Litanga 36 - KITABU KITAKATIFU

Visukululwi via Esau

¹ Yivi ni visukululwi via Esau, uwalangwaa Edomu.

² Esau yaleeta avakali veve kutura Kanaani. Amita ga vakali yava gaali: Ada mukaana wa Eloni umuhiti; Oholibama mukaana wa Ana muyaayi wa Zibeoni umuviti,

³ na Basemazi mukaana wa Ishimaeli, uwaali mbozo Nebayozi.

⁴ Ada yivula Elifazi; Basemazi yivula Reueli;

⁵ na Oholibama yivula Jeushi, Jalamu na Kora. Avayaayi yava vosi vaali avana va Esau avayiivulira mukivala cha Kanaani.

⁶ Maku Esau yavugula avakali veve, avayaayi veve, avakaana veve, kandi avandu vosi vi inyumba yeeye harara ni mitugu jije josi kandi nu vutugi vwivwe vwosi vwa yanyoora mukivala cha Kanaani. Yazia mukivala kindi ihale kutura ku amwavo weve Yakobo.

⁷ Yazia kigira mukivala cha yamenya mu na mwavo weve Yakobo, chaali kekekeeke ligali ku mitugu jaavo. Vaali ni mitugu minyingi ligali, na si vaali vanyara komenya harara mba.

⁸ Kunangwa Esau yamenya mu kiguru chi kivala cha Edomu.

⁹ Yivi ni visukululwi via Esau, umuguuga wa vandu va Edomu, mu kiguru chi kivala cha Seiri.

¹⁰ Ada mukali wa Esau yaali nu muyaayi mulala walangwa Elifazi, na mukali wundi Basemazi yaali nu muyaayi mulala walangwa Reueli.

¹¹ Elifazi yaali na vayaayi 5: Temani, Omari, Zefo, Gatamu na Kenazi.

¹² Elifazi yaali kandi nu mukali muviika, kandi yamwivulira muyaayi mulala uwalangwa Amaleki.

¹³ Reueli muyaayi wa Basemazi yaali na vayaayi 4: Nahazi, Zera, Shama na Miza.

¹⁴ Oholibama mukali wa Esau mukaana wa Ana, muyaayi wa Zibeoni yaali na vayaayi 3: Jeushi, Jalamu, na Kora.

¹⁵ Yizi ni zihiiri ziatula mu vandu vi inyumba ya Esau. Elifazi muyaayi wu kutanga wa Esau yaali muuguuga wi zihiiri yizi: Temani, Omari, Zefo, Kenazi,

¹⁶ Kora, Gatamu na Amaleki. Yava vosi vaali visukululwi via Ada, mukali wa Esau.

¹⁷ Reueli muyaayi wa Esau yaali muuguuga wi zihiiri yizi: Nahazi, Zera, Shama na Miza. Yava vosi vaali visukululwi via Basemazi mukali wa Esau.

¹⁸ Yizi ni zihiiri kutura ku Oholibama mukaana wa Ana, mukali wa Esau: Jeushi, Jalamu na Kora.

¹⁹ Zihiiri yizi ziosi ziatula ku Esau.

Visukululwi via Seiri

²⁰ Yava na vayaayi va Seiri Muhori, avandu vamenya mu kivala cha Edomu: Ihiiri ya Lotani, ihiiri ya Shobali, ihiiri ya Zibeoni, ihiiri ya Ana,

²¹ Dishoni, Ezeri, na Dishani.

²² Lotoni yaali na vayaayi 2: Hori na Hemani. Timina yaali mbozo Lotoni.

²³ Shobali yaali na vayaayi 5: Alivani, Manahazi, Ebali, Shefo na Onamu.

²⁴ Zibeoni yaali na vayaayi 2: Aya, na Ana. Uyu ni Ana uwanyola visinukiru via mazi amahiu mwigendanyama lwa yaali niyayizaa zibarasi zia baba weve Zibeoni.

²⁵ Ana yaali na vana 2: Dishoni na Oholibama.

²⁶ Dishoni yaali na vayaayi 4: Hemudani, Eshibani, Izirani na Kerani.

²⁷ Ezeri yaali na vana 3: Poilihani, Zavani na Akani.

²⁸ Dishani yaali na vayaayi 2: Uzi na Arani.

²⁹ Yizi ni zihiiri zia Hori, avamenyaa mukivala cha Edomu: Ihiiri ya Lotani, Ihiiri ya Shobali, Ihiiri ya Zibeoni, Ihiiri ya Ana,

³⁰ Ihiiri ya Dishoni, ihiiri ya Ezeri kandi ihiiri ya Dishani.

Avami va Edomu

³¹ Yava na vami avamiiha mukivala cha Edomu imbiri wu mwami wundi woosi yaali nakikiri kwamiiha avandu va Isiraeli:

³² Bela mwana wa Beori kutura mu lidaala lia Dinihaba.

³³ Lwa Bela yakuza, Jobabu mwana wa Zera kutura mu lidaala lia Bozira yamiha mu vogono vwivwe.

³⁴ Lwa Jobabu yakuza, Hushamu kutura mukivala cha Temani yamiha mu vogono vwivwe.

³⁵ Lwa Hisahamu yakuza, Hadadi mwana wa Bedadi, kutura mu lidaala lia Avizi uwaguuta avandu va Midia mukivala cha Moabu, yamiha mu vogono vwivwe.

³⁶ Lwa Hadadi yakuza, Shamula kutura Masireka yamiha mu vogono vwivwe.

³⁷ Lwa Samula yakuza, Shauli kutura Rehobozi ahimbi ku mugera gwa Efurate yamiha mu vogono vwivwe.

³⁸ Lwa Shauli yakuza, Balihanani mwana wa Akibori yamiha mu vogono vwivwe.

³⁹ Lwa Balihanani umuyaayi wa Akibori yakuza, Hadari kutura Pau, musaza wa Mehetabeli, mukaana wa Matiredi mwisukulu wa Mezahabu, yamiha mu vogono vwivwe.

⁴⁰ Yaga na mita gi zihiiri zia avandu vinyumba ya Esau, avamenyaa mukivala cha Edomu: Timina, Aliva, Jafeza,

⁴¹ Oholibama, Ela, Pinoni,

⁴² Kenazi, Temani, Mibizari,

⁴³ Magidieli na Iramu. Havundu ha vuli ihiiri yamenya, halangwa lieta kolondekana ni ihiiri yaavo.