Litanga 43 - KITABU KITAKATIFU

Avamwavo va Josefu Virana Egebeti na Benjamini

¹ Kalunu inzara yaali yamedeka inyingi mukivala cha Kanaani.

² Lwa vandu vinyumba ya Yakobo vaali nivakatumikira vuswage vwosi vwa vaali nivamali koleta kutura Egebeti, baba wavo yavavolera, “Mwirane kandi mukuguliri viukulia vindi.”

³ Yuda yamuvolera, “Umundu oyo yaakwiganihiza ndi sikulavugilirwa kumulora nikutaveeye na amwavo wiitu mba.

⁴ Niiva uvugilira kukutuma na amwavo wiitu, kunyi kulazia kugura chukulia.

⁵ Niiva si uvugilira mba, kunyi si kulazia, kigira umundu oyo yakovolera ndi si kulavugilirwa kumulora nikutaveeye na amwavo wiitu mba.”

⁶ Yakobo yavoola, “Kigira ki muleeti vudinyu vunyingi ku inzi nokovoolera umundu oyo ndi muveeye na amwavo wundi?”

⁷ Vaativura, “Umundu oyo yaazizagilira kokoteva makuva kolondekana navinyumba yitu, ‘Baba winyu akikiri mwoyo? Munyi muveeye na amwavo wundi?’ Kunyi kwamutivulira mateeva geege. Kunyi kwaali kumanye ndi alakovolera kuzie na amwavo wiitu?”

⁸ Maku Yuda yavolera baba weve, “Leka Benjamini azie harara na inzi, kandi kulazia vwangu, kunangwa mulala ku kunyi avuli kukuza kigira inzara.

⁹ Inzi ndagaa kumwiranyia mu mirembe, kandi niiva si ndakora ndio, ivi unyala kundula ing'inga yoosi lwa mbeeye mwoyo.

¹⁰ Kulavula kulindagilira ngano kwiranayo haali kaviri.”

¹¹ Baba wavo yavavolera, “Niiva nindio genyekaa gave, muvuguli viukulia vilahi kutura mukivala chiinyu ma muviiki mu misigo jiinyu muhiliri umundu oyo kuli kihanwa: Maguta gu mwayu makekeeke, vwuki, munyovo, manemane nizinzoli ziokulia.

¹² Ugingi mabese haali kaviri, kigira kuduuka wiranyie mabese gaali mumisigo jiinyu. Hawundi kindu kidamanu chayekoleka.

¹³ Muvuguli amwavo winyu kandi muzie ku mundu oyo.

¹⁴ Nyasaye Wuvunyali okole umundu oyo ave nizimbavasi ku munyi, kunangwa amwiranyiri Benjamini na amwavo winyu wundi. Kulwa inzi, Niiva ndagotiza avana vange, kuduuka mbagotizi.”

¹⁵ Kunangwa avamwavo vaavugura vihaanwa na mabese haali kaviri, kandi ni vazia Egebeti harara na Benjamini. Wene yeyo vimanyia ku Josefu.

¹⁶ Lwa Josefu yalora Benjamini harara navo, yavolera mutumikiri ulindaa inyumba yeeye, “Hira avandu yava munyumba yange. Valalia ninzi chukulia cha mbasu, kunangwa witi inyama mu odeeke.”

¹⁷ Mutumikiri oyo yakola kuli yalagwa kandi navugura avamwavo Josefu navahira munyumba.

¹⁸ Lwa vaali nivahilwa munyumba, vaali nuvuti kandi nivaganagana, “Kunyi kuhirwa yaaha kigira mabese gakwiranyirwa mu misigo jietu ing'inga yu kutanga. Nonoho valakwingilira, nukuvugula zibunda zietu nokokokola avatugwa.”

¹⁹ Kunangwa hakiliango chi inyumba, vavoolera mutumikiri wuvunyali,

²⁰ “Mwaza nuyanza kunyi kwaza mu Egebeti ing'inga indala maziambiri kugura vuswage.

²¹ Lwa kwumbaka lihema nikwirana yengo, kwakunura mu misigo jietu, na vuli umundu yanyoora mabese mu musigo gwigwe. Kunyi kumali kwiranya kuivi.

²² Kunyi kumali koleta mabese gandi kugura viukulia. Kunyi si kumanyi umundu wavika mabese giitu mu misigo mba.”

²³ Mutumikiri yavoola, “Mutadegera mba. Nyasaye winyu, Nyasaye wa baba winyu, kuduuka ave niyie wamuvikira mabese mu misigo jiinyu. Inzi ndanyoora mitungu jiinyu.” Maku yavaleetera Simioni.

²⁴ Mutumikiri oyo yavahila munyumba ya Josefu kandi navaha mazi agu kwisaava virenge viavo. Kandi yahaana viukulia kuzibunda ziavo.

²⁵ Vetegekiza vihaanwa viavo kuha Josefu lwa yaduuka mbasu, kigira vavolerwa ndi valalia harara naye.

²⁶ Lwa Josefu yirana yengo, vaavugura vihaanwa kutura munyumba nivamuha ma nivasigama hasi imbiri weve.

²⁷ Yateva kuli vulamu vwavo voveeye kandi navoora, “Baba winyu musakulu wa mwambolera aveeye ndi? Akikiri mwoyo? Aveeye umulamu?”

²⁸ Vaativura, “Kunyi avatumikiri vovo, baba wiitu akikiri mwoyo kandi aveeye mulamu.” Kandi vasigama imbiri weve.

²⁹ Lwa Josefu yalora amwavo weve Benjamini, yavoola, “Kunangwa uyu niyie muyaayi winyu mukekeeke uwa mwambolera makuva geege. Nyasaye akugasizi mwana wange.”

³⁰ Nonoho yazia mukeng'oze chiche kulira kigira uvuyanzi vwa yaali navwo ku Benjamini.

³¹ Lwinyima lwa yaali niyakisava mumoni mwimwe, yatura ichova, kandi niyidinyiriza umwene ma yavavolera vamuleetere chukulia.

³² Josefu yahevwa chukulia komesa lugano kutura ku ya vamwavo veve. Avandu va Egebeti avalira hene yaho vahevwa chukulia chavo halovega, kigira valora ndi nu kwikiza luyali lwavo kulia nava Heburaina.

³³ Avamwavo viikara komesa imbiri wa Josefu kolondekana ku liivulwa liavo, kutura ku munene kuduuka ku mukekeeke. Lwa valora kuli vaali nivikaye, vaahenzana aveene ku vene muligenya.

³⁴ Vahevwa viukulia kutura kuemesa ya Josefu, kandi Benjamini yahevwa haali katano kuvita avandi vosi. Kunangwa avamwavo Josefu valia nivanwa harara naye muvovoholole.