Litanga 4 - KITABU KITAKATIFU

Kaini na Habili

¹ Maku Adamu yaali harara nu mukali weve Hawa. Hawa yavereka ma niyivura mwana muyaayi, ma navoora, “Yahova amali kongonya konyoora mwana muyaayi.” Maku yamugulika lieta lilie “Kaini.”

² Lwinyima Hawa yivura kandi mwana wundi muyaayi lieta lilie Habili. Habili yaali mwayi wa magondi, na Kaini yaali umulimi.

³ Lwa vaali ni vakamenya ku ing'inga, Kaini yavugula ku ligesa lilie ma nahaana ku Yahova kuli Isadaka.

⁴ Habili yavugula kememe chu kutanga kwivulwa ku magondi geege naasinza ma navugura inyama indahi ligali nahaana ku Yahova kuli isadaka. Yahova yaavugilira kandi nayanza Habili ni sadaka yeeye,

⁵ navuzwa yasura Kaini harara ni isadaka yeeye. Kaini yaali nu vutima uvululu ligali, kandi navihilirwa ligali.

⁶ Maku Yahova yavolera Kaini “Kigira ki oveeye nu vutima? Kandi kigira ki uvihilirwa?

⁷ Niiva wakakoli vulahi, ngano ndakakuvugiliriyi, navuzwa kigira umali kokora vudamanu, ugwiyi mu vwoni. Uvwoni vulakwamiiha, navuzwa ivi kuduuka uvuguuti.”

⁸ Maku Kaini yavolera Habili amwavo weve, “Genda kuzie kogenda mu mulimi.” Lwa vaali nivaveeye uwene yeyo, Kaini yingilira Habili amwavo weve ma namwiita.

⁹ Maku Yahova yateva Kaini, “Amwavo woovo Habili aveeye hayi?” Naye yativura, “Inzi si manyi mba. Inzi mbeeye mulindi wa mwavo wange?”

¹⁰ Maku Yahova yateva, “Kigira ki umali kokora kindu kidamanu yiki? Amasahi ga amwavo woovo gwaniraa ku inzi kutura kumalova kuli mwoyo gulangiliraa kutunga kisaalia.

¹¹ Kalunu ivi umali kulamwa kutura ku lirova limali kwalaminya munwa kumila masahi ga amwavo woovo Habili wa witi.

¹² Niiva ulageliza kutaga vitagwa, si ulagesa mba. Ulagendagenda vugira kuva ni limenya ku lirova.”

¹³ Kaini yavolera Yahova, “Likalagirwa liange liveeye linene ligali kuvita kegero.

¹⁴ Ivi umali kungunga kutura ku lirova kandi ndivisa kutura imbiri woovo. Ndagendagenda mukivala, kandi mundu woosi onyoora alaanzita.”

¹⁵ Navuzwa Yahova yavolera Kaini, “Si gaveeye ndio mba. Niiva mundu woosi alakwita, ndavanza kisaalia kuye haali saba.” Kunangwa Yahova yavika kimanyiru ku Kaini kwiganihiza mundu woosi umunyoola avuli kumwita.

¹⁶ Maku Kaini yazia kutura imbiri wa Yahova, nazia komenya mukivala cha Nodu ekeveeye Ivugwi wa Edeni.

Visukululwi via Kaini

¹⁷ Kaini yaali harara nu mukali weve ma naavereka vanyoola mwana muyaayi ma ni vamugulika lieta lilie Enoka. Maku Kaini yumbaka Lidaala Linene ma naaligulika lieta liu muyaayi weve.

¹⁸ Enoka yaali nu mwana muyaayi lieta lilie liali Iradi. Iradi naye niyiivura Mehujaeli, na Mehujaeli niyiivura mwana muyaayi ma namugulika lieta lilie Mezushaeli; na Mezushaeli naye niyiivura Lameki.

¹⁹ Lameki yaali na vakali vaviri, lieta liu mulala liali Ada ni lieta liu wundi liali Zila.

²⁰ Ada yivula Jabali, uwaali guuga wa vandu vamenya mu mahima kandi vaatugaa imitugu.

²¹ Amwavo weve yalangangwa Jubali, uwaali guuga wa vandu vosi avaari avimbi vaakuba vukana na amadulere.

²² Zila yivula Tubali Kaini uwaali muturi wi vindu viosi viu mugasa ni vivia. Mbozo wa Tubali Kaini yalangwa Naama.

²³ Lameki yavolera vakali veve, “Ada na Zila, muhuliri makuva gange: Inzi mali kwita muyaayi musoleri kigira yaanguya.

²⁴ Niiva vandu 7 valitwa mulivanza kisaalia kulitwa lia Kaini, Avandu 77 valitwa mulivanza kisaalia ku liitwa liange.”

Sezu na Enosi

²⁵ Adamu yaali harara nu mukali weve Hawa na viivula mwana wundi muyaayi na yamugulika lieta lilie Sezu kigira mukali weve yavoola, “Nyasaye umali kumba mwana muyaayi wundi havogono vwa Habili, uwa Kaini yita.”

²⁶ Sezu yivula mwana muyaayi na yamugulika lieta lilie Enosi. Kutura ing'inga yene yeyo, avandu vatanga lisigamira lieta litakatifu lia Yahova.