Litanga 45 - KITABU KITAKATIFU

Josefu Yimanyia ku Vamwavo Veve

¹ Josefu siyaali anyala kwigalira liiva lia yaali mu imbiri wa vatumikiri veve mba. Kunangwa yavavolera vosi kuzia ichova. Si yaliho nu mundu kali mulala lwa Josefu yivuula ku vamwavo veve mba.

² Yalira nu mwoyo munene, kali kuduuka vandu va Egebeti nivahulira, kandi makuva gaduukaa munyumba yu vwami.

³ Josefu yavolera vamwavo veve, “Inzi mbeeye Josefu. Baba wange akikiri mwoyo?” Navuzwa lwa vamwavo veve vahulira amakuva yaga si vaali vanyara kumutivulira kindu mba, kigira vaali nuvuti vunyingi ligali.

⁴ Maku Josefu yavavolera, “Yaanzi mwisundi ahimbi.” Visunda ahimbi, na yavoola, “Inzi mbeeye amwavo winyu Josefu, wamwaguliza mukivala cha Egebeti.

⁵ Kalunu mutava novovereri anoho mwiduli aveene kigira mwanguliza hano mba. Liali lilohiza lia Nyasaye kunangwa inzi nduuki kohonyia avandu.

⁶ Yigu nu muhiga gwa kaviri vuzaa gwi inzara mu kivala. Jilavaho mihiga jindi jitano, lilima anoho ligesa si vilavaho mba.

⁷ Nyasaye yanduma imbiri winyu nduuki kosola munyi avatigara ku lirova, kandi nduuki kohonyia visukululwi vienyu.

⁸ Kunangwa si mwali munyi avanduma hano mba, navuzwa Nyasaye; umali kongonya kuva mutumikiri munene wu mwami. Mbeeye munene munyumba yeeye yu vwami, kandi mwamihi mukivala choosi cha Egebeti.

⁹ “Kalunu mwirane vwangu ku baba wange, na mumuvolere ndi yaga nigo agu muyaayi weve Josefu avoora, ‘Nyasaye umali kongola kuva mwamihi mukivala choosi cha Egebeti muuzi vwangu ku inzi mutalindagilira mba.

¹⁰ Mulamenya mukivala cha Gosheni, ahimbi ninzi. Mulava harara na vana vinyu visukuru vinyu, viayo via magondi, zimburi, zing'ombe zienyu, kandi ni vindu vindi viosi via muveeye navio.

¹¹ Inzi ndamulinda lwa muva nimumenyi mukivala cha Gosheni. Inzara ilavaho ku mihiga jitano; na si nyenya munyi harara na vana vinyu kandi viayo via magondi, zimburi kandi zing'ombe zienyu, kandi vindu vindi viosi via muveeye navio vidivi kigira inzara mba.’ ”

¹² Josefu yaazizagilira kovora, “Kalunu munyi mwosi harara na Benjamini, munyala kolola ndi inzi mbeeye Josefu.

¹³ Muvoolere baba wange kigira uvunyali vwa inzi mbeeye navwo hano mukivala cha Egebeti; Mumuvolere kandi vindu viosi viamumali kolola. Maku mukore vwangu mu muleete hano.”

¹⁴ Maku Josefu yakumbelera Benjamini amwavo weve ma natanga kulira, kandi Benjamini naye yamukumbelera; kandi natanga kulira.

¹⁵ Yavusa avamwavo veve vosi, kandi navalilira. Inyima wa yaga, avamwavo veve vataanga komoloma na Josefu.

¹⁶ Lwa makuva yaga gaduukaa munyumba yu vwami, ndi avamwavo va Josefu vamali kuza, mwami harara na vatumikiri veve vaali nu vuyanzi.

¹⁷ Mwami yavolera Josefu, “Volera avamwavo vovo vaviiki misigo jaavo ku zibunda ma viirane mukivala cha Kanaani.

¹⁸ Kandi vavuguli baba wavo harara na vandu vinyumba yeeye nimiandu jaavo josi, ma vaze ku inzi, kandi ndamuha kivala kilahi cha Egebeti. Kandi mulalia viukulia vinyingi ligali.

¹⁹ Uvavoolere vavuguli magare kutura Egebeti vagingiliku avakali vaavo harara na vana vaavo, kandi vavuguli baba wavo vaze naye.

²⁰ Vatahenda mwoyo kigira miandu jaavo ja valeka inyima mba. Uvulahi vwi kivala choosi cha Egebeti vulava uvwavo.”

²¹ Avayaayi va Yakobo vaakora kuli valagwa. Josefu yavaha magare manene kandi viukulia ku logendo lwavo, kuli mwami yalaga.

²² Yahaana ku vuli mulala zinguvu ziu kwigilung'anyia, navuzwa yahaana ku Benjamini vidonye 300 vie ifeza kandi zinguvu 5 ziu kwigilung'anyia.

²³ Yaahilira baba weve zibunda 10 nizigingi misigo jivindu vilahi via Egebeti, kandi zibunda 10 zigingi misigo jo uvuswage, ni viukulia ku logendo.

²⁴ Kunangwa yatuma avamwavo veve kuzia, navuzwa yavavolera, “Mutalembani ku nzira mba.”

²⁵ Kunangwa vazia kutura Egebeti, nivirana ku baba wavo mukivala cha Kanaani.

²⁶ Vavoolera baba wavo, “Josefu akikiri mwoyo! Aveeye mwamihi wi kivala choosi cha Egebeti!” Yakobo baba wavo yaali ni ligenya, kigira si yasuuvira mba.

²⁷ Navuzwa lwa vamuvolera makuva goosi ga Josefu yaali navavooleye, kandi lwa yalora magare ga Josefu yaali navaheeye vamugingiriku kuzia Egebeti, yasuuvira kandi yalema mwoyo.

²⁸ Kunangwa yavoola, “Muyaayi wange Josefu akikiri mwoyo! Ni yaga geng'ine aga nyenyi kumanya! Inzi ndazia kumulora ni ngikiri kukuza.”