Litanga 32 - KITABU KITAKATIFU

Yakobo Yetegekaa Kwaganira Esau

¹ Lwa Yakobo yazia kologendo lwilwe, yagana ni zingelosi zia Nyasaye.

² Lwa yaazilola, yavoola, “Yili ni liihi lia Nyasaye.” Kunangwa yalanga havundu yaaha “Mahanaimu”.

³ Yakobo yatuma avatumwa imbiri weve kuzia ku Esau amwavo weve mukivala cha Edomu.

⁴ Yavalaga vavoole ndi, “Inzi Yakobo, mutumikiri woovo, mboraa ku ivi munene wange Esau ndi, inzi ndamenyangi na Labani kuduuka kalunu.

⁵ Mbeeye ni viayo vie zing'ombe, zibunda amagondi, zimburi, kandi vatumikiri avasaza na vatumikiri avakali. Nduma makuva ku ivi mwami wange, uduuki kombera zimbavasi.”

⁶ Lwa vaatumwa viirana ku Yakobo, vamuvolera, “Kwa kuduuka ku amwavo woovo Esau, na, aveeye kologendo kuuza kukwaganira. Aveeye harara na vasaza (400).”

⁷ Maku Yakobo yaali nuvuti vonene ligali, kandi yahenda mwoyo nagavuranya avandu va yaali navo mu viduma viviri; Kandi yaagavuranya viayo vie zing'ombe, magondi, zimburi kandi zing'amia mu viduma viviri.

⁸ Yaganagana ndi, “Niiva Esau alaza kwingilira kiduma kilala nu kukidiviza, kiduma kindi kilahononoka.”

⁹ Maku Yakobo yasaala, “Nyasaye wa guuga wange Aburahamu, Nyasaye wa Isaka, hulira lisaala liange! Ivi wambolera, O, Yahova, nzirane mukivala change kandi ku viko vange, na ulangolera vulahi.

¹⁰ Inzi si mbeeye kali kindu kekekeeke ku vuyanzi vwosi vutaveeye ne keheri, kandi uvusuuvirifu vwosi vwa umali kumanyia ku inzi, mutumikiri woovo mba. Inzi ndaambuka mugera gwa Jorodani ni imbimbu yange yeng'ine. Kalunu mali kwirana ni viduma viviri yivi vandu ni viayo.

¹¹ Inzi ngusaala ombonyie kutura ku mukono gwu vusigu vwa mwavo wange Esau. Mbeeye nuvuti naye kigira alaza kukwingilira kandi kudiviza kunyi kwosi, kali avakali harara na vana.

¹² Wizulizi ndi, ivi walaga ulakola vuli kindu choosi kuva kilahi ku inzi. Kandi walaga ulangola kuva baba wi visukululwi vinyingi ligali, kuli muyeke gwu munyanza kali gutanyala kuvalizwa mba.”

¹³ Kunangwa Yakobo yagona ahene yaho vudiku vwene yivwo. Maku yavugula ku mitugu ja yaali najo naha Esau kuli kihanwa;

¹⁴ na jali kuli ndi; zimburi zikole 200, zimburi zingali 20, magondi masuveni 200, magondi mamigu 20,

¹⁵ zing'amia zia maveere 30 harara ni vimoli viazio, zing'ombe zidwasi 40, kandi zigiriki 10, zisukiri zingali 20, kandi zisukiri zisaza 10.

¹⁶ Yakobo yagavuranyia mitugu jije mu viduma vie viayo. Yavivika mu vulindi vwa vatumikiri veve, samulala ni chayo chiche. Yavavolera, “Mwimiri imbiri wange, na muleke uvwiyangu hagati ha vuli chayo.”

¹⁷ Yalaga mutumikiri wu kutanga, “Lwa amwavo wange Esau yagana ni munyi ma ateeve, ‘Munene winyu nivwaha? Muzizaa hayi? Mitugu ja muveeye najo yiji ni ja vwaha?’

¹⁸ Maku mulavativulira ndi, ‘Jiveeye ju mutumikiri woovo Yakobo. Ajitumaa kuli kihanwa ku munene weve Esau, umwene aveeye inyima wiitu.’ ”

¹⁹ Yahaana lilago lilala liere ku mutumikiri wa kaviri, wa kavaga kandi ku vandi vosi avaari aviimiliri vi viayo. Yavavolera ndi, “Yaga nigo agamuvoolera Esau lwa mwagana naye;

²⁰ muvoore ndi, ‘Mutumikiri woovo Yakobo aveeye inyima wiitu.’ ” Yakobo yaganagana ndi, “Ndamuyaanziza ni vihaanwa, na lwa zagana naye, hawundi alambera zimbavasi.”

²¹ Yakobo yatumana vihaanwa kuzia imbiri weve, na uvudiku yivwo, yagona havundu hokososa.

Yakobo Yalwana na Nyasaye ha Penieli

²² Mu vudiku vwene yivwo, Yakobo yavuka, navugura vakali veve vaviri, harara na vatumikiri veve vaviri vi kikali kandi avana veve 11. Yambuka mugera gwa Jaboku.

²³ Yavavugula harara ni miandu jije josi navambukiza mugera,

²⁴ navuzwa Yakobo yaatigara inyima yeng'ine. Maku umundu yaza nalwaana naye kuduuka mugambazuri.

²⁵ Lwu mundu uyu yalora ndi siaveeye unyala kuguuta Yakobo, yamuduya ku ivazwa yeeye. Hene yaho, iviungu vie ivazwa ya Yakobo viatula mu vogono vwa vio.

²⁶ Maku mundu oyo yavoola, “Leka inzi nzie kigira vucheye.” Yakobo yamuvolera, “Inzi si ndakuvugilira uzie mba, kuduuka lwa ungasiza.”

²⁷ Mundu oyo yateeva Yakobo, “Ivi ulangwa vwaha?” Yativura, “Yakobo.”

²⁸ Mundu uyu yavoola, “Kutura kalunu lieta liilio si ulalangwa Yakobo mba, navuzwa ulalangwa ‘Isiraeli’ kigira ivi umali kulwaana na Nyasaye kandi na vandu, na umali kuguuta.”

²⁹ Yakobo yavoola, “Kalunu mbolera lieta liilio.” Navuzwa mundu oyo yamutivulira, “Kigira ki ivi wenyaa kumanya lieta liange?” Maku mundu uyu yagasiza Yakobo.

³⁰ Yakobo yavoola, “Inzi mali kolola Nyasaye moni na moni, na kalunu ngikiri mwoyo.” Kunangwa yalanga havundu yaaha “Penieli.”

³¹ Yakobo yatura Penieli liuva nilikiri kutura. Yagenda nasegera kigira ivazwa yeeye.

³² Kali kuduuka na kalunu ndi avandu va Isiraeli si vanyara kulia inyama yi viungu vie ivazwa mba, kigira yaali inyama yu kuvazwa humundu yaduya Yakobo.