Litanga 44 - KITABU KITAKATIFU

Kekombe Chagota

¹ Maku Josefu yalaga mutumikiri winyumba yeeye, “Wizulizi viukulia vinyingi ligali mu misigo ja vandu yava, kandi uvuguli mabesa ga vuli mundu uviiki ha munwa gu mu musigo gwigwe.

² Uvuguli kekombe change chi ifeza uviviiki mu musigo gwu muyaayi mukogoti harara na mabesa geege gu vuswage.” Mutumikiri oyo yakola kuli Josefu yamuvolera.

³ Mugambazuri, vavavolera viirane harara ni zibunda ziavo.

⁴ Lwa vaali ni vakazia logendo lwimbi kutura mu lidaala, Josefu yavolera mutumikiri winyumba yeeye, “Londelera avandu yava. Lwa uvanyoola, uvateeve, ‘Kigira ki mutungi uvudamanu ku vulahi? Kigira ki mwivi kekombe chu mugasa chu munene wange?

⁵ Yiki ni kekombe chu munene wange anweramu, kandi keveeye cha koleramu uvukumu. Mumali kokora vudamanu ligali!’ ”

⁶ Lwu mutumikiri oyo yavanyoola, yavavolera makuva gu munene weve yaali namuvooleye.

⁷ Navuzwa vandu yava vamuvolera, “Mwami wiitu, yaga gaveeye kovora ki lwa ovola makuva kuli yaga? Kunyi kwisuhaa ndi, si kwakora kindu kuli yiki mba.

⁸ Ivi umanyi ndi kunyi kwiranyia mabese ga kwanyoora mu misigo jietu, kutura mukivala cha Kanaani. Kunyi kunyala ndi kwiva ifeza anoho izahabu kutura munyumba yu munene woovo?

⁹ Niiva mulala ku kunyi alanyooleka ne kekombe yiki, gamudukira yiitwi, na vandi vosi kulagwa vatugwa vu munene woovo.”

¹⁰ Mutumikiri yavoola, “Galava kuli ndio. Nitali oyo onyooleka ne kekombe mu musigo gwigwe, alava mutugwa wu munene wange, na vandi vosi mulava avavoholore.”

¹¹ Kunangwa vakora vwangu ni viikiza misigo jaavo kutura ku zibunda ziavo. Vuli mundu ya voholora musigo gwigwe.

¹² Mutumikiri wa Josefu yenyeleriza mu misigo josi, yatangila nu musigo gwu mukulundu na malirizila mu musigo gwu mukekeeke. Kekombe chanyooleka mu musigo gwa Benjamini.

¹³ Maku vamwavo veve vatandula zinguvu ziavo mu vovereri, nivilanyia misigo jaavo ku zibunda, ma nivirana mu lidaala linene.

¹⁴ Lwa Yuda harara na vamwavo veve vaduuka munyumba ya Josefu, mwene yaali nakikiri mu. Vazia nivasigama imbiri weve.

¹⁵ Josefu yavoola, “Kindiki cha mumali kokora yiki? Si mumanyi ku mundu kuli inzi nyara kokora vusigitiri ma manye cha mukoli?”

¹⁶ Yuda yavoola, “Kunyi kunyala kokovoolera kindiki? Kunyala kovora ki? Kunyala ndi kutura mu yaga? Nyasaye umali kulang'aminya uvudamanu vwitu. Kalunu kunyi kwosi koveeye avatugwa vovo harara nu wekekombe kenyooleki mu musigo gwigwe.”

¹⁷ Josefu yavoola, “Inzi si nyara kokora ndio mba! Oyo we kekombe kenyooleki mu musigo gwigwe niyie uva mutugwa wange. Navuzwa vandi vosi munyala kwirana ku baba winyu ni mirembe.”

Yuda Yagoonya Josefu Amuhe Benjamini

¹⁸ Yuda yazia ku Josefu namuvolera, “Mwaza, yaanza umbugiliri molome na ivi, utava nu vutima na inzi mba. Ivi oveeye kuli mwami mwene.

¹⁹ Ivi wakoteeva ndi, ‘Munyi muveeye na baba anoho amwavo winyu wundi?’

²⁰ Kunyi kwativula, ‘Koveeye na baba oveeye musakulu ligali harara na amwavo wiitu mukogoti, wa baba wiitu yivula naveeye musakulu. Amwavo weve wundi yakuza, niyie yeng'ine oveeye mwoyo ku vana va mama weve. Baba weve yamuyanza ligali.’

²¹ Ivi wakovolera kumulete hano kunangwa uduuki kumulora,

²² navuzwa kwakovoolera ndi muyaayi oyo sianyala koleka baba weve mba. Niiva alamuleka, baba weve alakuza.

²³ Maku wavoola, ‘Munyi si mulavugilirwa kwingira munyumba yange nimutaveeye nu muyaayi winyu mukogoti mba.’

²⁴ “Lwa kwirana ku baba wiitu, kwamuvolera makuva ga wavoola.

²⁵ Maku baba wiitu yakovolera kwirane kuguli viukulia vikekeke.

²⁶ Navuzwa kwa volera baba wiitu ndi, ‘Kunyi si kunyala kuzia mba. Si kunyala kuvugilirwa kwingira munyumba yu mundu oyo nikutaveeye nu muyaayi wiitu mukogoti mba. Kunyi kunyala kuzia niiva muyaayi wiitu mukogoti alazia ni kunyi.’

²⁷ Maku baba wiitu yakovolera, ‘Munyi mumanyi vulahi ndi mukali wange Raheli yanzivulaa avayaayi vaviri vuzwa.

²⁸ Mulala kuvo yatura ku inzi. Hawundi zinyama ziu muvulimu zia mutandulanyia mu vidonye. Inzi si ndamulolaku kutura natura ku inzi mba.

²⁹ Niiva mulavugula uyu kutura ku inzi kandi, ma uvudinyu vumunyoole, ovovereri vwa munyala kuva nimuleti ku inzi mu vusakulu vwange, vulanzita.’ ”

³⁰ Yuda yaazizagilira kovora, “Kalunu niiva amwavo wiitu si alazia ni kunyi lwa kwirana ku baba wiitu, kandi niiva baba wiitu wu vulamu vwivwe voveeye harara livamwoyo liu muyaayi uyu,

³¹ alolaa ndi muyaayi weve siaveeye ni kunyi mba, alakuza. Ovovereri vwa koleta kuye mu vusakulu vwivwe vulamulomba akuzi.

³² Inzi ndekola kihambiliru ku baba wange kigira muyaayi uyu. Ndamuvolera ndi, niiva si ndilanyia muyaayi uyu kuye mba, alandula mu livamwoyo liange liosi.

³³ Kalunu ngogonya nuyanza oleke muyaayi wiitu mukogoti yirani na vamwavo vange vandi; na inzi ndatigara hano menye kuli mutugwa woovo havogono hu muyaayi wiitu mukogoti.

³⁴ Inzi nyara ndi kwirana ku baba wange muyaayi wiitu nataveeye na inzi? Mbeeye nuvuti kolola kivi kimanyaa kiduuki ku baba wange.”