Litanga 39 - KITABU KITAKATIFU

Josefu nu Mukali wa Potifa

¹ Kalunu avandu va Ishimaeli vaavugura Josefu nivamuhila mukivala cha Egebeti. Vamuguliza ku Potifa, uwaali mulala ku vanene vu mwami wa Egebeti, kandi uwaali munyabara wu vulindi vwi inyumba yu vwami.

² Yahova yaali harara na Josefu kandi yamugasiza. Josefu yamenya munyumba yu munene weve Potifa,

³ uwalola ndi Yahova yaali harara na Josefu kandi yaali na mugasizi ligali mu vuli kindu choosi cha yakola.

⁴ Potifa ya yaanza Josefu ligali kandi naamukora ave mutumikiri weve wa himbi ligali. Kunangwa yakola Josefu kuva munene munyumba yeeye kandi kusingilira vindu viosi via yaali navio.

⁵ Kutura ing'inga yene yeyo, Yahova yagasiza inyumba ya Potifa, harara ni vindu viosi viali munyumba kandi mu mulimi. Yago goosi gakolekaa kigira Josefu.

⁶ Potifa yavika vindu viosi mu vulindi vwa Josefu. Si yenya kumanya vindu yivi mba, nitali yenya kumanya vuzwa chukulia cha yaalia. Josefu yaali wi zinguru kandi wi ligondo lilahi ligali.

⁷ Inyima wi vindu yivi, mukali wa Potifa yaatanga kwegomba Josefu. Yavolera Josefu vave harara naye.

⁸ Navuzwa Josefu yasura na muvooleraa, “Henza, munene wange siamanyi kindu choosi munyumba yeeye mba, kigira amali kokora inzi kuva nuvunyari ku vindu viosi munyumba yeeye.

⁹ Inzi mbeeye nuvunyari munyumba yiyi kuli oyo. Si keveeye ho ni kindu choosi cha yaavisa kutura ku inzi mba, nitaveeye ivi, kigira oveeye mukali weve. Inzi nyara ndi kokora uvudamanu ovonene kuli yivu kandi ukwonera Nyasaye?”

¹⁰ Kali niiva mukali uyu yahongera komoloma na Josefu vuli lidiku, Josefu si yenya kumuhuliriza mba, kinga si yenya kogona naye mba.

¹¹ Navuzwa lidiku lilala lwa Josefu yazia munyumba kokora miyinzi jije, si haali ho nu mundu kali mulala ku vatumikiri vumunyumba mba.

¹² Mukali uyu yagumira Josefu inguvu, namuvolera, “Hamba ove harara ninzi!” Navuzwa Josefu yiruka nazia ichova, naamulekera inguvu yeeye mu mukono gwigwe.

¹³ Lwu mukali uyu yalora ndi Josefu yiruki na yaleki inguvu yeeye mu mukono gwigwe,

¹⁴ yalanga avatumikiri veve vinyumba yeye navavoolera, “Heenzi ku yaga! Muheburaina uyu wu musaza wange aleeti munyumba hagati hiitu akokoleraa kehenyahenye. Yaazi mu keng'oze change ma nageriza konzonogonya, navuzwa manyi ninguba zikwiri zinene.

¹⁵ Lwa ahuliyi ningubaa zikwiri, yiruki nazia ichova, ma niyandekera inguvu yeeye.”

¹⁶ Maku yavika inguvu ya Josefu kuduuka lwu munene weve yaza.

¹⁷ Mukali uyu yavolera munene ulugano lulala lwere, “Mutumikiri mutugwa wa umali koleta amenye ni kunyi, yaazi mu keng'oze change kongolera kehenyahenye.

¹⁸ Navuzwa lwa huliyi ningubaa zikwiri, yiruki nazia ichova, ma ni yandekera inguvu yeeye.”

¹⁹ Lwu munene weve yahulira makuva gu mukali weve yamuvolera, kuli mutumikiri weve mutugwa yamukolera, munene oyo vutima vwivwe vwiginga.

²⁰ Yalaga Josefu agumilwi, ma avikwi mu vuhambe, havundu ha vahambe vandi vu mwami vavohelangwa.

²¹ Navuzwa Yahova yaali harara na Josefu, kandi yamuyanza ligali, kandi namugasiza imbiri wu mulindi winyumba ya vahambe.

²² Hene yaho, mulindi winyumba ya vahambe, yakola Josefu kuva munene wa vahambe vandi vosi; kandi yamukola kuva nuvunyari ku kindu choosi chekoleka munyumba ya vahambe.

²³ Mulindi winyumba ya vahambe si yaahenzeriza kandi nuvunyari ku vindu viosi viali mu vulindi vwa Josefu mba, kigira Yahova yaali harara na naye; kandi yamugasiza mu vindu viosi via yakola.