Litanga 42 - KITABU KITAKATIFU

Avamwavo va Josefu Vazia Egebeti Kugura Vuswage

¹ Lwa Yakobo yamanya ndi uvuswage voveeye mu Egebeti, yavolera avayaayi veve, “Kigira ki muhenzana aveene ku vene?

² Inzi mbulira ndi vuswage voveeye mu Egebeti; muzie kugura yo kunangwa kunyi kuvuli kukuza kigira inzara.”

³ Avamwavo va Josefu likomi vazia mu Egebeti kugura vuswage.

⁴ Navuzwa Yakobo siyatuma Benjamini amwavo Josefu mukekeeke kuzia navo mba. Yaali nuvuti ndi kindu kidamanu kinyala kwekoleka kuye.

⁵ Avayaayi va Yakobo vaza harara navandu vandi kugura uvuswage, kigira inzara yaali mukivala cha Kanaani.

⁶ Josefu, kuli munene wi kivala cha Egebeti, yaguliza vuswage ku avandu kutura mu lirova liosi. Kunangwa avamwavo Josefu vaza ma nivasigama imbiri weve nivahenza hasi.

⁷ Lwa Josefu yalora avamwavo veve, yaavamanyiliza, navuzwa yekola ndi si avamanyi mba. Yavateva nuvululu, “Munyi muturaa hayia?” Vaativura, “Kunyi kutura Kanaani kuzi kugura viukulia.”

⁸ Kali niiva Josefu yaamanyiriza avamwavo veve, yavo si vamumanyiriza mba.

⁹ Yizuliza amalooto ga yaali niyalota kigira yavo ma navoora, “Munyi muveeye avatunyirizi; munyi muuzi kolola hi kivala chiitu keveeye novodedekere.”

¹⁰ Vaativura, “Awa mwami wiitu. Kunyi avatumikiri vovo kuzi kugura viukulia.

¹¹ Kunyi vosi koveeye avayaayi vu mundu mulala. Si koveeye avatunyirizi mba, mwami wu luyali, koveeye avandu vasuuvirifu.”

¹² Josefu yavavolera, “Awa! Munyi muuzi kolola hi kivala chiitu keveeye novodedekere.”

¹³ Vavoola, “Kunyi avatumikiri vovo kwaali avamwavo 12, mwami wu luyali, avana vu mundu mulala mukivala cha Kanaani. Amwavo wiitu mulala yakuza, kalunu mukekeeke wiitu atigaye na baba wiitu.”

¹⁴ Josefu yavavolera, “Gaveeye vuzwa kuli inzi mboye. Munyi muveeye avatunyirizi.

¹⁵ Munyi mulagelizwa kuli ndi: Inzi nzisuha ku lieta lio mwami ndi munyi si mulazia kutura havundu yaaha mba kuduuka lwu muyaayi winyu mukekeeke yaza hano.

¹⁶ Mulala ku munyi azie kumuleeta. Avandi vosi mulava mu vulindi kuduuka lwa agiligali gamuvoola gamanyikanaa nzisuha ku lieta liu mwami oveeye mwoyo, munyi navatunyirizi.”

¹⁷ Maku yavavika mu vuhambe ku madiku gavaga.

¹⁸ Ku lidiku lia kavaga Josefu yavavolera, “Inzi mbeeye umundu watia Nyasaye, kandi ndamuhonyia ku kivuni kilala.

¹⁹ Niiva muveeye avandu vasuuvirifu, mulala kumunyi atigale hano mu vuhambe, navandi vosi vahiri vuswage ku avinyumba yinyu avaveeye ninzara.

²⁰ Maku kuduuka mundeetere muyaayi winyu mukekeeke. Yaga galamanyia ndi muvooraa agiligali, kandi si mulitwa mba.” Vavugilira yaga

²¹ kandi ni vavolerana aveene ku aveene, “Yee, kalunu kusalira kigira mahiolo ga kwakolera amwavo wiitu; kunyi kwalola ikivi kenene chayalimu lwa yenya vokonyi, navuzwa si kwahulira mba. Yiki nicho kivuni kigira nikuva mu vudinyu yivu kalunu.”

²² Rubeni yavoola, “Inzi ndamuvolera mutasaliriza mwana wiitu mba, navuzwa munyi si mwambulira mba. Na kalunu kutungwa kisaalia kigira likuza lilie.”

²³ Josefu yaamanyiriza gavavoola, navuzwa si vamanya mba, kigira vaali nivamolomangi naye kuvitira mu mugirung'anya.

²⁴ Josefu yagirung'ana kutura kuvo natanga kulira. Lwa yalekera, yagirung'ana kandi namoloma navo. Maku yavugula Simioni kutura kuvo naamuvoha imbiri wavo.

Avamwavo Josefu Viirana Kanaani

²⁵ Josefu yalaga vuswage vwizulizwi mu misigo ja vamwavo veve, mabese ga vuli mundu gilanywe mu musigo, kandi vahevwe chukulia chokologendo. Yaga gaakolwa.

²⁶ Vaviika vuswage vwavo ku zibunda ma ni vazia.

²⁷ Havundu havagona mu vudiku, mulala yigula mu musigo gwigwe atulizimu chukulia ahe ibunda, na yalora mabese geege ha munwa gwu musigo.

²⁸ Yalanga vamwavo veve na vavoolera “Vaanzilanyiyi mabese gange. Gaveeye mu musigo gwange!” Vamwavo veve vakuza mioyo kandi vateevana aveene ku aveene mu vuti, “Nyasaye akokoleeye kindiki yiki?”

²⁹ Lwa virana mukivala cha Kanaani, vavoolera baba wavo Yakobo vuli kindu chekoleka kuvo:

³⁰ “Umundu waali munene wi kivala yicho yamoloma kukunyi nuvululu, kandi naganagana kwaali avatunyirizi.

³¹ Navuzwa kunyi kwamuvolera, ‘Sikoveeye avatunyirizi mba, koveeye avandu vasuuvirifu.

³² Kunyi vosi kwaali avamwavo 12, baba wiitu mulala. Muyaayi mulala yakuza, nu mukekeeke yaatigara Kanaani na baba wiitu.’

³³ Umundu oyo yativura, ‘Ndatumikira liiva kuli yili kumanyiriza niiva muveeye vasuuvirifu: Mulala ku munyi alatigala hano na inzi; navandi valahilira avandu vinyu vaveeye ni inzara vuswage.

³⁴ Munyi mundeetere muyaayi winyu mukekeeke. Maku inzi ndamanya ndi munyi si muveeye avatanyirizi mba, navuzwa vasuuvirifu. Inzi na mwilanyiri muyaayi winyu, kandi munyala komenya hano ma mukore likiranya.’ ”

³⁵ Maku lwa vatuliza viukulia mu misigo jaavo, vuli mulala yanyoora imuuya ya mabese geege musigo. Lwa valora mabese, vosi harara na baba wavo vaatia.

³⁶ Baba wavo yavavolera, “Munyi mwenya mugole ngotizi avana vange vosi? Josefu yagota. Simioni kandi yagoti, kalunu mwenya muhiri Benjamini kandi. Ni inzi usaliraa!”

³⁷ Rubeni yavolera baba weve, “Niiva inzi si ndakwiranyira Benjamini, unyala kwita avayaayi vange vaviri. Umuleke muvulindi vwange, kandi inzi ndamwiranya ku ivi.”

³⁸ Navuzwa Yakobo yavoola, “Muyaayi wange sianyala kuzia ni munyi mba. Amwavo weve yakuza, kandi niye weng'ine watigala. Kindu kinyala kumusalirizira kologendo. Inzi mbeeye musakulu, na vovereri vwa muleete ku inzi vulanzita.”