Litanga 5 - KITABU KITAKATIFU

Visukululwi via Adamu

¹ Yaga namita agivisukululwi via Adamu. Lwa Nyasaye yalomba umundu, ya mulomba mulifwana lilie.

² Yalomba musaza nu mukali, navagasiza, kandi navagulika “Umundu numukali.”

³ Lwa Adamu yaali ni mihiga 130, yanyoora mwana muyaayi uwamufwana, kandi yamugulika lieta Sezu.

⁴ Inyima wa yago, Adamu yamenya mihiga jindi 800. Yanyoora avana vandi vayaayi na vakana

⁵ ma yakuza naveeye ni mihiga 930.

⁶ Lwa Sezu yaali naveeye ni mihiga 105, yanyoora mwana muyaayi Enosi,

⁷ kandi yamenya mihiga jindi 807. Yanyoora avana vandi vayaayi na vakana

⁸ ma yakuza naveeye ni mihiga 912.

⁹ Lwa Enosi yaali ni mihiga 90, yanyoora mwana muyaayi Kenani,

¹⁰ kandi yamenya mihiga jindi 815. Yanyoora avana vandi vayaayi na vakana

¹¹ ma nakuza naveeye ni mihiga 905.

¹² Lwa Kenani yaali ni mihiga 70, yanyoora mwana muyaayi, Mahalaleli,

¹³ kandi yamenya mihiga jindi 840. Yanyoora avana vandi vayaayi na vakana

¹⁴ ma nakuza naveeye ni mihiga 910.

¹⁵ Lwa Mahalaleli yaali ni mihiga 65, yanyoora mwana muyaayi, Jaredi,

¹⁶ kandi yamenya mihiga jindi 830. Yanyoora kandi avana vandi vayaayi na vakana

¹⁷ ma nakuza naveeye ni mihiga 895.

¹⁸ Lwa Jaredi yaali ni mihiga 162, yanyoora mwana muyaayi Enoka,

¹⁹ kandi yamenya mihiga jindi 800. Yanyoora avana vandi vayaayi na vakana

²⁰ ma nakuza naveeye ni mihiga 962.

²¹ Lwa Enoka yaali ni mihiga 65, yanyoora mwana muyaayi Mezusela.

²² Inyima wa yago, Enoka yatia malago ga Nyasaye ku mihiga 300 kandi yanyoora avana vandi vayaayi na vakana.

²³ Yamenya mihiga 365.

²⁴ Yatia malago ga Nyasaye mu limenya lilie liosi, kandi yatulaho, kigira Nyasaye yamuvugula.

²⁵ Lwa Mezusela yaali ni mihiga 187, yanyoora mwana muyaayi Lameki,

²⁶ kandi yamenya mihiga jindi 782. Yanyoora kandi avana vandi vayaayi na vakana

²⁷ ma nakuza naveeye ni mihiga 969.

²⁸ Lwa Lameki yaali ni mihiga 182, yanyoora mwana muyaayi,

²⁹ kandi yavoola, “Kutura ku lirova lia Yahova yalaama, mwana uyu alakoletera vosoosi kutura ku miyinzi jiitu midinyu.” Kunangwa yamugulika Nuhu.

³⁰ Lameki yamenya mihiga jindi 595. Yanyoora avana vandi vayaayi na vakana

³¹ ma nakuza naveeye ni mihiga 777.

³² Inyima wa Nuhu yaali ni mihiga 500, yanyoora avana vayaayi vavaga, Shemu, Hamu, na Jafeza.