Litanga 35 - KITABU KITAKATIFU

Nyasaye Yagasiza Yakobo ha Bezeli

¹ Nyasaye yavolera Yakobo, “Zia Bezeli na omenye uwene yeyo. Unyumbakiri uwene yeyo uvwali. Nyasaye waloleka ku ivi lwa waali ni wiruka kutura ku amwavo woovo Esau.”

² Kunangwa Yakobo yavolera vandu vinyumba yeeye harara na vandi voosi vaali naye, “Muleke avanyasaye avageni avamuveeye navo; mwitakase munyi aveene ma mwiviki zinguvu zi ndahi.

³ Maku kulatula hano na kulazia komenya Bezeli, uwananyumbakiri Nyasaye uvwali; Nyasaye wangonya ing'inga ya ndaali mu vudinyu, kandi havundu hoosi handazizaa yaala harara na inzi.”

⁴ Kunangwa vahaana ku Yakobo vanyasaye avageni vaavo vosi va vaali navo, kandi zimingiri zia vaali nazio mu matu gaavo. Yaaviyavira isi wu musaala munene ha Shekemu.

⁵ Lwa Yakobo yaatanga logendo harara na vayaayi veve, avandu va madaala gaali ahimbi, vaali nuvuti ovonene ligali, na si vavalondelera mba.

⁶ Yakobo harara na vandu veve, vaduuka ha Luzi, ahamanyikani kalunu kuli Bezeli, mukivala cha Kanaani.

⁷ Hene yaho, Yakobo yumbakira Nyasaye uvwali, ma nalanga havundu hene yaaha “Eli Bezeli” kigira Nyasaye yaloleka kuye lwa yaali ni yiruka kutura ku amwavo weve Esau.

⁸ Mukungaa wa Rabeka ulangangwa Debora yakuza, ma nayavirwa isi wu musaala munene isavaalu wa Bezeli. Kunangwa havundu hene yaho halangwa lieta, “Alonibakuzi.”

⁹ Lwa Yakobo yirana kutura Mesopotamia, Nyasaye yaloleka kuye kandi ma na mugaasiza.

¹⁰ Nyasaye yamuvolera, “Lieta liilio ni Yakobo, navuzwa kutura kalunu ivi lieta liilio lilava Isiraeli.” Kunangwa Nyasaye yamugulika Isiraeli.

¹¹ Nyasaye yavolera Yakobo, “Inzi mbeeye Nyasaye Wuvunyali; ove nu lwivulu lunyingi. Zihiiri zilanyooleka kutura ku ivi, kandi avami valanyooleka kutura ku ivi.

¹² Ndahaana ku ivi kivala cha ndahaana ku Aburahamu na Isaka, kandi ndahaana ku visukululwi vivio iviizaa inyima woovo.”

¹³ Maku Nyasaye yaavukana na Yakobo kutura havundu ha yamoloma kuye.

¹⁴ Ahene yaho, aha Nyasaye yaali na molomi na Yakobo, Yakobo yavika ho munara gwa magina gove kuli chukwizuliziraku. Yasundula ku iwaini na maguta ga muzeituni kandi nagutakasa.

¹⁵ Yalanga havundu hene yaaha Bezeli.

Likuza lia Raheli

¹⁶ Yakobo harara na vandu vi nyumba yeeye vazia kutura Bezeli. Lwa vaali ahimbi kuduuka Efurazi, ing'inga yaduuka Raheli kwivura mwana. Yaali nu vudinyu mu lilumwa liu mwana.

¹⁷ Lwa yaali mu lilumwa liu vuzunu vonene ligali, mukungaa weve yamuvolera, “Raheli, utatia mba; kigira ulivula mwana wundi muyaayi.”

¹⁸ Navuzwa ing'inga yilikuza lilie liali ni liduuki. Lwa yaali nakuzaa, yagulika mwana weve “Benoni”, navuzwa baba weve yamugulika “Benjamini.”

¹⁹ Kunangwa, Raheli yakuza; na yayavirwa ahimbi kunzira izizaa Efurazi, havundu hamanyikani kalunu kuli Bezelehemu.

²⁰ Yakobo yavika ligina liu kwizulizila ku havundu yaho. Ligina yili limanyia kilindwa cha Raheli kuduuka lero.

²¹ Yakobo yisunda hambiri, ma niyumbaka lihema lilie kolovega lundi lwu munara gwa Ederi.

Avayaayi va Yakobo

²² Lwa Yakobo yaali na menyi mukivala yiki, Rubeni yaali harara na Biliha, mulala ku vakali vatumikiri vababa weve. Lwa Yakobo yahulira makuva yaga, yavihilirwa ligali. Yakobo yaali na vayaayi 12:

²³ Avayaayi va Lea vaali; Rubeni, muyaayi wa Yakobo wu kutanga, Simioni, Levi, Yuda, Isakari, na Zabuloni.

²⁴ Avayaayi va Raheli vaali; Josefu na Benjamini.

²⁵ Avayaayi va Biliha mutugwa wa Raheli vaali Dani na Nafutali.

²⁶ Avayaayi va Ziliba mutugwa wa Lea vaali; Gadi na Asheri. Avayaayi yava vosi vivulwa mukivala cha Mesopotamia.

Likuza lia Isaka

²⁷ Yakobo yazia ku baba weve Isaka ha Mamure, ahimbi Heburoni, uwa Aburahamu na Isaka vamenya.

²⁸ Isaka yamenya kuduuka mihiga 180,

²⁹ na yakuza naveeye musakulu ligali. Avayaayi veve Esau na Yakobo vaavugura muviri gwigwe nivaguyavira.