Litanga 34 - KITABU KITAKATIFU

Dina Yonogonywa

¹ Lidiku lilala Dina, mukaana wa Yakobo na Lea yazia kogeniha avakali valala va Kanaani.

² Lwa Shekemu muyaayi wa Hamori muhivi waali munene wi kivala, yamulola yamugumira ma namwonogonyia.

³ Navuzwa mwoyo gwa Shekemu gwayaanza Dina mukaana wa Yakobo kunangwa yamoloma kuye nu mwoyo gwokogooha ligali.

⁴ Yavolera baba weve, “Inzi nyenya ombe mukaana oyo ave mukali wange.”

⁵ Yakobo yahulira ndi mukaana weve umali kwonogonywa, kunangwa siyakola kindu mba kuduuka lwa vayaayi veve virana, kutura mumilimi ni mitugu.

⁶ Hamori baba wa Shekemu yatura ichova kuzia komoloma na Yakobo,

⁷ lwa vayaayi veve vazaa kutura mumilimi. Lwa vahulira, vaali niligenya kandi nu vutima kigira Shekemu yaali naakori kindu kuli yiki kandi yaali nanyegi avandu va Isiraeli nukwonogonyia mukaana wa Yakobo.

⁸ Hamori yamuvolera, “Muyaayi wange Shekemu aveeye muvulina nu mukaana woovo; mwaza leka amuleete.

⁹ Leka kolombe livugilizana ndi lihilana live ho hagati ha vandu viitu na vovo.

¹⁰ Maku ivi ulamenya ni kunyi mukivala chiitu. Ivi ulamenya havundu hoosi ahawenya, nokokola vukala kandi nukuva ni miandu.”

¹¹ Maku Shekemu yavolera baba wa Dina na vavoozo veve, “Mungole zimbavasi yizi na inzi ndamuha choosi chamwenyaa.

¹² Mumbolere vihaanwa via mwenya, kandi mulombe vukwi vwu mwiha kuva igulu kuli mwenya. Inzi ndamuha choosi cha mwenya niiva munyi mulaleka inzi ndete Dina mukaana winyu.”

¹³ Avayaayi va Yakobo vaativulira Shekemu na baba weve Hamori mu liiva liuvugadi kigira Shekemu yaali naviiki Dina mbozo wavo muzisoni.

¹⁴ Vamuvolera, “Kunyi si kunyala koleka mbozo wiitu azie ku musaza ukikiri kokevwa mba. Yago ganyala kuva gizisoni ku kunyi.

¹⁵ Kunyi kunyala kuvugilira niiva unyala kuva kuli kunyi nokokeva avasaza vinyu vosi.

¹⁶ Maku kunyi kulavugilira koletana nimunyi. Kulamenya ni munyi kandi kulava avandu valala ni munyi.

¹⁷ Navuzwa niiva ivi ulavula kuvugilira kokevwa, kunyi kulavugula mukaana wiitu ma kutuli havundu hano.”

¹⁸ Makuva gaavo gayaanziza Hamori numuyaayi weve Shekemu.

¹⁹ Muyaayi musoleri waali wu luyali munyumba ya baba weve, yakola vwangu kokora ga vaali nivavooye, kigira yaayanza mukaana wa Yakobo.

²⁰ Hamori nu muyaayi weve Shekemu vazia havundu hukwaaganira mukilivwa chi lidaala linene kandi nivavolera vasaza vache vi lidaala:

²¹ “Vasaza yava vaveeye valina viitu; leki vamenye mu kivala chiitu ni kunyi kandi vakole likilanyia mu. Kivala keveeye kenene ligali kuvo kandi. Leki kolete vakana vaavo kandi navo valeete vakana viitu.

²² Navuzwa vasaza yava valavugilira komenya ni kunyi kandi vave kuli kunyi niiva kulavugilira kokeva vasaza viitu vosi kuli yavo vakevwa.

²³ Mitugu jaavo josi nivindu vindi viosi via vaveeye navio vilava vietu. Kunangwa muleke kuvugiliri ndi vanyara komenya harara ni kunyi.”

²⁴ Avandu vosi vazia havundu hu kwaganira mu kirivwa mu lidaala lihene vavugilira aga Hamori na Shekemu vavoola, kandi vasaza vosi vakevwa.

Avavozo va Dina Vavaanza Kisaalia

²⁵ Ku lidiku likora kavaga lwa avandu vaali nivakikiri nuvuzunu, avayaayi vaviri va Yakobo, Simioni na Levi, avavozo va Dina, vaavugura vivavi viavo ma ni vazia mu lidaala linene nivegoyiza, ma niviita avasaza vosi.

²⁶ Vita Hamori nu muyaayi weve Shekemu nikivavi, kandi nivavugura Dina munyumba ya Shekemu ma ni vazia.

²⁷ Inyima lwa vaali nivakaviita, avayaayi va Yakobo vandi, valanya lidaala mu livanza kisaalia kigira mukaana wavo waviikwa muzisoni.

²⁸ Vaavugura viayo, mitugu, zibunda kandi vuli kindu choosi mu lidaala kandi mumilimi.

²⁹ Vaavugura vuli kindu chuvuguli, vagumira vakali vosi navana kandi nivaginga vuli kindu kutura mu zinyumba.

³⁰ Yakobo yavolera Simioni na Levi, “Munyi mumali kumbika mukivi. Kalunu avandu va Kanaani, avandu va Peri kandi vuli mundu mu lidaala linene alanduunyira. Inzi si mbeeye na vasaza vanyingi mba. Niiva vanyara kuuza harara nukunyingilira, inyumba yitu yoosi ilakadivizwi.”

³¹ Navuzwa vaativura, “Sikunyala koleka mukaana wiitu akolelwe kuli liraya mba?”