Litanga 29 - KITABU KITAKATIFU

Yakobo Yaduuka Hango ha Labani

¹ Yakobo yaazizagilira nologendo lwilwe kandi nazia lovega lwi kivala chi Ivugwi.

² Nonoho yaduuka ha kidaho mu mulimi ahi iviayo vivaga via magondi viali ni vingoni nivikikumbelizi. Iviayo yivi vianyola amazi gavio kutura mu kidaho yiki, ichaali nichakunikwa ni ligina linene ha munwa.

³ Lwi viayo viosi viaza yo harara, avayi vaagomagominya ligina kunangwa vanwehizi viayo mazi. Maku lwinyima viayo niviakanwa, avayi viranyia ligina ha munwa hi kidaho.

⁴ Yakobo yateeva avayi, “Avamwavo vange, munyi muturaa haliha?” Vaativura, “Kutura Harani.”

⁵ Yateva, “Munyi mwamanya umwisukulu wa Nahori?” Vaativura, “Kunyi kwamumanya.”

⁶ Yateva, “Aveeye mulamu?” Vaativura, “Aveeye mulamu. Heenzi nguyu Raheli mukaana wa Labani yaazaa harara nichayo cha baba weve.”

⁷ Yakobo yavoola, “Kigira vukikiri mbasu kandi ing'inga ikikiri kuduuka yukwingiliza viayo, kigira ki simuzinwehiza mazi ma wiranyie muchayiru?”

⁸ Vaativura, “Kunyi sikunyala kokora ndio mba kuduuka lwi viayo viosi viduuka hano ma ligina ligomagominywi; maku kulanwehiza viayo amazi.”

⁹ Lwa Yakobo yaali nakemoloma navo, Raheli yaza harara nichayo.

¹⁰ Lwa Yakobo yalora Raheli naveeye nichayo cha koza weve Labani, yazia mu kidaho, nagomagominya ligina kandi naanwehiza magondi mazi.

¹¹ Maku yamuvusa kandi natanga lilira kigira uvuyanzi.

¹² Yanyagura kuzia kuvolera Raheli, “Inzi mbeeye umwiko wa baba woovo, muyaayi wa Rabeka.” Yazia zimbiru kovoolera baba weve.

¹³ Lwa yahulira makuva mageni kigira koza weve Yakobo, yazia vwangu kumwaganira. Yamukumbela na muvusa, kandi namwingiliza munyumba. Lwa Yakobo yamuvolera goosi agaali gekoleki,

¹⁴ Labani yavoola, “Ligali ivi oveeye mwana wu mukaana wiitu kandi oveeye kuli mulala uwi ihiiri yange.” Yakobo yamenya yo mweli mulala.

Yakobo Yayinzilira Labani Kigira Raheli na Lea

¹⁵ Labani yavolera Yakobo, “Ivi utayinzilira inzi vugira mitungu kigira oveeye mwiko wange mba. Wenyaa ngutungi mitungu jili?”

¹⁶ Labani yaali na vakana vaviri; mukaana wukutanga yalangwa Lea na wakaviri yalangwa Raheli.

¹⁷ Zimoni zia Lea ziali zindedekere navuzwa Raheli yaali niligondo lilahi kandi wukuyaanziza.

¹⁸ Yakobo yayanza Raheli, kunangwa yavoola, “Inzi ndakuyinzilira imihiga saba, niiva ulambugilira koleta Raheli.”

¹⁹ Labani yativura, “Vwakaveeye vulahi kuhaana mukaana wange ku ivi kuvita kumuhaana ku musaza wundi woosi. Menya hano na inzi.”

²⁰ Yakobo yayinzira imihiga saba kunangwa anyoore Raheli. Ing'inga yeyo yaali kuli madiku makekeeke vuzwa, kigira yamuyanza ligali.

²¹ Maku Yakobo yavolera Labani, “Ing'inga iduuki; Oleke ndete mukaana woovo.”

²² Kunangwa Labani yalanga avandu vosi va havundu yaho kandi nalomba iliilia.

²³ Navuzwa uvudiku yivwo, yaleetera Yakobo Lea muvogono vwa Raheli, kandi Yakobo yaali harara naye.

²⁴ Labani yahaana mutumikiri weve Ziliba ku mukaana weve Lea kumuyinzilira.

²⁵ Lwa vwacha mugamba, Yakobo yahenza nalora ni Lea. Yazia ku Labani navoora, “Kigira ki ongoleeye yaga? Inzi ndaayinzira konyoora Raheli. Kigira ki ivi umali kungada?”

²⁶ Labani yativura, “Si goveeye umwima gwitu koleka mukaana winyima azie lukali nuwukutanga nakikiri mba.

²⁷ Ulindi kuduuka lwi lilia lie lisiza lilala liokoletana limaliriki, kandi inzi nangohe Raheli, niiva ulakanyinziliri mihiga jindi saba.”

²⁸ Yakobo yavugilira, kandi lwi lilia lie lisiza lilala liokoletana liafa, Labani yamuha mukaana weve Raheli kuli mukali.

²⁹ Kandi Labani yahaana mukali mutugwa Biliha ku mukaana weve Raheli ave mutumikiri weve.

³⁰ Yakobo yaali harara na Raheli kandi yamuyanza kuvita Lea. Maku yayinzilira Labani mihiga jindi saba.

Avana va Yakobo Yivula

³¹ Lwa Yahova yalora ndi Yakobo yayanza Raheli kuvita Lea, yakola Lea konyoora avana, na Raheli naava mugumba.

³² Lea yavereka kandi niyiivura mwana muyaayi. Yavoola, “Yahova ololi vudinyu vwange kandi kalunu musaza wange alanyaanza.” Kunangwa yamugulika Rubeni.

³³ Yavereka kandi niyiivura mwana wundi muyaayi. Yavoola, “Yahova ambeeye mwana uyu kandi, kigira yahulira ndi si ndayaanzwa mba.” Kunangwa yamugulika Simioni.

³⁴ Yavereka kandi ma niyivura mwana muyaayi. Yavoola, “Kalunu musaza wange alanyaanza ligali, kigira mali kumwivulira avana vayaayi vavaga.” Kunangwa yamugulika Levi.

³⁵ Maku yavereka kandi niyivura mwana wundi muyaayi. Yavoola, “Ing'inga yiyi inzi ndizominya Yahova.” Kunangwa yamugulika Yuda. Maku yalekera konyoora avana.