilizia igulu ku lirova.

¹⁸ Amazi giizura ligali; kandi nigazizagilira komeedeka ku lirova, ni liato lielema igulu ku mazi.

¹⁹ Amazi gaali amanyingi ligali, kali nigakunika vigulu vitambi viosi isi wi ligulu.

²⁰ Amazi gameedeka kuduuka igulu nigakunika vigulu ligera lie zimita saba.

²¹ Virombe viosi vie livamwoyo, vigenda kandi vimolaa ku lirova, amanyonyi, mitugu, zinyama ziu muvulimu kandi vuli mundu woosi viakuza.

²² Vuli kindu choosi chi livamwoyo ku lirova chaakuza.

²³ Yahova yadiviza vindu viosi viveeye mwoyo ku lirova: avandu, zinyama, vimolaa, kandi amanyonyi gu mu ligulu. Nuhu yeng'ine harara na vandu vinyumba yeeye, kandi viosi viali mu liato viahona.

²⁴ Amazi gaali ku lirova ku madiku 150.