Litanga 50 - KITABU KITAKATIFU

¹ Maku Josefu yagwa ku baba weve, nalira kandi naamuvusa vuusa.

² Josefu yavolera vatumikiri veve vasiza kolomba muviri gwa baba weve guvuli kwoneka. Kunangwa avatumikiri vasiza valomba muviri gwa baba weve guvuli kwoneka.

³ Valomba muviri yigu ku madiku 40, eveeye ing'inga idukanaa kolomba muviri. Avandu va Egebeti vasiomera Yakobo ku madiku 70.

⁴ Lwi ing'inga yi lisioma yafwa, Josefu yavolera vatumikiri vu mwami ndi, “Ni muyaanzi muzie kovoolera mwami makuva yaga:

⁵ ‘Lwa baba wange yaali naveeye ahimbi kukuza, yambolera musuuvirizii ndi ndakayaviri muviri gwigwe mu kirindwa, cha yaali niyalomba mukivala cha Kanaani. Mwaza yaanza umbugiliri nzie kuyavira muviri gwa baba wange, ma nzirane.’ ”

⁶ Mwami yavoola, “Zia uyaviri muviri gwa baba woovo kuli wamusuuviriza.”

⁷ Kunangwa Josefu yazia kuyavira muviri gwa baba weve. Yazia harara na vatumikiri vu mwami, avanene vinyumba yu mwami, vosi kandi avakulundu vi kivala cha Egebeti.

⁸ Avandu vinyumba ya Josefu, avamwavo veve, harara na vandu vi inyumba ya baba weve, vosi vazia harara naye. Navuzwa vana vaavo, zimburi, magondi ni zing'ombe viatigala Gosheni.

⁹ Avasaza vu kunina ku magare kandi ku zibarasi, vazia harara naye. Gwaali muganda munene ligali.

¹⁰ Lwa vaduuka koloze ha Atadi, ivugwi wu mugera gwa Jorodani; vasioma vudinyu novovereri ku ing'inga indambi. Josefu yasiomera baba weve ku madiku 7.

¹¹ Lwa vandu vi kivala cha Kanaani valora vandu yava nivasioma ha loze lwa Atadi, vavoola, “Yili ni lisioma liovovereri ku vandu va Egebeti!” Kunangwa havundu yaaha halangwa, “Abeli Miziraimu”.

¹² Kunangwa avayaayi va Yakobo vaakora kuli baba wavo yavalaga.

¹³ Vaginga muviri gwa baba wavo nivahira mukivala cha Kanaani. Vaaguyavira mu kirindwa ha Makipela, Ivugwi wa Mamure, mu mulimi gwa Aburahamu yaali naguli kutura ku Efuroni gove havundu hu kuyavira vakuzu.

¹⁴ Inyima wa Josefu yaali niyakayavira baba weve, yirana mukivala cha Egebeti harara na vamwavo veve kandi na yavo vosi avaari ni vaziyi naye kuyavira baba weve.

Josefu Yasuuviriza Vamwavo Veve Kandi

¹⁵ Inyima wi likuza lia baba wavo, avamwavo Josefu vavoola, “Gakaveeye ki niiva Josefu akikudunyira nokolohiza kuvanza kisaalia kuvudamanu vwosi vwakwamukolera?”

¹⁶ Kunangwa vaatuma likuva ku Josefu: “Inyima wa baba wiitu yaali nakikiri kukuza,

¹⁷ yakovolera kokoteve, ‘Mwaza nuyanza usamihi mahiolo gavamwavo vovo vakokolera.’ Kalunu mwaza nuyanza ukusamihi mahiolo agakunyi avatumikiri va Nyasaye wa baba woovo kwakora.” Josefu yalira lwa yahulira makuva yaga.

¹⁸ Maku avamwavo veve vaza ma nivasigama imbiri weve, nivavoora, “Kunyi koveeye hano imbiri woovo kuli avatugwa vovo.”

¹⁹ Navuzwa Josefu yavavolera, “Mutatia mba; Inzi sinyala kwivika muvogono vwa Nyasaye mba.

²⁰ Munyi mwandohizira muvwivisu zing'anagani ziu vudamanu, navuzwa Nyasaye yazigirung'anyia kugwa uvulahi, kunangwa aduuki kohonyia avandu vanyingi kalunu kigira agekoleka.

²¹ Kunangwa mutatia mba. Inzi ndamulinda harara navana vinyu.” Kunangwa yavaleminya mioyo na makuva malahi agadira ku mioyo jaavo.

Likuza lia Josefu

²² Josefu yaazizagilira komenya mu Egebeti harara na avinyumba ya baba weve. Yaali ni mihiga 110 lwa yakuza.

²³ Yamenya kuduuka nalora avana va Efuraimu kandi navisukulu. Yamenya kandi nokolola avana va makiri muyaayi wa Manase.

²⁴ Yavolera avamwavo veve, “Inzi mbeeye ahimbi kukuza, navuzwa Nyasaye alamulinda. Alamutuliza mukivala yiki nukumuhira mukivala chayisuhizira Aburahamu, Isaka, kandi Yakobo.”

²⁵ Maku Josefu yateeva avandu veve valombe liesuhiza. Yavoola, “Mundage inzi ndi lwa Nyasaye alimwimirira kuzia mukivala yicho, munyi mulakazie numuviri gwange.”

²⁶ Kunangwa Josefu yakuzira naveeye ni mihiga 110. Valomba muviri gwigwe kandi nivaguvika mu lisandugu mu Egebeti.