Litanga 27 - KITABU KITAKATIFU

Isaka Yagasiza Yakobo

¹ Lwa Isaka yaali mundu musakulu ligali; zimoni zizie ziavakula. Yalanga Esau mwana weve mukulundu, namuvolera, “Muyaayi wange!” Esau yahugira, “Mbeeye hano.”

² Isaka yamuvolera, “Kalunu inzi mbeeye mundu musakulu ligali, nyara kukuza vwangu.

³ Kalunu uvuguli uvuta kandi mivano ju vuta vuvwo, uzie mu vulimu kuhiima inyama.

⁴ Ondekele chukulia kilahi ligali cha inzi nyanza, ma ondetere nduuki kulia; kunangwa ngugaasizi ni ngikiri kukuza.”

⁵ Lwa Isaka yaali namolomaa ku Esau, Rabeka yaali naahuliriza. Kunangwa lwa Esau yaali nazi kuhiima inyama,

⁶ Rabeka yavolera Yakobo, “Mbuliyi baba woovo navolera Esau ndi;

⁷ ‘Uzie mu vulimu kuhima inyama, odeeke ma ondetere nduuki kulia, kunangwa ngugaasizi imbiri wa Yahova ni ngikiri kukuza.’

⁸ Kalunu muyaayi wange, uhuliri aga inzi mboraa, ma ugakole agamboye.

⁹ Uzie muchayo ma uvuguli vimeme viviri vinetu, kunangwa nduuki kolomba chukulia kilahi ligali cha baba woovo ayaanza.

¹⁰ Ulavugula chukulia yiki uhiliri baba woovo alie kunangwa aduuki kukugasiza nakikiri kukuza.”

¹¹ Navuzwa Yakobo yavolera mama weve, “Ivi umanya vulahi ndi Esau aveeye na maswa ku muviri gwigwe, navuzwa muviri gwange goveeye musweleku.

¹² Hawundi baba wange anyala kundira ma anyoore ndi inzi mugadaa; na ndio ndeletera kilaamo inzi mwene havogono hu vugasu.”

¹³ Mama weve Rabeka yamuvolera, “Leka kilaamo keve ku inzi; kola kuli ngovoleeye. Zia ondetere vimeme viviri viamagondi.”

¹⁴ Kunangwa Yakobo yazia koleta vimeme viviri vinetu naahilira mama weve. Yalomba chukulia kilahi ligali cha baba weve yayanza.

¹⁵ Maku Rabeka yavugula zinguvu zia Esau zi ndahi ligali, zia yaali naviiki munyumba, ma naviika Yakobo.

¹⁶ Yavugula visero vie vimeme naviika ku makono ga Yakobo kandi ku ligoti lilie.

¹⁷ Yavugula chukulia cha yaali naalombi, nahaana ku Yakobo.

¹⁸ Maku Yakobo yazia ku baba weve navoora, “Baba wange!” Naye yativura, “Mbeeye hano, ivi oveeye vwaha mwana wange?”

¹⁹ Yakobo yativulira baba weve, “Inzi mbeeye Esau mwana woovo muhindira. Mali kokora kuli omboleeye. Mwaza yaanza uvuki na ulie kunyama ya mali koleta, kunangwa uduuki kuungasiza.”

²⁰ Navuzwa Isaka yavoola, “Gaali ndi ivi onyooye inyama vwangu, mwana wange?” Yakobo yativura, “Yahova Nyasaye woovo yaangonyi konyoora vwangu.”

²¹ Maku Isaka yavolera Yakobo “Yisundi ahimbi ngudiiri ndore niiva oveeye mwana wange Esau.”

²² Yakobo yisunda ahimbi na baba weve, yamudira ma navoora, “Mwoyo gugwo goveeye kuli gwa Yakobo, navuzwa makono googo gaveeye aga Esau.”

²³ Isaka siyaamanyiriza ndi yaali Yakobo mba, kigira makono geege gaali na maswa kuli aga Esau. Lwa yaali naveeye ahimbi kumugaasiza,

²⁴ yamuteeva kandi; “Ivi oveeye ligali mwana wange Esau?” Naye yativura, “Yee ni inzi.”

²⁵ Maku Isaka yavoola, “Ndetera ku chukulia yicho nduuki kulia. Ni ndakamala kulia, ndakugasiza.” Yakobo yamuha chukulia nalia, kandi yamuha iwaini naanwa.

²⁶ Maku Isaka baba weve yamuvolera, “Mwana wange, yisundi ahimbi ma umbusi.”

²⁷ Lwa yisunda ahimbi kumuvusa, Isaka yafunya ku zinguvu zizie ma namugasiza. Yavoola, “Lifunya liu mwayu mulahi liu muyaayi wange liveeye kuli lifunya liu mwayu mulahi liu mulimi gwa Yahova amali kugasiza.

²⁸ Nyasaye ayaanze ahaane ku ivi imbura kutura mu ligulu, kokora mulimi gugwo kuva munolu! Ahaane liama linyingi liu vuswage kandi makuyu manyingi iwaini.

²⁹ Zihiiri ziosi zilakutumikira, kandi avandu valakusigamira, ulamiha ku viko vovo vosi, kandi visukululwi via mama woovo vilakusigamira. Ndalaama yavo avakulaama, kandi ndagasiza yavo avakugaasizaa.”

Esau Yagoonya Isaka Amugasizi

³⁰ Nonoho lwa Isaka yaali niyakamara kugasiza Yakobo, Yakobo yazia ichova kutura imbiri wa Isaka baba weve, Esau amwavo weve yaza kutura mu lihiima.

³¹ Yalomba kandi chukulia kilahi ligali, ma naahilira baba weve. Yamuvolera, “Baba wange yaanza uvuki na ulie ku inyama ya mali koleta, kunangwa uduuki kuungasiza.”

³² Isaka baba weve yamuteeva, “Ivi oveeye vwaha?” Naye yativura, “Inzi mbeeye Esau mwana woovo mukulundu.”

³³ Isaka yaatanga kodegera ligali navoora, “Nivwaha uyu, witi inyama ma nandetera? Inzi mali kulia inyama imbiri wa ivi waali nukikiri kuuza. Inzi mali kumugaasiza ligali, na alava nuvugasu mihiga ni mihiga.”

³⁴ Lwa Esau yahulira yaga, yalira ligali vululu, navoora, “Ungasizi inzi kandi, baba wange!”

³⁵ Navuzwa baba weve yavoola, “Amwavo woovo Yakobo yaazi nangaada ma inzi mali kumugaasiza havogono hoho.”

³⁶ Esau yavoola, “Yiyi ni ing'inga ya kaviri nakora vugadi ku inzi. Si mbeeye ni ligenya kigira nalangwa Yakobo. Lwukutanga yavugula ovonene vwange nava kuli muyaayi muhindira, na kalunu umali kuvugura ligasizwa liange. Utigayeku niligaasizwa lindi lia unyala kumba?”

³⁷ Isaka yativulira Esau, “Inzi mali kumukola ave munene ku ivi, kandi mali kokora aviiko veve vosi kuva avatugwa kuye. Mali kumuha uvuswage kandi iwaini. Kalunu simbeeye ni kindu kindi chanyala kokokolera mba!”

³⁸ Navuzwa Esau yaazizagilira kogoonya baba weve, “Utigaye ku ni ligasizwa kali lilala lieng'ine baba? Yaanza ungasizi kandi baba wange!” Esau yaatanga kulira. Maku Isaka baba weve yamuvolera,

³⁹ “Vomenyo vuvwo vulava ihale kutura mu lirova linolu, kandi si ulanyora imbura kutura mu ligulu mba.

⁴⁰ Ivi ulanyora lilia kigira vulwani, kandi ulatumikira amwavo vovo; Navuzwa niiva ulibaala kuye, ulavukana naye nukuzia ihale.”

⁴¹ Maku Esau yaduunyira Yakobo amwavo weve, kigira baba weve yaali naamugasizi. Yaganagana ndi, “Ing'inga yu kusiomera likuza lia baba wange eveeye ahimbi; maku inzi ndakiti Yakobo.”

⁴² Navuzwa Rabeka mama weve lwa yahulira lilohiza lia Esau, yatumana Yakobo namuvolera, “Hulira, amwavo woovo Esau alohizaa kuvanza kisaalia ku kwita.

⁴³ Kalunu muyaayi wange, okole aga inzi ngovolera. Uzie vwangu ku mbozo wange Labani oveeye ha Harani,

⁴⁴ omenye naye ku ing'inga kuduuka lwu vutima vwa amwavo woovo Esau vohomata.

⁴⁵ Lwa amwavo woovo nayiviriri goosi ga umali kumukolera, maku naangulange nawirane. Kigira ki ngotizi munyi vombi avayaayi vange ku ing'inga indala?”

Isaka Yatuma Yakobo wa Labani

⁴⁶ Rabeka yavolera Isaka, “Inzi mbihirirwa na vakali avageni vi kivala cha Hiti. Niiva Yakobo alaleeta mukali mulala ku vakali yava, vwakaveeye vulahi inzi kukuza.”