Litanga 47 - KITABU KITAKATIFU

¹ Kunangwa Josefu yavugula avamwavo veve ma nazia ku mwami. Yavoola, “Baba wange na avamwavo vange vamali kuza kutura Kanaani ni viayo viavo, mitugu jaavo kandi nimiandu josi ja vaveeye najo. Kalunu vaveeye mukivala cha Gosheni.”

² Kutura mu vamwavo veve yatovola vasaza vatano ma namanyia mwami.

³ Mwami yavateva, “Munyi mukora miyinzi ki?” Vaativura, “Mwami, kunyi avatumikiri vovo koveeye vuzwa avayi kuli avaguuga viitu vaali.

⁴ Kunyi kumali kuza komenya mukivala yiki, kigira inzara eveeye inyingi mukivala cha Kanaani mitugu jiitu jivula vwayiru. Mwaza nuyanza ukuvugiliri komenye mukivala cha Gosheni.”

⁵ Mwami yavolera Josefu, “Kalunu baba woovo na vamwavo vovo vamali kuduuka,

⁶ kivala cha Egebeti ni chavo. Leka vamenye mukivala cha Gosheni, kedonye kilahi chi kivala. Niiva avandu vaveeyemu avanyala kokora miyinzi ju vwayi; uvakole valindi mitugu jaange.”

⁷ Maku Josefu yaleeta baba weve Yakobo ma naamumanyia ku mwami. Yakobo yagasiza mwami,

⁸ kandi mwami yamuteeva, “Ivi oveeye ni mihiga janga?”

⁹ Yakobo yativura, “Limenya liange liu kogenda genda liali mihiga 130. Mihiga yijo jali mikekeeke kandi ju vudinyu, kuvita mihiga ja vaguuga vange vaali mu ligenda genda.”

¹⁰ Maku Yakobo yagasiza mwami kandi ma natura nazia.

¹¹ Maku Josefu yidikiriza baba weve na vamwavo veve mu kivala kilahi cha Egebeti ahimbi ni lidaala linene lia Ramesesi ma navaha miandu, kuli mwami yaali nalagi.

¹² Josefu yahaana viukulia ku baba weve na vamwavo veve kandi na vosi avinyumba ya baba weve harara na avana vakekeeke.

Inzara mu Egebeti

¹³ Inzara yaali inyingi muno kali viukulia siviali ku havundu hoosi mba, kandi avandu va Egebeti na Kanaani vaali avang'aha kigira inzara.

¹⁴ Lwa vaagura vuswage, Josefu yavungiza mabese goosi nukuhila munyumba yu vwami.

¹⁵ Lwa mabese goosi mu Egebeti na Kanaani gaatumika, avandu va Egebeti vaza ku Josefu nivavoora, “Okohe viukulia! Utaleka kukuzi mba. Okoleku kindu! Mabese giitu goosi gafeeye.”

¹⁶ Josefu yativura, “Niiva simuveeye na mabese mba, mumbe mitugu jiinyu, na inzi ndamuha vuswage.”

¹⁷ Kunangwa valetera Josefu mitugu jaavo, kandi yavaha viukulia kigira zibarasi ziavo, magondi, zimburi zing'ombe kandi ni zibunda ziavo. Muhiga yigwo yahaana viukulia kigira mitugu jaavo josi.

¹⁸ Muhiga gwalondaku vaza kuye nivavoora, “Mwami, kunyi si kulakuvisa makuva mba, mabese giitu goosi gaatumika kandi mitugu jiitu ni jijo. Kindu kivulaho chakukuha nitali miviri jiitu kandi ni milimi jiitu.

¹⁹ Utaleka kukuzi mba. Okole ku kindu! Utaleka milimi jiitu jitigale miere mba. Uguli kunyi ni kivala chiitu kigira viukulia. Kunyi kulava avatugwa vu mwami, kandi alavugula kivala chiitu. Okohe vuswage kandi vuguza kutage mumilimi jiitu kunangwa kove mwoyo.”

²⁰ Josefu yaagula mwami kivala choosi cha Egebeti. Vuli umundu wa Egebeti yanigwa kuguliza mulimi gwigwe kigira inzara yaali inyingi muno. Kivala choosi chaagwa imiandu ju mwami.

²¹ Josefu yakola avandu vosi va Egebeti kuva avatugwa.

²² Milimi ja yavula kugulizwa; gwaali gwavasaalisi. Sivali vanyara kuguliza milimi jaavo mba kigira mwami yavavugilira komenya mu.

²³ Josefu yavolera avandu, “Heenzi, inzi mali kugura munyi ni milimi jiinyu kuva ju mwami. Vuguza mbuvu mutage mumilimi.

²⁴ Ku ing'inga yiligesa kuduuka muhaane kidieli kilala kitulaa ku vitano ku mwami. Vitigaye vidieli vine kutura ku vitano munyara kutumikira ku vuguza Nu kuviukulia vienyu aveene kandi na vinyumba yinyu.”

²⁵ Vaativura, “Ivi umali kokohonyia; mwami, ivi oveeye mulahi ku kunyi, kandi kunyi kulava avatugwa vu mwami.”

²⁶ Kunangwa Josefu yaalikola ligwa lilaga mukivala cha Egebeti ndi kidieli kilala kutura ku vitano chi ligesa kilava chu mwami. Lilaga yili likili nizinguru kuduuka kalunu. Milimi ja vasaalisi jeng'ine nijo javuula kugwa imiandu ju mwami mba.

Lienya lia Yakobo Liukumaliriza

²⁷ Avandu va Isiraeli vamenya mu Egebeti mukivala cha Gosheni uwa vamanya nivagwa avatugi kandi nivanyoora avana vanyingi.

²⁸ Yakobo yamenya mu Egebeti ku mihiga 17 kuduuka lwa yaali ni mihiga 147.

²⁹ Lwa ing'inga yeeye yu kukuza yaduuka, yalanga muyaayi weve Josefu kandi na muvooleraa, “Vika mukono gugwo hagati hamatango gange, kandi wisuhi ndi ivi si ulakanzaviri mu Egebeti mba.

³⁰ Inzi nyenya nzavirwi uwa vaguuga vange vaayavirwa; ungingi kutura mu Egebeti kandi unzaviri uwa vayavirwa.” Josefu yativura, “Inzi ndakora kuli ovooye.”

³¹ Yakobo yavoola, “Ivi wisuhi ndi ulakola.” Josefu yisuha, kandi Yakobo yasaala hamutwi hikidali chiche.