Litanga 46 - KITABU KITAKATIFU

Yakobo harara na vinyumba yeeye Vazia Egebeti

¹ Yakobo yavungiza viosi iviayaali navio kandi nazia Beerisheba, uwa yahaana viusiuviliru ku Nyasaye wa baba weve Isaka.

² Nyasaye yamoloma kuye mu malola vudiku kandi naalanga, “Yakobo, Yakobo!” “Yavoola yee inzi mbeeye hano.”

³ Yavoola, “Inzi mbeeye Nyasaye, Nyasaye wa baba woovo. Utatia kuzia Egebeti mba. Inzi ndakalombe kisukururwi chicho kuva ihiiri enene wene yeyo.

⁴ Inzi ndakazie na ivi mu Egebeti, kandi ndakiranyie visukululwi vivio mukivala yiki. Josefu alakave harara na ivi lwa ulakakuzi.”

⁵ Yakobo yatura Beerisheba. Avana veve vamugingira mu magare agu mwami wa Egebeti yaali nahaani oyo harara navana vaavo vakekeeke kandi navakari vaavo.

⁶ Vaavugura mitugu jaavo kandi ni miandu ja vaali nivanyoora mu Kanaani kandi ni vazia Egebeti. Yakobo yavugula visukululwi vivie viosi:

⁷ avayaayi veve na vakana veve kandi aviisukulu veve vayaayi na vakana.

⁸ Avandu vinyumba ya Yakobo avaazia naye Egebeti vaali muyaayi weve wukutanga Rubeni

⁹ kandi na vayaayi va Rubeni: Hanoki, Palu, Hezoroni na Karimi.

¹⁰ Simioni na vayaayi veve: Jemweli, Jamini, Ohadi, Jakini, Zohari, na Shauli mwana wu mukali Mukanani.

¹¹ Levi kandi na vayaayi veve: Gerishomu, Kohazi na Merari.

¹² Yuda na vayaayi veve: Shela, Perezi na Zera. Eri na Onani vaali avana vandi va Yuda vaali nivakuzira mu Kanaani. Avana va Perezi vaali Hezoroni na Hamulu.

¹³ Isakari na vayaayi veve: Tola, Puya, Jashubu, na Shimuroni.

¹⁴ Zabuloni na vayaayi veve: Seredi, Eloni, na Jahileli.

¹⁵ Yava na vayaayi va Lea yivulira Yakobo mukivala cha Mesopotamia harara nu mukaana weve Dina. Vayaayi veve na vakana veve vaali vosi harara 33.

¹⁶ Gadi na vayaayi veve: Zefoni, Hagi, Shuni, Eziboni, Eri, Arodi na Areeri.

¹⁷ Asheri na vayaayi veve: Imuna, Ishiva, Ishiri, Beria, kandi na mbozo wavo Sera. Avayaayi va Beria vaali Heberi na Malikieli.

¹⁸ Visukululwi 16 yivi ni via Yakobo na Ziliba mukaana mutugwa uwa Labani yaaha Lea mukaana weve.

¹⁹ Raheli mukali wa Yakobo yamwivula vayaayi vaviri: Josefu na Benjamini.

²⁰ Josefu na Asenazi mukaana wa Potifera waali musaalisi mu Heliopolisi vanyoola vayaayi vaviri mu Egebeti, Manase na Efuraimu.

²¹ Avayaayi va Benjamini vaali Bela, Bekeri, Ashibeli, Gera, Naamani, Ehi, Roshi, Mupimu, Hupimu, na Avidi.

²² Avandu 14 yava ni visukululwi via Yakobo na Raheli.

²³ Muyaayi wa Dani yaali Hushimu.

²⁴ Nafutali navayayi veve: Jahizeli, Guni, Jezeri, na Shilemu.

²⁵ Visukululwi 7 yivi ni via Yakobo na Biliha mukaana mutugwa uwa Labani yaaha Raheli mukaana weve.

²⁶ Avandu vi inyumba ya Yakobo avaazia mu Egebeti harara naye vaali 66 vugira kuvalizira mu avanavizara veve.

²⁷ Josefu yanyoora avayaayi vaviri mu Egebeti; vosi harara vaali avandu 70 avinyumba ya Yakobo avaazia mu Egebeti.

Yakobo harara na vinyumba yeeye mu Egebeti

²⁸ Yakobo yatuma muyaayi weve Yuda azie koteeva Josefu yaze kuvaaganira mu Gosheni.

²⁹ Kunangwa Josefu yingira mu ligare lilie kandi nazia kwaganira baba weve. Lwa vaagana Josefu yakumbelera baba weve mwigoti kandi nalira ku ing'inga indambi.

³⁰ Yakobo yavolera Josefu, “Inzi nzetegeki kukuza, kalunu ndi inzi mali kokolola kandi manyirizi ndi oveeye mwoyo.”

³¹ Maku Josefu yavolera avamwavo veve kandi navandi vosi avinyumba ya baba weve, “Inzi kuduuka nzie kovoolera mwami ndi avamwavo vange kandi avinyumba ya baba wange vosi, avaamenyaa mu Kanaani, vamali kuza ku inzi.

³² Inzi ndamuvolera ndi munyi muveeye avayi. Munyi mulinda mitugu kandi mumali koleta viayo ni mitugu jiinyu kandi vuli kindu chiinyu.

³³ Lwu mwami amulanga nukumuteva miyinzi ja mukora,

³⁴ mu muvoolere ndi munyi mwaali vuzwa avayi kutura muvosoleri vwinyu, kuli avaguuga vinyu vaakora. Mu liiva kuli yili alaleka mumenye mukivala cha Gosheni.” Josefu yavoola yaga kigira avayi vaveeye livihilirizwa ku avandu va Egebeti.