Litanga 28 - KITABU KITAKATIFU

¹ Isaka yalanga Yakobo, namuteeva mirembe, ma namuvolera, “Utaleta mukali kutura mukivala cha Kanaani mba.

² Uzie Mesopotamia, hango ha guuga woovo Bezueli, ma oleete mukali mukaana mulala ku vakana va Labani koza woovo.

³ Nyasaye Wuvunyali ayaanze akugasizi kandi wivuli avana vanyingi, kunangwa uduuki kuva baba wi zihiiri zinyingi!

⁴ Nyasaye ayaanze akugasizi harara ni visukululwi vivio, kuli yagasiza Aburahamu. Uvuguli miandu ji kivala yiki, icha ivi omenyi mu, kandi icha Nyasaye yahaana ku Aburahamu!”

⁵ Isaka yatuma Yakobo kuzia Mesopotamia wa Labani, uwaali muyaayi wa Bezueli kutura mukivala cha Arameyani. Labani yaali mbozo Rabeka, uwaali mama Yakobo na Esau.

Esau Yaleeta Mukali Wundi

⁶ Esau yamanya ndi Isaka yaali nagaasizi Yakobo kandi naamutumi kuzia Mesopotamia koleta yo mukali. Kandi yamanya ndi lwa Isaka yagasiza Yakobo, yamulaga avuli koleta mukali kutura mukivala cha Kanaani.

⁷ Esau yamanya ndi Yakobo yaali natiyi amalago ga baba weve na mama weve, ma naziiyi Mesopotamia.

⁸ Maku Esau yamanya ndi baba weve Isaka si yayanzizwa na vakana va Kanaani mba.

⁹ Kulwayago, Esau yazia ku Ishimaeli muyaayi wa Aburahamu naleta mukaana weve wa langangwa Mahalazi, uwaali mbozo Nebaiozi.

Amalooto ga Yakobo ha Bezeli

¹⁰ Yakobo yatura Beerisheba ma nazia Harani.

¹¹ Lwu vudiku vwaduuka, yazia kogona havundu hatakatifu. Yavugula ligina lilala naviikaku mutwi gwigwe ma naagona.

¹² Yalota ndi, ololi ingasi kutura mwigulu na idiiri ku lirova. Zingelosi va Nyasaye vanina kuzia igulu kandi viika hasi.

¹³ Havundu hene yaho, yalora Yahova nasingiyi halovega. Yavoola, “Inzi mbeeye Yahova, Nyasaye wa Aburahamu kandi Nyasaye wa Isaka. Ndakahaane ku ivi kivala chogoniku yiki, harara ni visukululwi vivio.

¹⁴ Visukululwi vivio vilakave vinyingi kuli luguchi loveeye ku lirova. Valalanda kutura Ivugwi kuduuka Imadioli, kandi kutura Ivaale kuduuka Isavaalu. Kuvitira mu ivi ni visukululwi vivio, ndakagasizi zihiiri ziosi.

¹⁵ Wizulizi, Inzi ndava harara na ivi kandi ndakukukingi havundu hoosi ha uzia; kandi ndakakwiranye mukivala yiki. Si ndakakoleke mba, kuduuka lwa ndakaduukizi goosi aga mali kukulaga.”

¹⁶ Maku Yakobo yavuka kutura mu zindolo, navoora, “Gaveeye agiligali Yahova aveeye havundu hano navuzwa si ndamanya mba!”

¹⁷ Yaali nuvuti na yavoola, “Havundu yaaha haveeye hu kutihiza ligali! Kuduuka haveeye inyumba ya Nyasaye; kandi kuduuka have kirivwa chu mu ligulu.”

¹⁸ Kunangwa Yakobo yavuka mugambazuri lidiku lialondaku, navugura ligina lia yaali navikiku mutwi, ma naalisingiliza havundu hene yaho kuli itiiru. Maku yitulaku amaguta ga muzeituni; na chaali kimanyiru ndi yaaha na havundu hatakatifu ha Nyasaye.

¹⁹ Yalanga havundu yaaha “Bezeli” navuzwa maziambiri halangwa Luzi.

²⁰ Maku Yakobo yalomba lilagana na Yahova navoora, “Niiva ulava harara ninzi nukuninda kologendo lwange, kandi kumba chukulia nizinguvu,

²¹ Kandi niiva ndirana mu mirembe hango ha baba wange, kunangwa ivi ulakave Nyasaye wange.

²² Havundu hamali kuviika ligina liu kwizulizilaku yaaha, halava hu kukusigamira; kandi ku viosi via uhaana ku inzi, ndahaana ku ivi kidieli chi likomi.”