Litanga 30 - KITABU KITAKATIFU

¹ Lwa Raheli yalora ndi siyivulila Yakobo avana mba, yamanya nakendekera mukaana wavo. Kunangwa yavolera Yakobo, “Unzivulizi avana anoho inzi ndakuza.”

² Yakobo yasinyikira Raheli kandi navoora, “Inzi si nyara kuvugura vwiyangu vwa Nyasaye mba. Oyo niye wakola ivi kuvula konyoora avana.”

³ Yavoola, “Aveeye hano Biliha mukaana mutugwa wange, ove harara naye, kunangwa yanzivulili mwana. Munzira kuli yiyi inzi ndagwa mama kuvitira muye.”

⁴ Kunangwa yahaana Biliha ku musaza weve, kandi yaali harara naye.

⁵ Biliha yavereka ma niyivulira Yakobo mwana muyaayi.

⁶ Raheli yavoola, “Nyasaye umali kukalaga muliyaanzilira liange. Amali kuhulira lisaala liange kandi ambeeye mwana muyaayi.” Kunangwa yamugulika Dani.

⁷ Biliha yavereka kandi ma niyiivulira Yakobo mwana muyaayi wa kaviri.

⁸ Maku Raheli yavoola, “Inzi mali kulwaana vulwani vonene nu mukaana wiitu, kandi mali kuguuta.” Kunangwa yamugulika Nafutali.

⁹ Lwa Lea yaamanyiriza ndi yalekera konyora avana, yahaana Ziliba mukaana weve mutugwa ku Yakobo kuli mukali weve.

¹⁰ Maku Ziliba yivulira Yakobo mwana muyaayi.

¹¹ Maku Lea yavoola, “Inzi mbeeye ni ingavi!” Kunangwa yamugulika Gadi.

¹² Ziliba yivulira Yakobo mwana muyaayi wa kaviri,

¹³ kandi Lea yavoola, “Inzi mbeeye nuvuyanzi ligali! Kalunu vakali valananga vuyanzi.” Kunangwa yamugulika Asheri.

¹⁴ Ing'inga yiligesa lie ingano, Rubeni yazia mumilimi ma nanyoora makuyu guvuyaanzi aga yaleetera mama weve Lea. Raheli yavolera Lea, “Mwaza nuyanza mbe makuyu guvuyaanzi agumuyaayi woovo.”

¹⁵ Lea yativura, “Si gaduuki ndi ivi umali kuvugura musaza wange? Kalunu ogerizaa kuvugura makuyu guvuyaanzi gu muyaayi wange.” Raheli yavoola, “Niiva ulamba makuyu guvuyaanzi gumuyaayi woovo, ivi unyala kuva harara na Yakobo uvudiku vwakalunu.”

¹⁶ Lwa Yakobo yaza hamugorova kutura mumilimi, Lea yazia kumwaganira kandi navoora, “Ivi ulava harara na inzi vudiku vwa kalunu, kigira mali kukugulaa amauwa gu vuyanzi gu muyaayi wange.” Kunangwa yaali harara naye uvudiku yivwo.

¹⁷ Nyasaye yahulira lisaala lia Lea, na yavereka kandi niyiivulira Yakobo mwana muyaayi wakatano.

¹⁸ Lea yavoola, “Nyasaye umali kumba madanyi gange, kigira inzi ndahaana mutugwa wange ku musaza wange.” Kunangwa yagulika muyaayi weve Isakari.

¹⁹ Lea yavereka, kandi niyivulira Yakobo muyaayi wa sita.

²⁰ Yavoola, “Nyasaye ombeeye kihanwa kilahi. Kalunu musaza wange alambugilira, kigira inzi mali kumwivulira avayaayi sita.” Kunangwa yamugulika Zabuloni.

²¹ Lwinyima yivula mwana mukaana namugulika Dina.

²² Maku Nyasaye yizuliza Raheli. Yamutivulira lisaala lilie kandi naamukora konyoora avana.

²³ Yavereka kandi niyiivura mwana muyaayi ma navoora, “Nyasaye umali kunduliza muzisoni.

²⁴ Vwakaveeye vulahi Yahova yameda muyaayi wundi.” Kunangwa yamugulika Josefu.

Yakobo na Labani

²⁵ Inyima wa Josefu yaali niyakivulwa, Yakobo yavolera Labani, “Oleke zirane yengo wiitu.

²⁶ Ombe vakali vange navana vange ava inzi mali konyoora kigira miyinzi ja ndakokolera, na inzi ndazia. Ivi umanya kuli ndaakutumikira vulahi ligali.”

²⁷ Labani yamuvolera, “Inzi mali kumanya kuvitira muvusigitiri ndi Yahova umali kuungasiza kigira ivi.

²⁸ Vola mitungu jijo na inzi ndakutunga.”

²⁹ Yakobo yativura, “Ivi umanyia kuli ndaakuyinziliyaa kandi kuli mitugu jijo jameedeka kigira vulindi vwange.

³⁰ Vikekeke via waali navio inzi ni ngikiri kuuza, viameedeka ligali, kandi hoosi handasena Yahova yakugasiza. Kalunu ing'inga imali kuduuka inzi kulinda avandu vinyumba yange.”

³¹ Labani yateva, “Kindiki chanyala kukutunga?” Yakobo yativura, “Utandunga kindu choosi mba. Navuzwa niiva ulangolera kindu kilala yiki, inzi ndazizagilira kulinda mitugu jijo:

³² Oleke mbenze mu mitugu jijo kalunu kandi mbuguli vuli ligondi limwamu na vuli imburi yuvubalabale. Yigi nijo mitungu josi jaanyenya.

³³ Mu madiku gaaza unyala kumanyiriza niiva ndaali musuuvirifu. Lwa waza uzi kohenzeriza mitungu jange, niiva ndakave ni imburi yoosi itaveeye nuvubalabale anoho ligondi litaveeye limwamu, ivi ulakamanye ndi limali kwivwa.”

³⁴ Labani yavoola, “Vulahi! Leka gave kuli ovooye.”

³⁵ Navuzwa lidiku yilio Labani yaatuliza zimburi zisaza ziali nuvubalabale kandi nizingali ziosi ziali nuvubalabale anoho vulavu muzio. Yaatuliza kandi magondi mamwamu. Gaali muvulindi vwa vayaayi veve,

³⁶ kandi yatura ku Yakobo ni mitugu yigi nazia logendo lwamadiku gavaga. Yakobo yalinda mitugu jindi josi ja Labani ijaatigala.

³⁷ Yakobo yatema zisia kutura ku musaala gwumutaave, migusa kandi kutura kumusaala gwumuseverenze muvisi vuli kazozo. Yaakuvula ku magodo kandi nakora zisia ni ziva ni midindi imilavu.

³⁸ Yavika zisia yizi imbiri wi mitugu ahimbi ha zianwera mazi. Yaazivika ho kigira mitugu jaganilaho lwa jenya kutuma, maku jiheriza lwa jaaza kunwa mazi.

³⁹ Kunangwa lwi mitugu jagana ma nijiheriza imbiri wi zisia, zivuula vimeme ving'ereng'anu, viovubalabale kandi viovong'orang'ore.

⁴⁰ Yakobo yavukanyia magondi kutura mu zimburi kandi naagakora nigahenza lovega lwi mitugu ja Labani jovong'erenganu nu vumwamu jiveeye. Yanenehiza chayo chiche kandi nakiviika halovega kutura ku cha Labani.

⁴¹ Lwi mitugu jizinguru jaaganaa, Yakobo yavika zisia imbiri wa zio aha zianwera mazi, kunangwa zihambiri ahimbi ni zisia.

⁴² Navuzwa si yavika zisia imbiri wi mitugu midedekere mba. Nonoho Labani yaali ni mitugu midedekere, na Yakobo yaali ni mitugu jizingulu josi.

⁴³ Yakobo yagwa mutugi ligali munzira kuli yiyi. Yaali niviayo vinyingi, vatumikiri vakali na vasaza, zing'amia kandi zibunda.