Litanga 41 - KITABU KITAKATIFU

Josefu Yiivara Maloto gu Mwami

¹ Inyima wi mihiga giviri, mwami wa Egebeti yalota ndi yaali nasingiyi ku lujinga lwu mugera gwa Naili.

² Nonoho zing'ombe saba zing'omeru kandi zinetu ligali ziaza kutura mu mugera; nizitanga kwaya vunyasi vwali ku lujinga lwu mugera.

³ Maku zing'ombe zindi saba zing'afu kandi zindamanu ziaza kutura mu mugera nizisingira ahimbi ni zing'ombe zindi ku lujinga lwu mugera.

⁴ Zing'ombe zing'afu zialia zing'ombe zing'omeru. Maku mwami yavuka kutura mu zindolo.

⁵ Mwami yagona kandi nalota lwa kaviri. Mu maloto geege, yalora viangala saba viu vuswage, vikomeru kandi vilahi ligali, viali nivimeli ku kisivu kilala.

⁶ Inyima wa yivi, yalora kandi viangala saba viu vuswage ni vimeli. Viene yivi viali ving'erere vie imbuza yi kivi kutura ivugwi yaali ninializi.

⁷ Viangala viali ving'erere viamira viangala viali vikomeru. Hene yaho, mwami yavuka kutura mu zindolo, na yamanya ndi yaali mu maloto.

⁸ Mugambazuri Lidiku lialondaku, mwami yahenda mwoyo. Kunangwa yatumana avakumu vosi kandi vandu vovogeri vosi kutura Egebeti. Yavavolera maloto geege, navuzwa si yaali ho kali mulala waali anyala kwivaalira mwami kivuni cha maloto yaga mba.

⁹ Maku mulindi wi iwaini yavolera mwami, “Kalunu inzi mali kwizuliza vudamanu vwange, navuzwa si ndakovolera mba.

¹⁰ Lwa waali nu vutima nu mudeeki wi migadi woovo munene harara ninzi, wakuviika mu vuhambe munyumba yu munene wa valindi va vahambe.

¹¹ Vudiku vulala, vuli mulala ku kunyi yalota maloto. Vuli maloto gaali ni kivuni chago.

¹² Muyaayi Muheburaina yaali mu vuhambe ni kunyi, yaali mutumikiri wu munene wa valindi va vahambe. Kwa muvooleraa maloto giitu, naye yakwivaalira kivuni chago.

¹³ Gaamanya nigakoleka kuli yaali navooye. Ivi waanziranyia ku miyinzi jange, navuzwa wamanya niwita mudeeki wi migadi woovo, ma nusunga muviri gwigwe ku musaala.”

¹⁴ Maku mwami yatumana Josefu kutura munyumba ya vahambe, na yaletwa vwangu. Inyima wa yaali ni yakavega liisu kandi niyiviiki zinguvu zi ndahi, yazia imbiri wu mwami.

¹⁵ Mwami yavolera Josefu, “Inzi mali kolota maloto, na siaveeye ho nu mundu kali mulala unyala kwivaala maloto yaga mba. Mali kuhulira ndi ivi unyala kwivaala kivuni cha maloto yaga.”

¹⁶ Josefu yativulira Mwami, “Mwami wu luyali, inzi si nyara mba, navuzwa Nyasaye alahaana livaala lilahi ku ivi.”

¹⁷ Mwami yavoola, “Inzi ndoti ndi ndaali nisingiyi ku lujinga lwu mugera gwa Naili;

¹⁸ zing'ombe saba zing'omeru kandi zindahi ligali ziaza kutura mu mugera ni zitanga kwaya uvunyasi vwali ku lujinga.

¹⁹ Maku zing'ombe zindi saba zing'afu kandi zindamanu ziaza kutura mu mugera, izia ngikiri kololaku mukivala choosi cha Egebeti. Ziasingira ahimbi ni zing'ombe zialia zing'omeru.

²⁰ Zing'ombe zing'afu ziali ni zialia zing'ombe zing'omeru,

²¹ navuzwa mundu si yaali anyala kumanya ndi zing'ombe zing'afu ziliyi zing'ombe zing'omeru mba, kigira zialoleka vuzwa kuva zing'afu. Maku ndamanya nimbuka kutura mu zindolo.

²² Maku ndaloota kandi nindora viangala saba viu vuswage vikomeru kandi vilahi ligali, viali ni vimeli ku kisivu kilala.

²³ Inyima wa yivi, ndaalora kandi viangala saba viu vuswage nivimeli. Viene yivi viali ving'erere, vie imbuza yi kivi kutura Ivugwi yaali ninializi.

²⁴ Viangala viali ving'erere, viamira viangala viali vikomeru. Ndalanga avakumu vosi kandi vandu vovogeri vosi kutura mukivala cha Egebeti, nimbavolera maloto yaga, navuzwa si yaliho kali mulala waali anyala kunzivaalira kivuni cha maloto yaga mba.”

²⁵ Josefu yavolera mwami, “Amalooto gaviri yaga gaveeye ni kivuni kilala. Nyasaye umali kokovoolera agaasizi kokora.

²⁶ Zing'ombe saba zing'omeru jiveeye mihiga saba, kandi viangala vikomeru saba viu vuswage jiveeye kandi mihiga saba. Goosi gaveeye ni kivuni kilala.

²⁷ Zing'ombe saba zing'afu iziaza inyima wi zing'ombe saba zing'omeru, kandi viangala saba viu vuswage ving'erere, vie imbuza yi kivi kutura Ivugwi yaali ninializi, viveeye mihiga saba ji inzara enene.

²⁸ Gaveeye vuzwa kuli mali kokovoolera, ndi Nyasaye umali kukumanyia agazizaa kokora.

²⁹ Kivala choosi cha Egebeti kilakave ni viukulia vinyingi ligali ku mihiga saba.

³⁰ Inyima wi mihiga saba ji viukulia vinyingi, inzara enene ilakaduuki mukivala choosi cha Egebeti ku mihiga saba. Mihiga josi milahi jilakivililwi, kigira inzara enene ilakadivizi avandu.

³¹ Ing'inga yi viukulia vinyingi ilakivililwi ligali, kigira inzara enene ilakaaze ilakave yi kihalato.

³² Liranira lia maloto googo, livoora ndi, Nyasaye umali kusaavira kokora agavooye alakola mu madiku makekeeke agazaa.

³³ “Kalunu otovole mundu wo vogeri kandi wi limanyiriza linyingi, ma umukole ave mwamihi wi kivala cha Egebeti.

³⁴ Kandi otovole avanene vandi vavungizi kidieli cha katano ku vuli kitagwa cha vagesa mukivala cha Egebeti. Yaga gakoleke ku ing'inga yi mihiga saba lwi iviukulia vilakave vinyingi ligali.

³⁵ Uvalage vavungizi viukulia vinyingi ing'inga yi mihiga milahi ijizaa. Uvahe uvunyali vaviiki viukulia yivi mu madaala kandi vavilindi vulahi ligali.

³⁶ Viukulia yivi vilaviikwa halovega mukivala cha Egebeti mu ing'inga yi mihiga gi inzara enene yiza mukivala. Mu likora ndio, avandu si valakadivi kigira inzara mba.”

Josefu Yakolwa Mwamihi mukivala cha Egebeti

³⁷ Lilohiza yili liali lilahi imbiri wu mwami harara na vatumikiri veve vosi.

³⁸ Mwami yavolera vatumikiri veve, “Kunyala konyoora mundu kuli Josefu, oveeye na Roho gwa Nyasaye muye?”

³⁹ Kunangwa mwami yavolera Josefu, “Nyasaye umali kuvulira ivi vindu yivi viosi. Siaveeye ho nu mundu kali mulala oveeye novogeri kandi nilimanyiriza kuvita ivi mba.

⁴⁰ Inzi ndakokola wamihi kivala change, kandi vandu vange vosi valatia malago googo. Navuzwa ndava munene kukuvita.

⁴¹ Kalunu mali kokotovola kuva mwamihi wa vandu vosi vi kivala cha Egebeti.”

⁴² Maku mwami yaatuliza imingiri yu muhuri kutura ku kedete chiche, ma naviika ku kedete cha Josefu. Yamuvika zinguvu zindahi zie katani; Kandi yamuvika munyororo gwi zahabu mwigoti mwimwe.

⁴³ Yamuvika ku ligare lilie lia kaviri lio vwami. Avasikari vuluyali vagenda imbiri weve, vahanzuka nivavoora, “Lungikizi inzira! Lungikizi inzira!” Kunangwa mwami yatovola Josefu kuva mwamihi wi kivala choosi cha Egebeti.

⁴⁴ Mwami yavolera Josefu, “Inzi mbeeye mwami, si alavaho mundu wundi woosi mukivala choosi cha Egebeti unyala kokora kindu choosi ivi nukikiri kumuvugilira mba.”

⁴⁵ Mwami yagulika Josefu lieta lia Vaegebeti Zafenazi Panea, kandi yaamuserera mukali walangwaa Asenazi, mukaana wa Potifera, musaalisi mu lidaala lia Heliopolisi. Kunangwa Josefu yagenda mukivala choosi cha Egebeti.

⁴⁶ Josefu yaali ni mihiga 30 lwa yaatanga kutumikira mwami wa Egebeti. Yatura mu mugizi gwu mwami nagenda mukivala choosi cha Egebeti.

⁴⁷ Ing'inga yi mihiga saba yi viukulia vinyingi, kivala cha Egebeti chaali ni ligesa linyingi.

⁴⁸ Josefu yavungiza viukulia vinyingi, naviviika mu madaala. Yavika muvuli lidaala viukulia via yavungiza kutura mumilimi jalikumberizaa.

⁴⁹ Josefu yavika uvuswage uvunyingi ligali, vwali kuli muyeke gwu munyanza. Vwali uvunyingi ligali kali si yaali anyala kovogera mba.

⁵⁰ Imbiri wi mihiga ji inzara jaali nijikiri kuduuka, Josefu yivula vayaayi vaviri nu mukali weve Asenazi, mukaana wa Potifera, musaalisi wi lidaala lia Heliopolisi.

⁵¹ Josefu yagulika muyaayi weve wukutanga lieta Manase. Yavoola, “Nyasaye umali kongola inzi kwivilira uvudinyu vwange vwosi kandi avandu vi inyumba ya baba wange.”

⁵² Yavoola, “Nyasaye umali kumba vana mukivala chu vudinyu maku yagulika muyaayi weve wa kaviri lieta, Efuraimu.” Kandi yavoola, nikigira Nyasaye ombeye ulwivulu mukibala chu vundinyu vwange.

⁵³ Mihiga saba ji viukulia vinyingi mukivala cha Egebeti jaduuka ku keheri.

⁵⁴ Mihiga saba ji inzara enene jatanga, kuli Josefu yaali navooye. Inzara yaliho muvivala viosi, navuzwa kivala choosi cha Egebeti chali niviukulia.

⁵⁵ Lwi inzara yaduuka mukivala cha Egebeti, avandu vanira ku mwami avahe viukulia. Kunangwa mwami yavalaga vazie ku Josefu na vakole ga vavoolera vakole.

⁵⁶ Kunangwa inzara yaali inyingi ligali mukivala choosi. Josefu yigula zinyumba ziosi zia yavika mu viukulia, nagulizira vandu va Egebeti.

⁵⁷ Avandu vaza mukivala cha Egebeti kutura mu lirova liosi. Vaagura viukulia kutura ku Josefu, kigira inzara yaali inyingi ligali havundi hoosi.